Argus News - ଏଣିକି ମହାପ୍ରସାଦ ମାଗଣାରେ ପାଇବେ ଭକ୍ତ

ଅର୍ଗସ ବ୍ୟୁରୋ : କଥାରେ ଅଛି ଶ୍ରୀମନ୍ଦିରରେ ଜାତି ନାହିଁ କି କଲିକତାରେ ରାତି ନାହିଁ । ଆନନ୍ଦ ବଜାରରେ ଚଣ୍ଡାଳ ସହ ବ୍ରାହ୍ମଣ ବି ଅବଢା ଖାଉଥିବା କଥା କୁହାଯାଏ । ଶ୍ରୀଜିଉଙ୍କ ପ୍ରସାଦ ପାଇବା ପାଇଁ ଆକୁଳ ହୋଇ ଚାହିଁରହିଥାଏ ଭକ୍ତର ମନ ଓ ପ୍ରାଣ । ହେଲେ ଅବଢା ମୂଲ୍ୟ ବଢିଥିବାରୁ ଅନେକ ଗରିବ ଭକ୍ତ ପେଟପୁରା ଅବଢା ଖାଇପାରୁନାହିଁ । କେବଳ ଶ୍ରୀଜିଉଙ୍କ ପ୍ରସାଦ ଟିକେ ପାଇବାକୁ ଅଳ୍ପ ଟଙ୍କାରେ ପ୍ରସାଦ କିଣୁଥିବା ଦେଖାଯାଉଛି । ହେଲେ ଏବେ ପେଟପୁରା ମହାପ୍ରସାଦ ଖାଇବେ ଭକ୍ତ । ସିଏ ପୁଣି ସଂପୂର୍ଣ୍ଣ ମାଗଣାରେ । ଏଭଳି ନିଷ୍ପତ୍ତି କୋଟି କୋଟି ଭକ୍ତଙ୍କୁ ସାହାଯ୍ୟ କରିବ ବୋଲି କୁହାଯାଉଛି ।

ଭାରତର ସବୁ ବଡ଼ ମନ୍ଦିରରେ ଦିଅଁ ଦର୍ଶନ ପରେ ଭକ୍ତଙ୍କ ପାଇଁ ମିଳେ ମାଗଣା ପ୍ରସାଦ । ଯାହା ଏବେ ପୁରୀ ଶ୍ରୀମନ୍ଦିରରେ ଲାଗୁ ହେବ । ଭକ୍ତର ଭାବାବେଗକୁ ଦୃଷ୍ଟିରେ ରଖି ରାଜ୍ୟ ସରକାର ନେଇଛନ୍ତି ଏମିତି ବଡ଼ ନିଷ୍ପତ୍ତି । ମାଗଣା ମହାପ୍ରସାଦ ବିତରଣ ପାଇଁ ଅଣ୍ଟା ଭିଡ଼ିଛନ୍ତି ସରକାର । ଯୋଜନାକୁ କେମିତି ଦୀର୍ଘ ସ୍ଥାୟୀ କରାଯିବ ସେନେଇ  ମଧ୍ୟ ରୂପରେଖ ପ୍ରସ୍ତୁତ କରାଯାଉଛି । ସେପଟେ ଯୋଜନା ସଂପର୍କରେ ଆଇନମନ୍ତ୍ରୀ କହିଛନ୍ତି, ମହାପ୍ରସାଦ ଟିକିଏ ପାଇଲେ ଭକ୍ତର ମାନସିକ ଶାନ୍ତି ସହ ଆନ୍ତରିକ ଉଦବେଳନକୁ ପୂର୍ଣ୍ଣ କରିବା ପାଇଁ ପ୍ରୟାସ ଜାରି ରହିଛି । ଏହାସହିତ ଏ ବ୍ୟବସ୍ଥା ଅଧାରୁ ବନ୍ଦ ନହୋଇ ଆଗକୁ କେମିତି ବଳବତ୍ତର ରହିବ ସେନେଇ ଆନୁସଙ୍ଗିକ ବ୍ୟବସ୍ଥା କରାଯାଉଛି ବୋଲି ସେ କହିଛନ୍ତି ।

ଭକ୍ତଙ୍କୁ ମାଗଣାରେ ମହାପ୍ରସାଦ ମିଳିବା ନେଇ ଜୋରଦାର ଦାବି ହେବା ପରେ ୨୦୧୭ ମସିହାରେ ତତ୍କାଳୀନ   ବିଜେଡି ସରକାର ଶ୍ରୀମନ୍ଦିରେ ଭକ୍ତଙ୍କୁ ମାଗଣାରେ ମହାପ୍ରସାଦ ଦେବା ପାଇଁ ବ୍ୟବସ୍ଥା ହୋଇଥିଲା । ନିଇତି ୪ ହାଣ୍ଡି କାନିକା ନିଶୁଳ୍କ ବଣ୍ଟା ଯାଉଥିବା ବେଳେ ଅଳ୍ପ କେଇଦିନ ପରେ ଏହାକୁ ଆଗକୁ ନେଇପାରିନଥିଲେ ତତ୍କାଳୀନ ବିଜେଡି ସରକାର । ହେଲେ ଏବେ ପୁଣି ଥରେ ମାଗଣାରେ ମହାପ୍ରସାଦ ମିଳିବାକୁ ଯାଉଥିବାରୁ ଭକ୍ତଙ୍କ ମହଲରେ ଖୁସିର ଲହରୀ ଖେଳିଯାଇଛି । 

ଶ୍ରୀମନ୍ଦିର । କୋଟି କୋଟି ଭକ୍ତଙ୍କ ଭାବାବେଗ ସହ ଯୋଡି ହୋଇ ରହିଛି । ତେଣୁ କେମିତି ମନ୍ଦିରରେ ସଠିକ୍‌ରେ ନୀତିକାନ୍ତି ହେବା ସହିତ ଭଲରେ ଶ୍ରୀଜିଉଙ୍କ ସାନିଧ୍ୟ ପାଇବେ ଓ ମହାପ୍ରସାଦ ମିଳିବ ସେନେଇ ନୂଆ ସରକାର ଚେତନାଶୀଳ ଥିବା ବେଳେ ଏମିତି ନିଷ୍ପତ୍ତିକୁ ସବୁ ମହଲରେ ସ୍ଵାଗତ କରାଯାଉଛି ।