ପରଜଙ୍ଗ: ଜମ୍ମୁ-କାଶ୍ମୀରରେ ଓଡ଼ିଆ ଯବାନ ସହିଦ । କିସ୍ତୱାରରେ ଗତ ଗୁରୁବାର ହୋଇଥିବା ବାଦଲ ଫଟା ବର୍ଷା ଓ ଭୂସ୍ଖଳନରେ ଜଣେ ଓଡ଼ିଆ ଯବାନ ସହିଦ ହୋଇଛନ୍ତି । ମୃତ ଯବାନ ଜଣଙ୍କ ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ମାଣିକମରା ଗାଁର ମନୋଜ ବିଶ୍ଵାଳ । ଚିସୁତି ଗାଁ ପାହାଡ଼ ଶିଖର ମଚଳି ମାତା ମନ୍ଦିର ଯାତ୍ରା ଡ୍ୟୁଟିରେ ଥିବାବେଳେ ବାଦଲ ଫଟା ବର୍ଷା ପରେ ଭୂ-ସ୍ଖଳନ ହୋଇଥିଲା ।

ସେବେଠୁ କିସ୍ତୱାରେ ୨୦୦ରୁ ଅଧିକ ନିଖୋଜ ଥିବା ବେଳେ ଶନିବାର ଓଡ଼ିଆ ଯବାନ ମନୋଜଙ୍କ ମୃତଦେହ ମିଳିଥିଲା । ମନୋଜଙ୍କ ଦେହାନ୍ତ ଖବର ପାଇ ମାଣିକମରା ଗାଁରେ ଶୋକର ଛାୟା ଖେଳି ଯାଇଛି । ମନୋଜଙ୍କ ସ୍ତ୍ରୀ ଓ ଦୁଇ ଝିଅ ଅଛନ୍ତି । ମନୋଜ ତାଳଚେର ଟିଟିପିଏସ୍‌ରେ ନିଯୁକ୍ତ ଥିବାରୁ ସେଠାରେ ଘରଭଡ଼ା ନେଇ ପତ୍ନୀ ଓ ୨ ଝିଅଙ୍କ ସହ ରହୁଥିଲେ । ମନୋଜଙ୍କ ସାନ ଭାଇ ମଧ୍ୟ CISFରେ କାର୍ଯ୍ୟରତ ।

ମନୋଜ ନିୟୋଜିତ ଥିବା ଚିସୁତି ଗାଁ ପାହାଡ଼ ମନ୍ଦିରରେ ଯାତ୍ରା ଜୁଲାଇ ୨୫ରୁ ଆରମ୍ଭ ହୋଇଥିଲା । ଏହା କିସ୍ତୱାର ଜିଲ୍ଲା ଠାରୁ ୯୦ କିଲୋମିଟର ଦୂରରେ ଅବସ୍ଥିତ । ଏହି ଯାତ୍ରା ସେପ୍ଟେମ୍ବର ୫ରେ ସରିବାର ଥିଲା । ବାଦଲ ଫଟା ବର୍ଷା ଓ ଭୂସ୍ଖଳନ ପରେ ଏହି ଯାତ୍ରାକୁ ବନ୍ଦ କରିଦିଆ ଯାଇଛି । ଭୂସ୍ଖଳନରେ ଏବେ ସୁଦ୍ଧା ୭୦ରୁ ଅଧିକ ପ୍ରାଣ ହରାଇଥିବା ବେଳେ ଏବେ ବି ୨୦୦ରୁ ଅଧିକ ନିଖୋଜ ଅଛନ୍ତି ।

କିସ୍ତୱାରରେ ଆଖି ପାଇବା ଯାଏ କେବଳ ଧ୍ଵଂସ ହିଁ ଧ୍ଵଂସ ଦେଖିବାକୁ ମିଳୁଛି । ଏବେ ବି ମାଟିକାଦୁଅ ଓ ପଥର ତଳେ ଅନେକ ଲୋକ ଫସି ରହିଥିବା ଆଶଙ୍କା କରାଯାଉଛି । ପ୍ରତିକୂଳ ପାଣିପାଗ ସତ୍ତ୍ଵେ ଜାରି ରହିଛି ଉଦ୍ଧାର କାର୍ଯ୍ୟ । ବାଦଲ ଫଟା ବର୍ଷା ପରେ ପାଣି ସହ ବଡ଼ ବଡ଼ ପଥର ଖଣ୍ଡ ଓ ଗଛ ଭାସି ଆସି ଘର, ଦୋକାନ ଆଦି ଭସାଇ ନେଇଥିଲା ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ

Argus News | argus news | -Argusnews Home: Odisha Latest News, Breaking News, Trending News, Live TV and more