ଅର୍ଗସ ବ୍ୟୁରୋ: ୨୪ ବର୍ଷ ପରେ ମାଳମାଳ ପୋଲିସ କର୍ମୀଙ୍କ ଗହଣରୁ ଏବେ ବାହାରିଲେ ନବୀନ । ଅର୍ଥାତ୍‌ ନବୀନଙ୍କ ଆଖପାଖରେ ଯେଉଁପରି ମାଳମାଳ ସୁରକ୍ଷା କର୍ମୀ ତେହେନାତ୍‌ ଥିଲେ ସେମିତି ଆଉ ହେବନି । କାରଣ ରାଜ୍ୟ ସରକାର ନବୀନଙ୍କର ସୁରକ୍ଷାକୁ ହ୍ରାସ କରିଛନ୍ତି । ପୂର୍ବରୁ ୨୩ ଜଣିଆ ସୁରକ୍ଷା କର୍ମୀଙ୍କୁ କମାଇ ମାତ୍ର ୨ ଜଣ ପର୍ସନାଲ ସିକ୍ୟୁରିଟି ଅଫିସର ବା PSO ନିଯୁକ୍ତ କରିବାକୁ ନିର୍ଦ୍ଦେଶ ଦେଇଛି ଗୃହ ବିଭାଗ । ଖାଲି ନବୀନଙ୍କ ସୁରକ୍ଷା କମିଛି ତାହା ନୁହେଁ ବରଂ ପାଣ୍ଡିଆନଙ୍କ ସୁରକ୍ଷାକୁ ବି ପ୍ରତ୍ୟାହାର କରାଯାଇଛି । ଏମିତି କି IPS କୁଟ୍ଟେଙ୍କ କ୍ୱାର୍ଟର ଜଗିବାକୁ ବି ବିଜେଡି ସରକାର ସମୟରେ ନିୟୋଜିତ ହୋଇଥିବା ୪ ସୁରକ୍ଷା କର୍ମୀ ଏବଂ ୨ ହୋମଗାର୍ଡଙ୍କୁ ପ୍ରତ୍ୟାହର କରିନିଆଯାଇଛି । ଯାହାକୁ ନେଇ ବିଜେଡି ରାଗିପାଚି ଲାଲ୍‌ ହୋଇଥିବା ବେଳେ ଜବାବ ରଖିଛି ବିଜେପି ।

ମୁଖ୍ୟମନ୍ତ୍ରୀ ଥିବା ବେଳେ ନବୀନଙ୍କ ସୁରକ୍ଷା ପ୍ରାୟ ୨୦୦ରୁ ଅଧିକ ସୁରକ୍ଷାକର୍ମୀ ନିୟୋଜିତ ହୋଇଥିଲେ । ଖାଲି ନବୀନ କାହିଁକି ବରଂ ପାଣ୍ଡିଆନଙ୍କ ସୁରକ୍ଷା ବି କିଛି କମ ନଥିଲା । କେବଳ ସୁରକ୍ଷାରେ ବିଜେଡି କୋଟି କୋଟି ଟଙ୍କା ରାଜସ୍ଵ ଖର୍ଚ୍ଚ କରୁଥିଲା । ଯାହାକୁ ନେଇ ଅନେକ ସମୟରେ ବିବାଦ ଦେଖାଯିବା ସହିତ ସାଧାରଣରେ ପ୍ରଶ୍ନ ବି ଉଙ୍କି ମାରୁଥିଲା । କିନ୍ତୁ ଏବେ ବିଜେପି ସରକାର ଆସିବା ପରେ ବିରୋଧୀ ଦଳକୁ ଯେତିକି ସୁରକ୍ଷା ମିଳିବାର କଥା ସେତିକି ଦିଆଗଲା ।

ସୂଚନା ଅନୁସାରେ, ବିରୋଧୀ ଦଳ ନେତା ଭାବେ ନବୀନଙ୍କୁ ଏବେଠୁ ମିଳିବ କେବଳ ୨ ଜଣ ପିଏସ୍ଓ । ପାଇଲଟ୍ ଗାଡ଼ି ବି ଆଉ ରହିବ ନାହିଁ । ସେହିପରି କୌଣସି ପଦପଦବିରେ ନଥିଲେ ମଧ୍ୟ ନିର୍ବାଚନ ପରେ ବି ପାଣ୍ଡିଆନଙ୍କୁ ୨ଜଣ ପିଏସଓ ଜଗୁଥିଲେ । ହେଲେ ତାଙ୍କଠାରୁ ବି ପିଏସଓ ପ୍ରତ୍ୟାହାର ପାଇଁ ନିଷ୍ପତ୍ତି ନେଇଛନ୍ତି ସରକାର । ସେହିପରି ବିଜେଡି ସରକାର ସମୟରେ ପାୱାରଫୁଲ ଆଇପିଏସ ଡିଏସ୍ କୁଟ୍ଟେ, ଯାହାଙ୍କୁ ଏବେ ସରକାର ଗୃହ ବିଭାଗର ଓଏସ୍‌ଡି ଭାବେ ନିଯୁକ୍ତ କରିଛନ୍ତି, ତାଙ୍କ ୟୁନିଟ-1 ସ୍ଥିତ କ୍ୱାର୍ଟରକୁ ୪ ସୁରକ୍ଷା କର୍ମୀଙ୍କ ସହ ୨ ହୋମଗାର୍ଡ ଜଗୁଥିଲେ । ସମସ୍ତଙ୍କୁ ସରକାର ପ୍ରତ୍ୟାହାର କରିନେଇଥିବା କୁହାଯାଉଛି ।

