ଅର୍ଗସ ବ୍ୟୁରୋ:  ଓଡ଼ିଶାରେ ଏବେ ପ୍ରବାସୀ ଭାରତୀୟ ସମ୍ମିଳନୀ ଫିଭର । ସନ୍ଧ୍ୟା ହେଲେ ଝଲସୁଛି ମନ୍ଦିର ମାଳିନୀ ଭୁବନେଶ୍ବର ସମେତ ପୁରୀ ସହର । ଆଉ ଦିନ ତମାମ ଦୁଲୁକୁଛି ଜନତା ମଇଦାନ । ଆଉ ବିଶ୍ବର କୋଣ ଅନୁକୋଣରୁ ଆସିଥିବା ଅତିଥିମାନେ ଓଡ଼ିଆ ସଂସ୍କୃତି ଓ ଖାଦ୍ୟପେୟ ସହ ଆତିଥ୍ୟତାକୁ ଭୁରି ଭୁରି ପ୍ରଶଂସା କରୁଛନ୍ତି । ଏହି ସମାରୋହ ସେମାନଙ୍କୁ ଏକାଠି ହେବାର ନିଆରା ସୁଯୋଗ ଦେଇଥିବା ବେଳେ, ସେମାନଙ୍କ ଖୁସିକୁ ଦେଖିଲେ ଲାଗୁଛି, ସେମାନେ ଅତିଥି ଭାବେ ନୁହେଁ, ସତେକି ବହୁଦିନ ପରେ ନିଜ ଘରକୁ ଫେରିଛନ୍ତି । ବିଦେଶରେ ରହୁଥିଲେ ବି ମନରୁ ଲିଭିନି ଜନ୍ମମାଟିର ମୋହ ଓ ମହକ ।

ଅନ୍ୟପଟେ ଜନତା ମଇଦାନ ଏବେ ମିନି ଗ୍ଲୋବ ପାଲଟିଛି । କିଏ ଆମେରିକାରୁ ଆସିଛି ତ କିଏ ଆଫ୍ରିକାରୁ । କିଏ ମଧ୍ୟପ୍ରାଚ୍ୟରୁ ଆସିଛି ତ କିଏ ପାଶ୍ଚାତ୍ୟ ଦେଶରୁ। ନିଜ ମାଟିକୁ ଆସି ଖୁସିରେ ଝୁମୁଛନ୍ତି ପ୍ରବାସୀ। ନାଚଗୀତରେ ମସଗୁଲ୍ ଅଗଣିତ NRI । କିଏ ମରିସସ୍ ରୁ ଆସିଛି, କିଏ ପୋଲାଣ୍ଡରୁ । କିଏ କାଲିଫର୍ଣ୍ଣିଆରୁ, ଆଉ କିଏ ଓମାନରୁ। ହେଲେ ନିଜକୁ ଜଣେ ଜଣେ ଗର୍ବିତ ଭାରତୀୟ ଭାବେ ପରିଚୟ ଦେବାକୁ କିଏ ପଗଡ଼ି ବାନ୍ଧିଛି, କିଏ ଶାଢ଼ୀ ପିନ୍ଧିଛି ତ ଆଉ କାହା ହାତରେ ରହିଛି ତ୍ରିରଙ୍ଗା । ମରିସସ୍‌ରୁ ସର୍ବାଧିକ ପ୍ରାୟ ୩ଶହ ପ୍ରବାସୀ ଆସିଥିବା ଜଣାପଡ଼ିଛି ।

ଅନ୍ୟପଟେ ପ୍ରବାସୀଙ୍କ ପାଇଁ ବିଭିନ୍ନ ଅଥେଣ୍ଟିକ୍ ଓଡ଼ିଆ ଖାଦ୍ୟ ପ୍ରସ୍ତୁତ କରାଯାଇଥିବା ବେଳେ, ଅନେକଙ୍କୁ ବେଶି ପସନ୍ଦ ଆସୁଛି ଖେଚୁଡ଼ି ଓ ଡାଲମା। ତେବେ ସେ ସୁଆଦ କଥା ହେଉ କି ସଂସ୍କୃତି... ପର୍ଯ୍ୟଟନ ହେଉ କି ଲୋକଙ୍କ ଆଚରଣ । ସମସ୍ତଙ୍କ ମୁହଁରେ ଓଡ଼ିଶାର, ଓଡ଼ିଆଙ୍କ ଭୁରି ଭୁରି ପ୍ରଶଂସା ।

ଅଧିକ ପଢ଼ନ୍ତୁ ଓଡିଶା ଖବର: