ଅର୍ଗସ ବ୍ୟୁରୋ: ଓଡ଼ିଶାର ନୂଆପଡା ଜିଲ୍ଲା ସୀମାନ୍ତ ଓ ପଡ଼ୋଶୀ ଛତିଶଗଡ଼ର ଗରିଆବନ୍ଧ ଜିଲ୍ଲାରେ ଚାଲିଥିବା ଜୋରଦାର ମାଓ ବିରୋଧୀ ଅପରେସନରେ ମିଳିଛି ସୁରକ୍ଷା ବାହିନୀଙ୍କୁ ମିଳିଛି ବଡ଼ ସଫଳତା । ୨ ଦିନରେ ନିପାତ ହେଲେଣି ୧୬ ନକ୍ସଲ । ଏମାନଙ୍କ ମଧ୍ୟରେ ଅଛନ୍ତି 2 ଜଣ ମହିଳା କ୍ୟାଡର ମାଓବାଦୀ । ବଡ଼ କଥା ହେଲା ଏନ୍‌କାଉଣ୍ଟରରେ ଟଳିଛି ଓଡ଼ିଶା କ୍ୟାଡର ସେଣ୍ଟ୍ରାଲ କମିଟି ସଦସ୍ୟ ଜୟୀରାମ । ଇଏ ସେହି ହାର୍ଡକୋର ମାଓବାଦୀ ଯାହାକୁ ଧରାଇବାକୁ ଘୋଷଣା ହୋଇଥିଲା ୧ କୋଟିରୁ ଅଧିକ ଟଙ୍କାର ପୁରସ୍କାର । ଛତିଶଗଡ଼ ଉପମୁଖ୍ୟମନ୍ତ୍ରୀ ବିଜୟ ଶର୍ମା କହିଛନ୍ତି ନକ୍ସଲ ଅପରେସନ ଇତିହାସରେ ସେଣ୍ଟ୍ରାଲ୍ କମିଟି ସଦସ୍ୟ ନିହତ ହେବା ଇଏ ପ୍ରଥମ ଘଟଣା । ପୂର୍ବରୁ ଛତିଶଗଡ଼ରେ ହୋଇଥିବା ଏନକାଉଣ୍ଟରରେ ହାର୍ଡକୋର ମାଓବାଦୀ ଦାମୋଦରର ମୃତ୍ୟୁ ହୋଇଥିଲା। ଯାହା ନାଁରେ ଥିଲା ୫୦ଲକ୍ଷର ପୁରସ୍କାର । ସେହିପରି ଛତିଶଗଡ଼ ମୁଖ୍ୟମନ୍ତ୍ରୀ କହିଛନ୍ତି, ଶେଷ ନିଃଶ୍ବାସ ନେଉଛି ମାଓବାଦ।

ଛତିଶଗଡ଼ର କୁଲାରିଘାଟ ସଂରକ୍ଷିତ ଜଙ୍ଗଲରେ ବହୁ ମାଓବାଦୀ ଥିବା ଜାନୁଆରୀ 19ରେ ମିଳିଥିଲା ଗୁଇନ୍ଦା ସୂଚନା । ଓଡିଶା ନୂଆପଡା ସୀମାନ୍ତଠାରୁ 5 କିଲୋମିଟର ଦୂରରେ ରହିଛି ଏହି ଜଙ୍ଗଲ । ଯେଉଁଠି ମିଳିତ ଅଭିଯାନ ଚଳାଇଛନ୍ତି ଓଡ଼ିଶା ଓ ଛତିଶଗଡ଼ ପୋଲିସ । ଘଟଣାସ୍ଥଳରୁ ବିପୁଳ ପରିମାଣର ଅସ୍ତ୍ରଶସ୍ତ୍ର, AK-47, SLR, INSAS ଜବତ ହୋଇଛି ।

ନକ୍ସଲ ମୁକ୍ତ ଭାରତ ନିର୍ମାଣ କ୍ଷେତ୍ରରେ ସୁରକ୍ଷାକର୍ମୀଙ୍କର ଇଏ ବଡ଼ ସଫଳତା ବୋଲି ସୋସିଆଲ୍ ମିଡିଆରେ କହିଛନ୍ତି କେନ୍ଦ୍ର ଗୃହମନ୍ତ୍ରୀ । ଅମିତ୍ ଶାହ ଲେଖିଛନ୍ତି ଦେଶରେ ଶେଷ ନିଃଶ୍ବାସ ନକ୍ସଲବାଦ ।

2026 ମାର୍ଚ୍ଚ ସୁଦ୍ଧା ସାରା ଦେଶରୁ ମାଓବାଦର ମୂଳୋତ୍ପାଟନ ପାଇଁ ଆହ୍ବାନ ଦେଇଛନ୍ତି କେନ୍ଦ୍ର ଗୃହମନ୍ତ୍ରୀ । କିଛି ଦିନ ପୂର୍ବରୁ ଓଡ଼ିଶାରେ ଅନୁଷ୍ଠିତ ଡିଜି ସମ୍ମିଳନୀରେ ଏଥିପାଇଁ ପ୍ରସ୍ତୁତ ହୋଇଛି ଚୂଡ଼ାନ୍ତ ରଣନୀତି । ମୋଦି ସରକାରର 10 ବର୍ଷରେ ଦେଶରେ 53 ପ୍ରତିଶତ କମିଛି ନକ୍ସଲ ହିଂସା । 2004ରୁ14 ମଧ୍ୟରେ ଦେଶରେ 16 ହଜାର 463 ନକ୍ସଲ ହିଂସା ହୋଇଥିବାବେଳେ, ଗତ 10 ବର୍ଷରେ ଏହା 7 ହଜାର 700କୁ କମିଛି ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | Odisha Latest News, Breaking News, Trending News, Live TV