ରାହୁଲଙ୍କ ଗସ୍ତକୁ ନେଇ ଟାର୍ଗେଟ୍ କରିଛି ବିଜେପି । ବିଜେପି କହିଛି ଏହା ସମ୍ବିଧାନ ବଞ୍ଚାଅ ନୁହେଁ, କଂଗ୍ରେସ ବଞ୍ଚାଅ ପାଇଁ ସମାବେଶ ଥିଲା । ଦିନକୁ ଦିନ କମୁଛି କଂଗ୍ରେସର ଲୋକପ୍ରିୟତା । କଂଗ୍ରେସ ନିଜର ସତ୍ତା ହରାଇଛି । ଅସ୍ତଗାମୀ ଦଳ ନିଜର ଅସ୍ତିତ୍ୱ ବଞ୍ଚେଇବାକୁ ଏହା ଏକ ପ୍ରୟାସ ବୋଲି କହିଛି ବିଜେପି । କଂଗ୍ରେସ ଆଜି ଓଡ଼ିଶାର ସାଧାରଣ ଲୋକଙ୍କଠାରୁ ଦୂରେଇ ଯାଇଛି । ଲୋକସଭାରେ କଂଗ୍ରେସ ସାଂସଦଙ୍କ ସଂଖ୍ୟା ୩ ଅଙ୍କ ମଧ୍ୟ ଛୁଇଁନି । ଦିନକୁ ଦିନ କଂଗ୍ରେସ ତଳକୁ ତଳ ଯାଉଛି । କଂଗ୍ରେସ ଦଳ ପରିବାରବାଦ ଉପରେ ପର୍ଯ୍ୟବେଷିତ । ବିଗତ ସମୟରେ ବାପା-ଝିଅ, ମା-ପୁଅ, ସ୍ୱାମୀ-ସ୍ତ୍ରୀଙ୍କ ଦଳ ଥିଲା କଂଗ୍ରେସ । ଏବେ ମା- ପୁଅ- ଝିଅ, ଜ୍ୱାଇଁରେ କଂଗ୍ରେସ ଦଳ ଚାଲିଛି ବୋଲି କହିଛି ବିଜେପି ।

ପ୍ରତି ନିର୍ବାଚନରେ କଂଗ୍ରେସର ଭୋଟ ହାର କମୁଛି । ଗତ ୩ ଥରର ସାଧାରଣ ନିର୍ବାଚନରେ ସାଂସଦ ସଂଖ୍ୟା ୩ ଅଙ୍କ ମଧ୍ୟ ଛୁଇଁ ନାହିଁ। ଏମରଜେନ୍ସି ଲଗାଇଥିଲା କଂଗ୍ରେସ । ସମ୍ବିଧାନ ଦଳି ମକଚି ଦେଇଥିଲେ । କଂଗ୍ରେସ ସମ୍ବିଧାନର ମୁଖବନ୍ଧକୁ ମଧ୍ୟ ବନ୍ଦ କରିଥିଲା । କଂଗ୍ରେସ ଦଳ ସବୁ ସମୟରେ ସମ୍ବିଧାନର ଅପବ୍ୟବହାର କରିଥିବା ଦଳ । ୩୫୬ ଧାରା ଉଦାହରଣ ଦେଲା ବିଜେପି।

ସେହିଭଳି ରାହୁଲ ଗାନ୍ଧୀ ଓ କଂଗ୍ରେସକୁ ସମାଲୋଚନା କଲେ ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀ । ରାହୁଲ ଗାନ୍ଧୀଙ୍କୁ ଓଡ଼ିଶାର ଯୁବପିଢ଼ି ଗ୍ରହଣ କରନ୍ତି ନାହିଁ, ତେଣୁ ତାଙ୍କ ଗସ୍ତର କୌଣସି ପ୍ରଭାବ ପଡ଼ିବ ନାହିଁ । ସେ ଜଣେ ରାଜନୀତିରେ ଟାଇମ୍ ପାସ କରୁଥିବା ନେତା । କଂଗ୍ରେସ ଆଜି ସମ୍ବିଧାନ ବଞ୍ଚାଅ ଓ ନାରୀ ସୁରକ୍ଷାର ନାରା ଦେଉଛି, ହେଲେ ସମ୍ବିଧାନକୁ ସର୍ବାଧିକ ବେଖାତିର ଓ ଅସମ୍ମାନ କରିଥିବା ଦଳ ହେଉଛି କଂଗ୍ରେସ । ଏହା ଛଡ଼ା କଂଗ୍ରେସ ନେତାମାନଙ୍କର ମହିଳା ଓ ସାଧାରଣ ଜନତା ପ୍ରତି ଦୁର୍ବ୍ୟବହାର କାହାକୁ ଅଛପା ନାହିଁ । ତେଣୁ ଓଡ଼ିଶାବାସୀ ମଧ୍ୟ କଂଗ୍ରେସ ମୁକ୍ତ ଭାରତରେ ସାମିଲ ହୋଇଛନ୍ତି ବୋଲି କହିଛନ୍ତି ବିଧାୟକ ଟଙ୍କଧର ତ୍ରିପାଠୀ ।

ଭୁବନେଶ୍ୱରରେ ଆଜି କଂଗ୍ରେସ ବିରାଟ ସମାବେଶ କରିଥଲାି । ହଜାର ହଜାର କର୍ମୀଙ୍କ ସମାଗମ ଦେଖିବାକୁ ମିଳିଥିଲା । କଂଗ୍ରେସର ‘ସମ୍ବିଧାନ ବଞ୍ଚାଅ ସମାବେଶ’ରେ ବିରୋଧୀ ଦଳ ନେତା ରାହୁଲ ଗାନ୍ଧି ସମ୍ବୋଧନ କରିଥିଲେ । ଓଡ଼ିଶାର କଂଗ୍ରେସ କର୍ମକର୍ତ୍ତାଙ୍କୁ ବବର୍ ସେର କହିଲେ ରାହୁଲ । ଓଡ଼ିଶାର ଜଳ, ଜଙ୍ଗଲ, ଜମି ଆଦିବାସୀଙ୍କ ସମ୍ପତ୍ତି । ତାଙ୍କ ଜମିକୁ ଜବର ଦଖଲ କରାଯାଇଛି । ଓଡ଼ିଶା ଜନ ସାଧାରଣଙ୍କ ବିକାଶ ହେବା ଦରକାର । ବିକାଶ କେବଳ କିଛି ପୁଞ୍ଜିପତିଙ୍କ ହେବା ଠିକ ନୁହେଁ ।

ରାଜ୍ୟରେ ବିଜେପି ସରକାର ଆସିବା ପରେ ଏହା ରାହୁଲଙ୍କ ପ୍ରଥମ ଓଡ଼ିଶା ଗସ୍ତ । ସଭା ସରିବା ପରେ ଚାଷୀଙ୍କର ଦୁଇଟି ପ୍ରତିନିଧି ଦଳକୁ ସାକ୍ଷାତ କରିଛନ୍ତି । ତାପରେ କଂଗ୍ରେସ ଭବନରେ ରାଜନୈତିକ ବ୍ୟାପାର କମିଟି ସହ ବୈଠକ କରିଛନ୍ତି । ଶେଷରେ ବିଧାୟକ ଓ ପିସିସି କାର୍ଯ୍ୟକର୍ତ୍ତାଙ୍କ ସହ ଆଲୋଚନା ହେବ । ସନ୍ଧ୍ୟା ୫ଟାରେ ଦିଲ୍ଲୀ ଫେରିଛନ୍ତି ରାହୁଲ ।