ଏଥର ଓଡ଼ିଶାରେ ଶୀତ ପ୍ରବଳ ଥରାଇଲାଣି । ଶୀତ ଯେମିତିକୁ କୁହୁଡ଼ି ବି ସେମିତି ପିଛା ଛାଡ଼ୁନି । ପାଣିପାଗ ବିଭାଗର ବିସ୍ତାରିତ ଆକଳନ କହୁଛି, ଜାନୁଆରୀ ମାସରେ ବି ଜୋର ଶୀତ ସମ୍ଭାବନା ରହିଛି ଓଡ଼ିଶାରେ । ବର୍ତ୍ତମାନ ରାତି ତାପମାତ୍ରା ଦୁଇଦିନ ପାଇଁ ସାମୟିକ ଭାବେ କମିବ । ରାତି ତାପମାତ୍ରା ପୁଣି ୨ରୁ ୩ ଡିଗ୍ରୀ ବଢ଼ିପାରେ । ୨-୩ ଦିନ ଅପରିବର୍ତ୍ତିତ ରହିବା ପରେ ପୁଣି ରାତି ତାପମାତ୍ରା ଖସିବ । ଶୀତ ବଢ଼ିବ ।
ପାଣିପାଗର ବିସ୍ତାରିତ ଆକଳନ କହୁଛି, ଆଗାମୀ ସପ୍ତାହରେ (୮ରୁ ୧୪ ତାରିଖ ମଧ୍ୟରେ) ଆଭ୍ୟନ୍ତରୀଣ ଓଡ଼ିଶାରେ ଶୀତ ଲହରି ଫେରିପାରେ । ଜାନୁଆରୀରେ ଓଡ଼ିଶାରେ ସର୍ବନିମ୍ନ ତାପମାତ୍ରା ଯେତିକି ରହିବା କଥା, ତା’ଠାରୁ କମ୍ ରହିବା ସମ୍ଭାବନା ଅଛି ।ଓଡ଼ିଶାରେ ଚଳିତ ଶୀତ ଋତୁରେ ସର୍ବାଧିକ କୁହୁଡ଼ି ହୋଇଛି । ଡିସେମ୍ବରର ୩୧ ଦିନ ମଧ୍ୟରେ ୨୬ଦିନ ଓଡ଼ିଶାରେ କୁହୁଡ଼ି ହୋଇଛି । ଏହା ଦେଶରେ ସର୍ବାଧିକ ।

ଗୁରୁବାର ସାଢ଼େ ୧୧ଟାବେଳେ ଭୁବନେଶ୍ୱର ତାପମାତ୍ରା ମାତ୍ର ୨୦ ଡିଗ୍ରୀ ସେଲସିୟସ୍ ଥିଲା । ଏହା ସ୍ୱାଭାବିକଠାରୁ ପ୍ରାୟ ୪ ଡିଗ୍ରୀ କମ୍ । ଏଥିଯୋଗୁ ଦିନବେଳା ବି ଭୀଷଣ ଶୀତ ଅନୁଭୂତ ହେଉଛି । ବାହାର ଅପେକ୍ଷା ଘରେ ବେଶି ଥଣ୍ଡା ଲାଗୁଛି । କାରଣ ଖରା ଟାଣ ହେଉନଥିବାରୁ ଘରର କାନ୍ଥ, ଚଟାଣ ସବୁବେଳେ କାଲୁଆ ରହୁଛି । ଏପରିକି ପାଣି ଟାଙ୍କିର ଟ୍ୟାପ ଖୋଲିଲେ ଅହରହ ଥଣ୍ଡା ପାଣି ବାହାରୁଛି।

ନବବର୍ଷର ପ୍ରଥମ ଦିନରୁ ହିଁ ଉତ୍ତରଭାରତର ଅଧିକାଂଶ ଅଂଚଳରେ ଭୀଷଣ ଶୀତ ଲହର ଜାରି ରହିଛି। କାଶ୍ମୀରରେ ପ୍ରବଳ ତୁଷାରପାତ ହୋଇଥିବା ବେଳେ ଦିଲ୍ଲୀ ଛଅ ବର୍ଷର ରେକର୍ଡ ଭାଙ୍ଗି ଡିସେମ୍ବରରେ ସବୁଠାରୁ ଶୀତଳ ଦିନ ଅନୁଭବ କରିଛି। ଭାରତୀୟ ପାଣିପାଗ ବିଭାଗ (ଆଇଏମ୍‌ଡି) ପୂର୍ବାନୁମାନ କରିଛି ଯେ ଦିଲ୍ଲୀ-ଏନ୍‌ସିଆର୍, ପଞ୍ଜାବ ଓ ହରିୟାଣାରେ ଶୀତର ପ୍ରକୋପ ଆହୁରି ବଢ଼ିବ।

