ଅର୍ଗସ ବ୍ୟୁରୋ : ରାଜ୍ୟରେ ଏବେ ଆଇନଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ । ଏ କଥା ଆମେ ନୁହେଁ ବରଂ କହିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ଗୃହରେ ରାଜ୍ୟପାଳ ଅଭିଭାଷଣ ରଖୁଥିବା ବେଳେ ମାତ୍ର ଦେଢ  ମିନିଟ ପରେ  ରାଜ୍ୟପାଳଙ୍କ ଅଭିଭାଷଣକୁ ବୟକଟ କରି କକ୍ଷତ୍ୟାଗ କଲେ ବିରୋଧୀ । ଗୃହ ବାହାରେ ବିରୋଧୀ ଦଳ ନେତା ନବୀନ ପଟ୍ଟନାୟକ ଅଭିଯାଗ କଲେ ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ଭୂଷୁଡି ପଡିଛି । ନବୀନ ନିଜ ସରକାର ଅମଳରେ ମନ୍ତ୍ରୀ ବିଧାୟକଙ୍କ ନାଁରେ ଅଭିଯୋଗ ଆସିଲେ ତୁରନ୍ତ ଆକ୍ସନ କରୁଥିଲେ ବୋଲି ବାହାସ୍ପୋଟ ବି ମାରିଲେ । ଯଦି ଆକ୍ସନ ନେଉଥିଲେ ତାହାଲେ ପ୍ରତାପ, ଅରୁଣ, ବ୍ୟୋମକେଶ ଓ ଦିବ୍ୟଶଙ୍କରଙ୍କ ବିରୋଧରେ କି ଆକ୍ସନ ନେଲେ ତାହା କିନ୍ତୁ କହିଲେନି । 

ନବୀନଙ୍କ  ଆଇନ ଶୃଙ୍ଖଳା  ମନ୍ତବ୍ୟକୁ କିନ୍ତୁ ସାଧାରଣ ଲୋକେ ହଜମ କରିପାରୁନାହାଁନ୍ତି । କାରଣ ୨୫ ବର୍ଷ ଶାସନ ଭିତରେ ନେତା - ମନ୍ତ୍ରୀ  କେମିତି  ଆଇନକୁ ହାତକୁ ନେଉଥିଲେ ତାର ଉଦାହରଣ ରଖି ପ୍ରଶ୍ନ କରିଛନ୍ତି ସାଧାରଣ ଲୋକ  । ମାହାଙ୍ଗାରେ ଡବଲ ମର୍ଡର ମାମଲାରେ ମୁଦାଲା ନମ୍ବର ୧୩ ଥିଲେ ତତ୍କାଳୀନ ବିଧାୟକ ପ୍ରତାପ ଜେନା । ଖାଲି ଏତିକି ନୁହେଁ ବରଂ ଅଭିଯୁକ୍ତ କାବୁଲାର ସନ୍ଦେହ ଜନକ ମୃତ୍ୟୁ ପଛରେ ବି ପ୍ରତାପଙ୍କ ସଂପୃକ୍ତି ଥିବା ନେଇ ଆସିଥିଲା ସଙ୍ଗୀନ ଓ ସାଙ୍ଘାତିକ ଅଭିଯୋଗ ।

ହେଲେ ଆକ୍ସନ ତ ଦୂରର କଥା ବରଂ ଦଳୀୟ କାର୍ଯ୍ୟାନୁଷ୍ଠାନ ବି ନେଇନଥିଲେ ନବୀନ । ସେହିପରି ମମିତା ମେହର ମର୍ଡର ଓ ପରେ  ଜେଲ ଭିତରେ ଅଭିଯୁକ୍ତ ଗୋବିନ୍ଦର ମୃତ୍ୟୁ ପଛରେ ଦିବ୍ୟଶଙ୍କର ମିଶ୍ରଙ୍କ ସଂପୃକ୍ତି ଅଭିଯୋଗ ପରେ ବି ନୋ ଆକ୍ସନ ମୁଦ୍ରାରେ ଥିଲେ ନବୀନ । କେବଳ ଏଇ ଘଟଣା ନୁହେଁ ବରଂ ପରୀ ହତ୍ୟାକାଣ୍ଡର ଅଭିଯୁକ୍ତଙ୍କୁ ଅରୁଣ ସାହୁଙ୍କୁ ସୁରକ୍ଷା ଦେବାର ସଙ୍ଗୀନ ଅଭିଯୋଗ ପରେ ଚୁପ ଥିଲେ ନବୀନ । ଏହାସହ ଶ୍ରମମନ୍ତ୍ରୀ ଥିବା ବେଳେ ଶ୍ରୀକାନ୍ତ ସାହୁ ନିଜ ଦଳର ନାରୀନେତ୍ରୀଙ୍କ ପ୍ରତି ବ୍ୟଭିଚାର ଅଭିଯୋଗର ନୀରବ ଦ୍ରଷ୍ଟା ସାଜିଥିଲେ ନବୀନ । ଯୌନ ଶୋଷଣ ଅଭିଯୋଗ ଥାଇ ବି ବିଧାୟକ ବିଜୟଶଙ୍କର ଦାସଙ୍କ ଉପରେ ହେଉନଥିଲା ଆକ୍ସନ ।

ଗତକାଲି ବିରୋଧୀ ଦଳ ନେତା କହିଥିଲେ କି, ରାଜ୍ୟରେ ବିପର୍ଯ୍ୟସ୍ତ ହେଲାଣି ଆଇନଶୃଙ୍ଖଳା ସ୍ଥିତି । ହେଲେ ନିଜେ ସରକାରରେ ଥିବା ବେଳେ ଏ ସବୁ ଅଭିଯୋଗରେ କି କାର୍ଯ୍ୟାନୁଷ୍ଠାନ ନେଇଛନ୍ତି ସେନେଇ କିନ୍ତୁ ନା ନବୀନ କିଛି ପ୍ରତିକ୍ରିୟା ଦେଲେ ନା ବିଜେଡି ପକ୍ଷରୁ କିଛି କୁହାଗଲା । ମୋଟ୍‌ ଉପରେ ବିଜେଡି ନେତାଙ୍କ ଅଭିଯୋଗ ଲିଷ୍ଟ ବହୁତ ଲମ୍ବା । ସେମାନଙ୍କ ବିରୋଧରେ ନୋ ଆକ୍ସନ, ଆଉ ଏବେ ନୂଆ ସରକାର ଆସୁ ଆସୁ କେମିତି ବିଗିଡିଗଲା ଆଇନଶୃଙ୍ଖଳା ତାହାକୁ ନେଇ ଉଠିଲାଣି ପ୍ରଶ୍ନ ।