ମହାନଦୀରେ ବିଗତ ଦିନରେ ଉପରମୁଣ୍ଡରେ ବର୍ଷା ହେବା ଯୋଗୁଁ ଅଧିକ ଜଳ ପଶିଛି । ହୀରାକୁଦର ୧୬ଟି ଗେଟ୍ ଦେଇ ବନ୍ୟା ଜଳ ନିଷ୍କାସନ ହେଉଛି । ୩ ଲକ୍ଷ ୮୫ ହଜାର କ୍ୟୁସେକ୍ ପ୍ରବେଶ, ୪ ଲକ୍ଷ ୨୪ ହଜାର କ୍ୟୁସେକ୍ ନିଷ୍କାସିତ ହେଉଛି । ଆସନ୍ତାକାଲି ସନ୍ଧ୍ୟା ୬ଟାରେ ୫.୫୦ ଲକ୍ଷ କ୍ୟୁସେକ୍ ବନ୍ୟା ଜଳ ମୁଣ୍ଡଳୀକୁ ଆସିବ ।. ଫଳରେ ମହାନଦୀରେ ଛୋଟ ଧରଣର ବନ୍ୟା ଆସିବ । ନଦୀ ଅବବାହିକା ତଳିଆ ଅଞ୍ଚଳରେ ପାଣି ପଶିବ । ଏଥିପାଇଁ ଜିଲ୍ଲା ପ୍ରଶାସନକୁ ଆଲର୍ଟ ରହିବାକୁ ନିର୍ଦ୍ଦେଶ ଦିଆଯାଇଛି । ସେହିପରି ରେଙ୍ଗାଲିର ଦୁଇଟି ଗେଟ୍ ଦେଇ ବ୍ରାହ୍ମଣୀ ଜଳ ନିଷ୍କାସନ ହେଉଛି । ଜଳକା, ବୈତରଣୀ, ବୁଢାବଳଙ୍ଗ, ସୁବର୍ଣ୍ଣରେଖା ଓ ବ୍ରାହ୍ମଣୀ ନଦୀରେ ଜଳସ୍ତର କମିଛି । ବନ୍ୟା ସ୍ଥିତି ନାହିଁ କହିଛନ୍ତି ସର୍ବୋଚ୍ଚ ଯନ୍ତ୍ରୀ ।

ସେପଟେ ମଥାନୀ ଠାରେ ବିପଦ ସଙ୍କେତ ତଳକୁ ଖସିଛି ଜଳକା ନଦୀ । ମାତ୍ର ଲୋକଙ୍କ ଦୁର୍ଦ୍ଦଶା କମିନି । ଏବେବି ବସ୍ତା ବ୍ଲକରେ ଶହ ଶହ ହେକ୍ଟର ଚାଷ ଜମି ଉପରେ ଲହଡ଼ି ମାରୁଛି ବନ୍ୟା ଜଳ । ଫସଲ ନଷ୍ଟ ନେଇ ଚାଷୀ ଚିନ୍ତାରେ ଥିବାବେଳେ ଅନେକ ଲୋକଙ୍କ ଘର ପାଣି ଘେରରେ । ସେହିପରି ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ଭଦ୍ରକ ଜିଲ୍ଲାରେ ବୈତରଣୀ ଶାଖା ନଦୀ ରେବ ଓ କପାଳୀ ନଦୀରେ ଆସିଛି ବନ୍ୟା ଜଳ । ଫଳରେ ଧାମନଗର ବ୍ଲକର ଅସୁରାଳୀଠାରେ ଭଦ୍ରକରୁ ଆଖଣ୍ଡଳମଣୀକୁ ସଂଯୋଗ ମୁଖ୍ୟ ରାସ୍ତାରେ ଗୋଟିଏ ଫୁଟ୍ ଉଚ୍ଚର ବନ୍ୟାଜଳ ପ୍ରବାହିତ ହେଉଛି । ଅସୁରାଳୀ, ଫତେପୁର, କାସିମପୁର, ବୋଡ଼କ ପଞ୍ଚାୟତର ହଂସପୁର, ସାହୁସାହି, ଲେଞ୍ଜରା, ଫତେପୁର, ଶ୍ରୀରାମପୁରରେ ଧାନ ଚାଷ ସହ ପନିପରିବା ଚାଷ ଜମି ପାଣିରେ ବୁଡ଼ି ରହିଛି ।

ରାଜ୍ୟରେ ଆସନ୍ତା ୧୧ ତାରିଖ ପର୍ଯ୍ୟନ୍ତ ବର୍ଷା ସମ୍ଭାବନା । ଆଗାମୀ ୨୪ ଘଣ୍ଟା ଓ ଆସନ୍ତାକାଲି ପ୍ରବଳ ବର୍ଷା ପାଇଁ ସବୁ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ ବିଭାଗ ।