ଉତ୍ତର-ପଶ୍ଚିମ ଭାରତରେ ପୂର୍ବ ଦିଗରୁ ପ୍ରବଳ ବାୟୁ ପ୍ରବାହ ଯୋଗୁଁ ରାଜସ୍ଥାନର ଉତ୍ତର-ପଶ୍ଚିମରେ ମେଘୁଆ ପାଗ ଏବଂ ବଜ୍ରପାତ ହେବା ସମ୍ଭାବନା ରହିଛି। ଏହା ଦିଲ୍ଲୀ-ଏନ୍‌ସିଆର୍, ହରିୟାଣା ଓ ପଞ୍ଜାବକୁ ପ୍ରଭାବିତ କରିବ। ଜାନୁଆରି ୩ରୁ ହିମାଳୟରୁ ଆସିବାକୁ ଥିବା ଅଧିକ ଥଣ୍ଡା ବାୟୁ ଯୋଗୁଁ ଦିଲ୍ଲୀର ସର୍ବନିମ୍ନ ତାପମାତ୍ରା ଆହୁରି ଖସିବ। ଡିସେମ୍ବର ୩୧ରେ ଦିଲ୍ଲୀର ସର୍ବାଧିକ ତାପମାତ୍ରା ୧୪.୨ ଡିଗ୍ରି ସେଲ୍‌ସିୟସ୍ ରହିଥିଲା, ଯାହା ଛଅ ବର୍ଷରେ ସର୍ବନିମ୍ନ। ଏହା ପୂର୍ବରୁ ଡିସେମ୍ବର ୩୧, ୨୦୧୯ରେ ସର୍ବାଧିକ ତାପମାତ୍ରା ୯.୪ ଡିଗ୍ରି ସେଲ୍‌ସିୟସ୍ ଥିଲା। ରାଜଧାନୀରେ ଘନ ଧୂଆଁ କୁହୁଡ଼ିର ଆସ୍ତରଣ ଦେଖିବାକୁ ମିଳିଥିବା ବେଳେ ବାୟୁ ଗୁଣବତ୍ତା ‘ଅତ୍ୟନ୍ତ ଖରାପ’ ରହିଛି।

ହିମାଚଳ ପ୍ରଦେଶର କୁଲୁ ଜିଲ୍ଲାର ରୋହତାଙ୍ଗ ପାସ୍, ଲାହୁଲ୍ ଓ ସ୍ପିଟିରେ ହାଲୁକା ତୁଷାରପାତ ହୋଇଛି। ସିମଲା, ମନାଲି, ଧରମଶାଲା, କସୌଲି ଓ ଡାଲହାଉସି ଭଳି ପର୍ଯ୍ୟଟନ ସ୍ଥଳରେ ତୁଷାରପାତ ନହେବାରୁ ପର୍ଯ୍ୟଟକମାନେ ନିରାଶ ହୋଇଛନ୍ତି। ଆଇଏମ୍‌ଡି ଆଗାମୀ ଦୁଇ ଦିନରେ ହାଲୁକା ତୁଷାରପାତ ଓ ବର୍ଷାର ପୂର୍ବାନୁମାନ କରିଛି। କାଶ୍ମୀରର ଗୁରେଜ୍, ଗୁଲମାର୍ଗ ଓ ସୋନମାର୍ଗରେ ନୂଆ ବରଫ ପଡ଼ିଛି। ଏହା ‘ଚିଲ୍ଲାଇ-କଲାନ୍’ ଅବଧିରେ ଘଟିଛି, ଯାହା ୪୦ ଦିନର କଠୋର ଶୀତର ସମୟ। ଗୁଲମାର୍ଗର ସର୍ବନିମ୍ନ ତାପମାତ୍ରା ୩ ଡିଗ୍ରି ସେଲ୍‌ସିୟସ୍, ଶ୍ରୀନଗରର ୨.୩ ଡିଗ୍ରି ସେଲ୍‌ସିୟସ୍ ଓ ପାହଲଗାମର -୨ ଡିଗ୍ରି ସେଲ୍‌ସିୟସ୍ ରହିଛି।