Digital Detox / ମୋବାଇଲ୍‌ ନିଶାରୁ ମୁକ୍ତି ପାଇଁ ନୂଆ ଅଭିଯାନ... ''୧ ଘଣ୍ଟା ବିନା ଫୋନ୍‌ରେ ରୁହନ୍ତୁ''

ମୋବାଇଲ୍‌ ଆଡିକ୍ସନ୍‌ ଦୂର କରିବାକୁ ସ୍ୱାସ୍ଥ୍ୟ ବିଭାଗର ନୂଆ ପଦକ୍ଷେପ... ‘ଡିଜିଟାଲ୍‌ ଡିଟକ୍ସ’ ପାଇଁ ଆହ୍ୱାନ । ରାଜ୍ୟରେ ବଢ଼ୁଥିବା ସ୍ମାର୍ଟଫୋନ୍ ଅଭ୍ୟାସ ଓ ଏହାର ମାନସିକ ପ୍ରଭାବକୁ ଦୃଷ୍ଟିରେ ରଖି ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏକ ସଚେତନତା ଅଭିଯାନ ଆରମ୍ଭ କରାଯାଇଛି ।

ସକାଳୁ ଉଠିବା ମାତ୍ରେ ଫୋନ୍ ଦେଖିବାର ଅଭ୍ୟାସକୁ ବଦଳାଇବା ସହ ଦିନସାରା ମୋବାଇଲ୍‌ ବ୍ୟବହାର କମାଇବା ପାଇଁ "୧ ଘଣ୍ଟା ବିନା ଫୋନ୍‌ ରେ..." ଚ୍ୟାଲେଞ୍ଜ ଗ୍ରହଣ କରିବାକୁ ଜନସାଧାରଣଙ୍କୁ ଆହ୍ୱାନ ଦିଆଯାଇଛି । ​ଅତ୍ୟଧିକ ଫୋନ୍‌ ବ୍ୟବହାରର ମୁଖ୍ୟ ଲକ୍ଷଣ ଓ ସଙ୍କେତ ହେଲା,​ ଘଣ୍ଟା ଘଣ୍ଟା ଧରି ଅନାବଶ୍ୟକ ଭାବେ ଫୋନ୍‌ ଚଲାଇବା । ବାରମ୍ବାର ଫୋନ୍‌ର ନୋଟିଫିକେସନ୍‌ ଯାଞ୍ଚ କରିବା ।

ଫୋନ୍‌ ପାଖରେ ନଥିଲେ କିମ୍ବା ବ୍ୟବହାର କରିନପାରିଲେ ମାନସିକ ଅସ୍ଥିରତା ପ୍ରକାଶ ପାଇବା । ​ନିତ୍ୟକର୍ମରେ ବାଧା, ଯେମିତିକି ପଢ଼ାପଢ଼ି, କର୍ମକ୍ଷେତ୍ରର କାମ ଏବଂ ନିଦ୍ରା ପ୍ରଭାବିତ ହେବା । ମୋବାଇଲ୍‌ ନିଶାରୁ ମୁକ୍ତି ପାଇଁ ଆଜିଠାରୁ 'ଡିଜିଟାଲ୍‌ ଡିଟକ୍ସ' ଆରମ୍ଭ କରିବାକୁ ପରାମର୍ଶ ଦିଆଯାଇଛି । ଏହାସହ ମାନସିକ ସ୍ୱାସ୍ଥ୍ୟ ସମ୍ବନ୍ଧୀୟ ଯେକୌଣସି ସହାୟତା କିମ୍ବା ପରାମର୍ଶ ପାଇଁ ସ୍ୱାସ୍ଥ୍ୟ ବିଭାଗର ମାଗଣା ହେଲ୍ପଲାଇନ୍‌ ନମ୍ବର ‘ଟେଲି-ମାନସ’ - 14416 ରେ କଲ୍‌ କରିବାକୁ ଅନୁରୋଧ କରାଯାଇଛି ।

ସେପଟେ ରାଜ୍ୟରେ ମୋବାଇଲ ବ୍ୟବହାରୀଙ୍କ ସଂଖ୍ୟାରେ ଆଖିଦୃଶିଆ ବୃଦ୍ଧି ପରିଲିଖିତ ହୋଇଛି । ମାସକରେ ଯୋଡ଼ି ହୋଇଛନ୍ତି ୪ ଲକ୍ଷ ନୂଆ ମୋବାଇଲ ଗ୍ରାହକ । ଯାହା ଦେଶରେ ଦ୍ବିତୀୟ ସର୍ବାଧିକ ରହିଛି । ଭାରତୀୟ ଟେଲିକମ ନିୟାମକ କର୍ତ୍ତୃପକ୍ଷ ବା ଟ୍ରାଇ ପକ୍ଷରୁ ଜାରି ହୋଇଥିବା ସୂଚନା ଆଧାରରେ କେବଳ ଜୁଲାଇ ମାସରେ ରାଜ୍ୟରେ ମୋଟ୍ ୪ ଲକ୍ଷ ୧୨ ହଜାର ୩୯୯ ଜଣ ନୂଆ ମୋବାଇଲ ଗ୍ରାହକ ଯୋଡ଼ି ହୋଇଛନ୍ତି । ଏଥି ସହ ରାଜ୍ୟରେ ମୋବାଇଲ ଗ୍ରାହକଙ୍କ ସଂଖ୍ୟା ୩ କୋଟି ୯୦ ଲକ୍ଷ ୧୪ ହଜାର ୨୮୭କୁ ବୃଦ୍ଧି ପାଇଛି । ଓଡ଼ିଶାରେ ଟେଲି ସାନ୍ଧ୍ରତା ୮୫ ପ୍ରତିଶତ ମାର୍କ ଟପି ଏବେ ୮୫.୨୧ ପ୍ରତିଶତ ରହିଛି ।