ଅର୍ଗସ ବ୍ୟୁରୋ: ତିନି ତିନୋଟି ରାଜ୍ୟରେ ବିଜେପି ନିର୍ବାଚନ ଜିତିବା ପରେ ଏବେ ଛାନିଆ ହେଲାଣି ବିଜେଡି । କାରଣ ଆପାତତଃ ସବୁ ଗଣମାଧ୍ୟମର ଏକଜିଟ୍‌ ପୋଲ ଆକଳନ କରିଥିଲା କି ପଡୋଶୀ ଛତିଶଗଡରେ କଂଗ୍ରେସ ଜିତିବ, ବିଜେପି ହାରିବ । ହେଲେ ଜନତା ଜନାର୍ଦ୍ଦନ ଯେମିତି ଭାବରେ ମୋଦି ସରକାରଙ୍କ ଯୋଜନା, ମୋଦିଙ୍କ ଗ୍ୟାରେଣ୍ଟିରେ ଖୁସି ହୋଇ ଭୋଟ୍‌ ଦେଲେ...ବିଜେପିକୁ ବିଜୟ କଲେ ତାହାକୁ କିନ୍ତୁ ସହଜରେ ଗ୍ରହଣ କରିପାରୁନାହାନ୍ତି ବିଜେଡି ନେତା । ଏମିତିକି ଟଙ୍କା ଖର୍ଚ୍ଚ ପରେ ବି ବିଜେପି ବିଜୟ ହୋଇଥିବାରୁ ରାଗରେ ରକ୍ତଚାଉଳ ଚୋବାଉଛନ୍ତି କାଳେ ପଶ୍ଚିମି ନେତା । ଏକଥା ଆମେ ନୁହେଁ ବରଂ ବିଜେପି ନେତା ପ୍ରଦୀପ ପୁରୋହିତ କହିଛନ୍ତି । ଯାହାକୁ ନେଇ ରାଜ୍ୟ ରାଜନୀତିରେ ସୃଷ୍ଟି ହୋଇଛି ଝଡ଼ ।

ପଶ୍ଚିମ ଓଡ଼ିଶାକୁ ଲାଗି ଛତିଶଗଡ ରହିଛି । ବିଧାନସଭା ନିର୍ବାଚନରେ ଓଡ଼ିଆ ଭୋଟରଙ୍କ ଭୋଟ ବି ବେଶ୍‌ ଚର୍ଚ୍ଚାରେ ଥିଲା । ଏମିତି ରାୟପୁରରେ ଜଣେ ଓଡ଼ିଆ ଛତିଶଗଡ ବିଧାନସଭାକୁ ନିର୍ବାଚିତ ବି ହେଲେ । କିନ୍ତୁ ପଡୋଶୀ ରାଜ୍ୟରେ କେମିତି ବିଜେପି କ୍ଷମତାଠୁ ଦୂରେଇ ରହୁ ସେନେଇ ବଡ ରଣନୀତି ପ୍ରସ୍ତୁତ କରିଥିଲା ଶାସକ ଦଳ । ସାଧାରଣ ନିର୍ବାଚନକୁ ଆଉ ମାତ୍ର ୪ ମାସ ବାକି ଥିବା ବେଳେ ସେମି ଫାଇନାଲର ସମର ଭିତରେ ବାଜି ମାରିଛି ବିଜେପି । କିନ୍ତୁ ବିଜେପିକୁ ହରାଇବାକୁ କାହିଁକି ବିଜେଡି ଟଙ୍କା ଲଗାଇଥିଲା ତାହାକୁ ନେଇ ଏବେ ସବୁଠି ଚର୍ଚ୍ଚା ।

ଦୀର୍ଘ ୨୩ ବର୍ଷର ସ୍ଥିର ସରକାରରେ ଅନେକ ଦୁର୍ନୀତି, ନିର୍ଯାତନାର କଥା ସାମ୍ନାକୁ ଆସିଛି । ଯୋଜନା ପରେ ଯୋଜନା ତ ହେଉଛି କିନ୍ତୁ ନିର୍ବାଚନରେ ନିଜ ଦମରେ ଜିତିବାର ଦମ୍ଭୋକ୍ତି ବିଜେଡି ପାଖରେ ଆଉ ବୋଧହୁଏ ନାହିଁ । ସେଇଥି ଲାଗି ବୋଧହୁଏ ପଡୋଶୀ ରାଜ୍ୟରେ ବି ବିଜେପି ସରକାର ନକରୁ ଚାହୁଁଛି ବିଜେଡି । ସେ ଯାହା ବି ହେଉ, ପୂରା ଦେଶରେ ଏବେ ମୋଦି ଲହର...ବିକାଶ ପାଇଁ ମୋଦିଙ୍କୁ ଭୋଟ୍‌ ଦେଉଛନ୍ତି ଜନତା । ସେଥିରୁ ଓଡ଼ିଆ ଭୋଟର ବାଦ୍‌ ହେବେ ବା କେମିତି ?

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV