ଆଜି ଜାତୀୟ କ୍ୟାନସର ସଚେତନତା ଦିବସ । ତିନି ବର୍ଷରେ ଏକ କୋଟି ୩୯ଲକ୍ଷରୁ ଅଧିକ ଲୋକଙ୍କ ସ୍କ୍ରିନିଂ କାଯାଇଛି । ଦେଶରେ ବାର୍ଷିକ ୮ଲକ୍ଷରୁ ଅଧିକ କ୍ୟାନସର ଆକ୍ରାନ୍ତ ଚିହ୍ନଟ ହେଉଥିବା ବେଳେ ରାଜ୍ୟରେ ୨୬ହଜାର ୬୬୬ଜଣ କ୍ୟାନସର ଆକ୍ରାନ୍ତ ଚିହ୍ନଟ ହୋଇଛନ୍ତି । ସଚେତନତା ପାଇଁ ବିଭିନ୍ନ ସ୍ଥାନରେ ଅଜି କାର୍ଯ୍ୟକ୍ରମ ରହିଛି ।
କ୍ୟାନସରର ଗଡ ସାଜିଛି ବରଗଡ଼। ହୁ ହୁ ହୋଇ ବଢୁଛି କ୍ୟାନ୍ସର ରୋଗୀଙ୍କ ସଂଖ୍ୟା। କେବଳ ବରଗଡ଼ ନୁହେଁ ସାରା ପଶ୍ଚିମ ଓଡ଼ିଶାରେ ଏବେ ଏହି ମାରାତ୍ମକ ବ୍ୟାଧିକୁ ନେଇ ବଢୁଛି ଚିନ୍ତା । ଗତ ତିନି ବର୍ଷ ଭିତରେ ଏକ କୋଟି ୩୯ ଲକ୍ଷରୁ ଅଧିକ ଲୋକଙ୍କ ସ୍କ୍ରିନିଂ କରାଯାଇଛି । ସେମାନଙ୍କ ମଧ୍ୟରୁ ୨୬ ହଜାର ୬୬୬ଜଣ କ୍ୟାନସର ଆକ୍ରାନ୍ତ ଚିହ୍ନଟ କରାଯାଇଛି । ତେବେ କାହିଁକି କ୍ୟାନ୍ସର ବଢୁଛି ଓ କେମିତି ଏହାକୁ ରୋକାଯାଇ ପାରିବ ସେନେଇ ଆଜି ଜାତୀୟ କ୍ୟାନ୍ସର ସଚେତନତା ଦିବସର କାର୍ଯ୍ୟକ୍ରମ ରହିଛି ।

ବରଗଡ ଜିଲ୍ଲାରେ କ୍ୟାନସର ରୋଗୀଙ୍କ ସଂଖ୍ୟା ବୃଦ୍ଧିକୁ ନେଇ ବଢୁଛି ଚିନ୍ତା । ରାଜ୍ୟରେ ଚିହ୍ନଟ ହୋଇଥିବା କ୍ୟାନସର ଆକ୍ରାନ୍ତଙ୍କ ମଧ୍ୟରୁ ୨୬.୩ ପ୍ରତିଶତ କେବଳ ବରଗଡ ଜିଲ୍ଲାରୁ । ବରଗଡ଼ରେ ବହୁଳ ମାତ୍ରାରେ ଚାଷ ଜମିରେ ସାର, କୀଟ ନାଶକ ବ୍ୟବହାର ପାଇଁ ଅଧିକ କ୍ୟାନ୍ସର ରୋଗୀଙ୍କ ସଂଖ୍ୟା ବଢୁଥିବା ଅନୁମାନ କରାଯାଉଛି। ଅନେକ କ୍ଷେତ୍ରରେ ଗୁଠଖା , ପାନ ମସଲା ,ସିଗାରେଟ, ତମାଖୁ କ୍ୟାନସର ବୃଦ୍ଧିର କାରଣ ପାଲଟିଛି । ଆଜି ଜାତୀୟ କ୍ୟାନସର ସଚେତନତା ଦିବସରେ ଏନେଇ ବିଭିନ୍ନ ସ୍ଥାନରେ ଆୟୋଜନ ହୋଇଛି କାର୍ଯ୍ୟକ୍ରମ । କ୍ୟାନସରକୁ କେମିତି ଚିହ୍ନିବା ଓ କେଉଁ ସମୟରେ ଚିକିତ୍ସା କଲେ ବାଜିମାତ୍ ହେବ ସେନେଇ ସଚେତନତା କରାଯାଉଛି ।

ଦେଶରେ ବାର୍ଷିକ ୮ଲକ୍ଷରୁ ଅଧିକ କ୍ୟାନସର ଆକ୍ରାନ୍ତ ଚିହ୍ନଟ ହେଉଛନ୍ତି । ସେମାନଙ୍କ ମଧ୍ୟରୁ ତମାଖୁ ବ୍ୟବହାର ଯୋଗୁଁ ୩୫ରୁ ୫୦ ପ୍ରତିଶତ ଆକ୍ରାନ୍ତ । ଜୀବନଶୈଳୀରେ ପରିବର୍ତ୍ତନ, ତମାଖୁ ବ୍ୟବହାର, ଖରାପ ଖାଦ୍ୟ ଅଭ୍ୟାସ ଓ କମ୍ ଶାରୀରିକ ଶ୍ରମ ଯୋଗୁଁ ବ୍ୟାପୁଛି କ୍ୟାନସର । ଏଥିପାଇଁ ବ୍ୟାପକ ସଚେତନତାର ରହିଛି ଆବଶ୍ୟକତା । ଲକ୍ଷଣ ଦେଖାଦେଲେ ଭୟଭୀତ ନହୋଇ ଡାକ୍ତରଙ୍କ ସହ ପରାମର୍ଶ କଲେ କ୍ୟାନସରଠାରୁ ମଧ୍ୟ ଜିତିହେବ ବୋଲି କ୍ୟାନ୍ସର ସର୍ଭାଇବର୍ ମତ ଦେଇଛନ୍ତି।

ବରଗଡ଼ ସହରର କ୍ୟାନ୍ସର ସର୍ଭାଇବର୍ ଅସୀମା ବିଷୋୟୀ ଓ ଜୟଶ୍ରୀ ପଣ୍ଡା । ଦୀର୍ଘ ବର୍ଷ ପୂର୍ବେ ଏମାନଙ୍କୁ ହୋଇଥିଲା କ୍ୟାନ୍ସର । ଆଉ ରୋଗ ଚିହ୍ନଟ ହେବା ପରେ ତୁରନ୍ତ ଡାକ୍ତରଙ୍କ ପରାମର୍ଶ ନେଇ ଆରମ୍ଭ କରିଥିଲେ ନିଜର ଚିକିତ୍ସା। କିଛି ବର୍ଷ ଧରି ଜୀବନ ଓ ମୃତ୍ୟୁର ସଂଘର୍ଷ ପରେ ପାଇଥିଲେ ନୂଆଁ ଜୀବନ। ଏବେ ସେମାନେ ଲୋକମାନଙ୍କୁ ଦେଉଛନ୍ତି ସଚେତନତାର ବାର୍ତ୍ତା ।

ଅଧିକ ପଢ଼ନ୍ତୁ ଓଡ଼ିଶା ଖବର...