ତେଣେ ନବୀନଙ୍କ ସୁରକ୍ଷା କମିବା ପରେ ଚିହିଁକି ଉଠିଛି ବିଜେଡି । ଅମର ପଟ୍ଟନାୟକଙ୍କ ପରେ ଦଳର ନେତା ସଞ୍ଜୟ ଦାସବର୍ମା ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି ବିଜେପି ସରକାରଙ୍କ ଆଚରଣ ଆଚମ୍ବିତ କରିଛି । ନବୀନଙ୍କ ସୁରକ୍ଷାରେ ତ୍ରୁଟି ହେଲେ ତା’ର ଉତ୍ତର ଦାୟିତ୍ୱ ସରକାର ନେବେ । ଯାହାକୁ କାଉଣ୍ଟର କରି ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ର କହିଛନ୍ତି, ସରକାରୀ ନିୟମ ଅନୁଯାୟୀ କାମ ହେଉଛି। ମୁଁ ବିରୋଧୀ ଦଳରେ ଥିବା ବେଳେ PSO ନେଉ ନଥିଲି । ଶାସନ କାଳରେ କରିଥିବା ଅନ୍ୟାୟ, ଅତ୍ୟାଚାର, ବ୍ୟଭିଚାର ପାଇଁ ସେମାନଙ୍କୁ ଭୟ ଘାରି ଥିବାରୁ ଅଧିକ ସୁରକ୍ଷା ମାଗୁଛନ୍ତି ବୋଲି ଜୟନାରାୟଣ କହିଛନ୍ତି ।

ପ୍ରୋଟକଲ୍‌ ଅନୁସାରେ, ମୁଖ୍ୟମନ୍ତ୍ରୀମାନଙ୍କୁ Z+ କାଟାଗୋରୀ ସୁରକ୍ଷା ମିଳେ । ଯେଉଁଥିରେ ୧୦ ଜଣ କମାଣ୍ଡୋଙ୍କ ସହ ୫୫ ଜଣ ସୁରକ୍ଷା କର୍ମୀ ରୁହନ୍ତି । ଏମାନେ ତିନି ସିଫ୍ଟରେ ୨୪ ଘଣ୍ଟିଆ ସୁରକ୍ଷା ଯୋଗାଇ ଦେଇଥାନ୍ତି । ମାତ୍ର ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ବେଳେ ସର୍ବାଧିକ ୨୬୮ ଜଣ ସୁରକ୍ଷା କର୍ମୀ ନିୟୋଜିତ ହେଉଥିଲେ । ସେହିପରି ବିଜେଡି ସରକାର ସମୟରେ ଚାକିରିରୁ ଅବସର ପରେ ପାଣ୍ଡିଆନଙ୍କୁ ଦିଆଯାଉଥିଲା ସୁରକ୍ଷା କର୍ମୀ । 5T ଅଧ୍ୟକ୍ଷ ଭାବେ ପାଣ୍ଡିଆନ ଯେତେବେଳେ ବେଶ୍ ପାୱାରଫୁଲ୍ ଥିଲେ, ତାଙ୍କୁ ଘେରି ରହୁଥିଲା କଡ଼ା ସୁରକ୍ଷା ବଳୟ । ଯାହାକୁ ନେଇ ସେତେବେଳର ବିରୋଧୀ ବିଜେପି ପ୍ରଶ୍ନ ଉଠାଇଥିଲା । କିନ୍ତୁ କୌଣସି କଥାକୁ କର୍ଣ୍ଣପାତ କରିନଥିଲେ ବିଜେଡି ସରକାର । ଏପଟେ, ସୁରକ୍ଷାକର୍ମୀ ହ୍ରାସ ପ୍ରସଙ୍ଗରେ ପୋଲିସ ଡିଜି କହିଛନ୍ତି, ଏହା ଏକ ନିୟମିତ ପ୍ରକ୍ରିୟା । ରାଜ୍ୟସ୍ତରୀୟ ସୁରକ୍ଷା କମିଟି ଏହାକୁ ସମୀକ୍ଷା କରେ । ଗ୍ରାଉଣ୍ଡରେ ଆବଶ୍ୟକତା, ଗୁଇନ୍ଦା ସୂଚନାକୁ ଆଧାର କରି କାହାକୁ କିଭଳି ସୁରକ୍ଷା ଯୋଗାଇଦିଆଯିବ, ସେ ବାବଦରେ ନିଷ୍ପତି ନିଆଯାଏ ।

Argus News | argus news | Odisha Latest News, Breaking News, Trending News, Live TV