ଗଞ୍ଜାମ ଜିଲ୍ଲା ଋଷିକୁଲ୍ୟା ମୁହାଣରେ ନିର୍ମାଣ ହେବ କଇଁଛ ଗବେଷଣା କେନ୍ଦ୍ର। ପ୍ରକୃତିର ବିରଳ ଅଲିଭରିଡଲେ କଇଁଛଙ୍କ ଉପରେ କରାଯିବ ଗବେଷଣା । ବିରଳ ଅଲିଭ ରିଡଲେଙ୍କ ଜନ୍ମ ଠାରୁ ବିକାଶ ପର୍ଯ୍ୟନ୍ତ ସବୁ ତଥ୍ୟ ବିଷୟରେ ଜାଣିବେ ପର୍ଯ୍ୟଟକ । ଉପକୃତ ହେବେ ଛାତ୍ର ଛାତ୍ରୀ। କଇଁଛ ଗବେଷଣା ଓ ସଂରକ୍ଷଣ କେନ୍ଦ୍ର ପ୍ରତିଷ୍ଠା ପାଇଁ ଋଷିକୁଲ୍ୟା ମୁହାଣ ନିକଟସ୍ଥ ପୁରୁଣାବନ୍ଧରେ ଜାଗା ଚିହ୍ନଟ କରାଯାଇଛି । ଖୁବଶୀଘ୍ର ପରବର୍ତ୍ତୀ କାର୍ଯ୍ୟ ଆରମ୍ଭ ହେବ। ଜମି ହସ୍ତାନ୍ତର ପରେ ଡିପିଆର୍ ଓ ନକ୍ସା ପ୍ରସ୍ତୁତ କରାଯିବ ।

ଓଡ଼ିଶାରେରେ ଏହା ପ୍ରଥମ କଇଁଛ ଗବେଷଣା କେନ୍ଦ୍ର। ପ୍ରତିବର୍ଷ ଋଷିକୁଲ୍ୟା ମୁହାଣ ସଂଲଗ୍ନ ବାଲୁକାଶଯ୍ୟାରେ ଲକ୍ଷାଧିକ କଇଁଛ ଅଣ୍ଡାଦାନ କରିଥାନ୍ତି। ଏଥିପାଇଁ ଏହି ମୁହାଣ ନିକଟରେ ଏକ ଗବେଷଣା କେନ୍ଦ୍ର ପ୍ରତିଷ୍ଠା କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଥିଲେ । ଜନସାଧାରଣଙ୍କୁ ଅଲିଭରିଡଲେଙ୍କ ଉପରେ ସୂଚନା ପ୍ରଦାନ ପାଇଁ ଏକ ସୂଚନା କେନ୍ଦ୍ର ପ୍ରତିଷ୍ଠା ହେବ । ପର୍ଯ୍ୟଟକଙ୍କ ନିମନ୍ତେ ସଂଗ୍ରହାଳୟ କରାଯିବ ବୋଲି ପ୍ରସ୍ତାବ ରହିଛି ।

ବିଭିନ୍ନ ସମୟରେ ଅଲିଭରିଡଲେ ଟ୍ରଲର୍ କିମ୍ବା ଡଙ୍ଗାରେ ମାଡ଼ ହୋଇ ଆହତ ହାଇଥାନ୍ତି। ଆହତ କଇଁଛଙ୍କ ଚିକିତ୍ସା ପାଇଁ ମଧ୍ୟ କେନ୍ଦ୍ରରେ ସୁବିଧା କରାଯିବ। ଗବେଷଣା ସହିତ କଇଁଛଙ୍କ ସଂରକ୍ଷଣ ଦିଗରେ ଏହି କେନ୍ଦ୍ରରେ କାମ କରା‌ଯିବ । ଏହି କେନ୍ଦ୍ର ଅନ୍ତର୍ଜାତୀୟ ପ୍ରତିଷ୍ଠାନର ଗବେଷକଙ୍କ ନିମନ୍ତେ ବେଶ୍ ଉପଯୋଗୀ ହେବ । ଋଷିକୁଲ୍ୟା ମୁହାଣକୁ ଅନ୍ୟ କେଉଁ ପ୍ରଜାତିର କଇଁଛ ଆସୁଛନ୍ତି ତା' ଉପରେ ମଧ୍ୟ ତଥ୍ୟ ମିଳିପାରିବ।