ମୌସୁମୀ ଅଧିବେଶନର ୭ ଦିନର କାର୍ଯ୍ୟ ଦିବସରୁ ଧୋଇ ଗଲାଣି ୩ ଦିନ । ନିଜ ନିଜ ଅଂଚଳର ସମସ୍ୟା ଉପସ୍ଥାପନା ପାଇଁ ବିଧାନସଭା ଆସିଛନ୍ତି ବିଧାୟକ । ହେଲେ 4 ଦିନ ହେଲା ଗୃହ ଅଚଳ ରହିଛି । ସାର ପରେ ପଞ୍ଚାୟତରାଜ ବ୍ୟବସ୍ଥାରେ ଜନ ପ୍ରତିନିଧିଙ୍କ କ୍ଷମତା ସଙ୍କୁଚିତ ପ୍ରସଙ୍ଗ ଉଠାଇ ସୋମାବାର ଗୃହ ଭିତରେ ବିଜେଡି ବିଧାୟକ କରିଥିଲେ ହଟ୍ଟଗୋଳ ।

ବାରମ୍ବାର ନିଜ ଆସନକୁ ଯିବା ପାଇଁ ବାଚସ୍ପତିଙ୍କ ଅନୁରୋଧ ପରେ ବି ଶୁଣି ନଥିଲେ ବିଜେଡି ବିଧାୟକ । ସେପଟେ ଦୁଇ ଦିନ ହେଲା ବିଧାନସଭା ଚାଲି ପାରି ନଥିବାରୁ କଂଗ୍ରେସ ଉଠାଇଥିବା ଅନାସ୍ଥା ପ୍ରସ୍ତାବ ଉପରେ ଆଲୋଚନା ହୋଇପାରୁ ନଥିବାରୁ ବିଜେଡି-ବିଜେପି ଭାଇ ଭାଇ ପ୍ଲାଗ କାର୍ଡ ଧରି ନିଜ ଆସନରେ ଛିଡା ହୋଇ ପ୍ରତିବାଦ କରିଥିଲା କଂଗ୍ରେସ । ମାତ୍ର ୭ ମିନିଟ ଚାଲିବା ପରେ ଅପରାହ୍ନ ୪ଟା ପର୍ଯ୍ୟନ୍ତ ଗୃହକୁ ମୂଲତବି ଘୋଷଣା କରିଥିଲେ ବାଚସ୍ପତି ।

ଏହାପରେ ଅପରାହ୍ନରେ ସ୍ୱାଭାବିକ ହୋଇଥିଲା ଗୃହ । ଅନାସ୍ଥା ପ୍ରସ୍ତାବ ଗ୍ରହଣ କରିବାକୁ ବାଚସ୍ପତିଙ୍କୁ ଅନୁରୋଧ କରିଥିଲେ କଂଗ୍ରେସ ବିଧାୟକ ଦଳ ନେତା ରାମ ଚନ୍ଦ୍ର କାଡାମ । ବାଚସ୍ପତି କହିଥିଲେ 18 ତାରିଖ 12.47ରେ କଂଗ୍ରେସ ବିଧାୟକ ଦଳ ନେତାଙ୍କ ସହ ଅନ୍ୟ 14 ବିଧାୟକ ବିଧାନସଭା ସଚିବଙ୍କୁ ଅନାସ୍ଥା ନୋଟିସ ଦେଇଥିଲେ । ତା' ପରଦିନ ନୋଟିସକୁ ଗୃହକୁ ଆଣିବାକୁ ସେ ନିର୍ଦେଶ ଦେଇଥିଲେ । କିନ୍ତୁ ଗୃହ ସ୍ୱାଭାବିକ ନ ଥିବାରୁ ତାହା ଆସିପାରି ନଥିଲା । ସଂସଦୀୟ ନିୟମ ଅନୁସାରେ ଲଗାତାର ଭାବେ ବିଧାନସଭାରେ ଅଚଳାବସ୍ଥା ଥିବାରୁ ଅନାସ୍ଥାର ସମୟ ଅବଧି ସରି ଯାଇଛି । ଅନାସ୍ଥା ଅଗ୍ରାହ୍ୟ ପ୍ରତିବାଦରେ ଗାନ୍ଧୀ ମୂର୍ତ୍ତି ତଳେ ଧାରଣାରେ ବସିଥିଲେ କଂଗ୍ରେସ ବିଧାୟକ । ବୁଝାଇବାକୁ ପହଁଞ୍ଚିଥିଲେ ଶାସକ ଦଳର ବିଧାୟକ ।

ପ୍ରଥମ ଦିନ ଶୋକ ପ୍ରସ୍ତାବକୁ ବାଦ ଦେଲେ ଦ୍ଵିତୀୟ ଦିନ ହୋ ହାଲ୍ଲା ଭିତରେ ୮ ମିନିଟ୍ ଓ ତୃତୀୟ ଦିନ ୪ ମିନିଟ୍ ଚାଲିଥିଲା ଗୃହ କାର୍ଯ୍ୟ । ସୋମାବାର ପ୍ରଥମାର୍ଦ୍ଦରେ ନାରାବାଜି ଭିତରେ ୭ ମିନିଟ୍ ବିଧାନସଭା ଚାଲିପାରିଥିବାବେଳେ ଅପରାହ୍ନରେ କକ୍ଷତ୍ୟାଗ କରିଥିଲେ କଂଗ୍ରେସ ବିଧାୟକ । ଓଡିଶା ବିଶ୍ବବିଦ୍ୟାଳୟ ସଂଶୋଧନ ବିଲ୍ ନେଇ ଆଲୋଚନାରେ ଅଂଶଗ୍ରହଣ କରିଥିଲା ବିଜେଡି । ବିଧାନସଭା ଚାଲିଲେ ଦିନକୁ ପ୍ରାୟ ୭୦ ଲକ୍ଷ ଖର୍ଚ୍ଚ ହେଉଛି । ହେଲେ ହୋ ହାଲ୍ଲା ଓ ନାରାବାଜି ଯୋଗୁ ଆଲୋଚନା ହୋଇପାରୁନି ଲୋକଙ୍କ ସ୍ବାର୍ଥ ସମ୍ବଳିତ ପ୍ରସଙ୍ଗ ।

Argus News | argus news | Odisha Latest News, Breaking News, Trending News, Live TV