ସାଇତା ସତ । ଅରୁଣଙ୍କ ଏହି ବହି ଏବେ ବିଜେଡି ଭିତରେ ସୃଷ୍ଟି କରିଛି କମ୍ପନ । ବାକ୍ୟବାଣରେ ବିଜେଡିର ବକ୍ଷକୁ ଭେଦିଛନ୍ତି ବିