ଅର୍ଗସ ବ୍ୟୁରୋ : ରାଜ୍ୟର ଆଇନଶୃଙ୍ଖଳା ପରିସ୍ଥିତି, ପ୍ରଶ୍ନ ପଚାରିବା ବିଜେଡି ଲାଗି ବୁମେରାଂ ହୋଇଛି । ନିଜ ଜାଲରେ ଛନ୍ଦି ହେବା ପରି ସ୍ଥିତି ଉପୁଜିଛି । କାରଣ ଗତକାଲି ଆଇନଶୃଙ୍ଖଳା ପ୍ରସଙ୍ଗରେ ମୁଲତବୀ ପ୍ରସ୍ତାବ ଆଣିଥିଲା ବିଜେଡି । ବାସ୍‌ ଏହାପରେ ବିଜେଡିକୁ ନିଜ କଲା କର୍ମର ଆଇନା ଦେଖାଇ ବିଜେପି ବିଧାୟକ କଲେ କାଉଣ୍ଟର ଆଟାକ୍ । ଆଇନଶୃଙ୍ଖଳା ପ୍ରସଙ୍ଗରେ ମୁଲତବୀ ଆଣି ବିଜେଡି କହିଥିଲା, ଆମ ସରକାର ଅମଳରେ ଘଟଣାକୁ ଚପାଇ ଦିଆଯାଉନଥିଲା । ମାମଲା ସଂଖ୍ୟା ବଢୁଥିଲା ସତ କିନ୍ତୁ ପୋଲିସ ଉପରେ ସମସ୍ତଙ୍କର ଭରସା ଥିଲା । କିନ୍ତୁ ଏଠାରେ ପ୍ରଶ୍ନ, ଯଦି ତଦନ୍ତ ଠିକ୍‌ରେ ହେଉଥିଲା ତାହାଲେ ପରୀ, ପିହୁ, ମମିତା, ବେବିନା, କୁନ୍ଦୁଲି ଓ ମାହାଙ୍ଗା ମର୍ଡରରେ କାହିଁକି ଶାସକ ଦଳର ନେତାଙ୍କୁ ଘଂଟ ଘଉଡାଉଥିଲା ପୋଲିସ ? 

ଆଇନଶୃଙ୍ଖଳା ପରିସ୍ଥିତିକୁ ନେଇ ବିଧାନସଭାରେ ଶାସକ-ବିରୋଧୀ ମୁହାଁମୁହିଁ । କେମିତି ସଠିକ୍‌ରେ ଲୋକେ ସୁରକ୍ଷା ପାଇବେ ସେନେଇ ଶାସକ ଦଳ ସବୁ ପ୍ରକାର ବ୍ୟବସ୍ଥା କରୁଛି । ହେଲେ ବିଜେଡି କହୁଛି ଆଇନଶୃଙ୍ଖଳା ପରିସ୍ଥିତି ଠିକ୍‌ ନାହିଁ । ସେପଟେ, ବିଜେଡିର ମୁଲତବୀ ପ୍ରସ୍ତାବକୁ ଜୋରଦାର କାଉଣ୍ଟର କରିଥିଲେ ବିଜେପି ବିଧାୟକ ଟଙ୍କଧର ତ୍ରିପାଠୀ । କହିଥିଲେ, ବିଜେଡି ଶାସନରେ ଆଇନ ତା' ବାଟରେ ଯିବାର ଅର୍ଥ ଥିଲା ଅଭିଯୁକ୍ତକୁ ସୁରକ୍ଷା ଦେବା କିନ୍ତୁ ବର୍ତ୍ତମାନ ଆଇନ ତା' ବାଟରେ ଯିବା ଅର୍ଥ ଅଭିଯୁକ୍ତ ତୁରନ୍ତ ଗିରଫ । କିନ୍ତୁ ତତ୍କାଳୀନ ସରକାର ଅଭିଯୁକ୍ତକୁ ସୁରକ୍ଷା ଦେଉଥିଲା । ଏପରିକି ବିଜେଡି ସରକାର ଥିବା ବେଳେ ଗୃହ ରାଷ୍ଟ୍ରମନ୍ତ୍ରୀଙ୍କ ବିରୋଧରେ ଅଭିଯୋଗ ଆସିଥିଲେ ବି ତାଙ୍କୁ ସୁରକ୍ଷା ଦିଆଯାଇଥିଲା । ଓଲଟି ତାତ୍ସଲ୍ୟ କରି କହିଥିଲେ, ଯେଉଁ ସରକାରରେ କ୍ୟାବିନେଟ୍‌ ମନ୍ତ୍ରୀଙ୍କୁ ସୁରକ୍ଷା ଦିଆଯାଉପାରୁନି ସେଇଠି ସାଧାରଣ ଜନତା କେତେ ସୁରକ୍ଷିତ ତାହା ସ୍ପଷ୍ଟ ଭାବରେ ଜଣାଯାଉଛି ।

୨୪ ବର୍ଷର ସ୍ଥିର ସରକାର, ସ୍ଥିର ମୁଖ୍ୟମନ୍ତ୍ରୀ । ହେଲେ ବି ଆଇନଶୃଙ୍ଖଳା ପରିସ୍ଥିତି ଯେଉଁପରି ଭାବରେ ରହିଥିଲା ସେଥିରୁ ଗୋଟିଏ କଥା ସ୍ପଷ୍ଟ ଥିଲା ବିଜେଡି ଅପରାଧୀଙ୍କୁ ଦେଉଥିଲା ସୁରକ୍ଷା । ସେଇଥି ଲାଗି ତ ଅପରାଧ ଭୟଙ୍କର ଭାବରେ ବଢିଥିଲା । ମୋଟ୍‌ ଉପରେ ଗୃହରେ, ବିଜେଡି ଶାସନରେ ଅପରାଧର ଚିଠା ଖୋଲି ବିରୋଧୀ ଦଳକୁ ସରକାରୀ ପକ୍ଷ କରିଥିଲେ ଜୋରଦାର ଆଟାକ୍ । ଫଳରେ ଆଇନଶୃଙ୍ଖଳା ପ୍ରସଙ୍ଗରେ ମୁଲତବୀ ଆଣି ଫସି ଯାଇଥିଲା ବିଜୁ ଜନତା ଦଳ। ସଂସଦୀୟ ବ୍ୟାପାର ମନ୍ତ୍ରୀ ଜବାବ ରଖି କହିଥିଲେ, ଅପରାଧୀଙ୍କ ବିରୋଧରେ ଶୂନ୍ୟ ସହିଷ୍ଣୁତା ନୀତି ଗ୍ରହଣ କରୁଛନ୍ତି ସରକାର। ଦୁଷ୍ଠାନ୍ତ ମୂଳକ କାର୍ଯ୍ୟାନୁଷ୍ଠାନ ହେଉଛି । ସୁରକ୍ଷା ଦେବା ଓ ତୋରିତ ନ୍ୟାୟ ପ୍ରଦାନ ପାଇଁ ସରକାର ସଂକଳ୍ପ ବଦ୍ଧ ।

(ଭୁବନେଶ୍ଵରରୁ ପ୍ରଦୀପ୍ତ ମହାପାତ୍ରଙ୍କ ସହ ଦିବ୍ୟଜ୍ୟୋତି ମହାନ୍ତିଙ୍କ ରିପୋର୍ଟ)