କଟକ: ଅଫିସ୍ ଛାଡ଼, ୱାର୍ଡକୁ ଯାଅ । ରୋଡ୍ ଆଣ୍ଡ ବ୍ରିଜ୍ ଅଧିକ୍ଷଣ ଯନ୍ତ୍ରୀଙ୍କୁ କହିଲେ ହାଇକୋର୍ଟ । କଟକ ସହରର ସମସ୍ୟା ନେଇ ଦାଖଲ ଜନସ୍ଵାର୍ଥ ମାମଲାର ଶୁଣାଣି ବେଳେ ହାଇକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି । ସହରରେ ରାସ୍ତାଘାଟ ସମସ୍ୟା ନେଇ କ୍ଷୋଭ ପ୍ରକାଶ କରିଛନ୍ତି ହାଇକୋର୍ଟ ।

କେବେ ନିଜେ ସ୍କୁଟର ନେଇ ସ୍ଥିତି ସମୀକ୍ଷା କରନ୍ତୁ ବୋଲି ରୋଡ୍ ଆଣ୍ଡ ବ୍ରିଜ୍ ଅଧିକ୍ଷଣ ଯନ୍ତ୍ରୀଙ୍କୁ ହାଇକୋର୍ଟ କହିଛନ୍ତି । ଅଫିସ୍ ଛାଡ଼ି ନିଜେ ୱାର୍ଡ ଗୁଡ଼ିକ ବୁଲିବାକୁ ଯନ୍ତ୍ରୀଙ୍କୁ କହିଛନ୍ତି । ଏଥିସହ ରାସ୍ତାଘାଟର ମରାମତି ନେଇ ଏକ ସତ୍ୟପାଠ ଦାଖଲ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।

ପୂଜା ସମୟରେ ରାସ୍ତା ଅବରୋଧ କରି ପେଣ୍ଡାଲ ତିଆରି ନ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ତୋରଣ ଗୁଡ଼ିକର ଉଚ୍ଚତା ଓ ସୁରକ୍ଷାକୁ ନେଇ ଜିଲ୍ଲାପାଳ ପଦକ୍ଷେପ ନେବେ । ପୂଜାରେ ତୋରଣ ଏବଂ ସୁରକ୍ଷା ସମ୍ପର୍କିତ ଅନୁମତି ପାଇଁ ସିଙ୍ଗଲ ୱିଣ୍ଡୋ ବ୍ୟବସ୍ଥା ରହିବ । ତୋରଣ ନିର୍ମାଣ ପୂର୍ବରୁ ପୂଜା କମିଟି ମାନଙ୍କ ଠାରୁ ତୋରଣର ଡ୍ରଇଁ ମଗାଯିବ ବୋଲି କଟକ ଜିଲ୍ଲାପାଳ କହିଛନ୍ତି ।

ପୂଜାରେ ଶବ୍ଦ ପ୍ରଦୂଷଣ ନେଇ ହାଇକୋର୍ଟ ଚିନ୍ତା ପ୍ରକଟ କରିଛନ୍ତି । ଶବ୍ଦ ପ୍ରଦୂଷଣ ୬୫ ଡେସିବିଲ ମଧ୍ୟରେ ସୀମିତ ରଖିବା ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ପାର୍ବଣ ସମୟରେ ସ୍ଵଚ୍ଛ ପିଇବା ପାଣି ଯୋଗାଇବା ପାଇଁ ୱାଟକୋକୁ ନିର୍ଦ୍ଦେଶ ଦିଆଯାଇଛି । ସେହିଭଳି ବିଷାକ୍ତ ଖାଦ୍ୟ ବିକ୍ରି ଉପରେ ନଜର ରଖିବାକୁ କୁହାଯାଇଛି ।

ଏଥିସହ ଲୋକଙ୍କ ନଜରକୁ କୌଣସି ସମସ୍ୟା କିମ୍ବା ଅସୁବିଧା ଆସିଲେ କିଭଳି ଜଣାଇବେ ସେ ନେଇ ବ୍ୟବସ୍ଥା କରିବାକୁ ସିଏମସି କମିଶନରଙ୍କୁ କୁହାଯାଇଛି । ଯୋର ଜବରଦସ୍ତ ଭାବେ ପୂଜା ଚାନ୍ଦା ଆଦୟକୁ ନେଇ କୋର୍ଟ କଡ଼ା ଟିପ୍ପଣୀ କରିଛନ୍ତି । ଏ ଦିଗରେ କମିଶନରେଟ୍ ପୋଲିସ ଶୂନ୍ୟ ସହନଶୀଳତା ନୀତି ଆପଣାଇବାକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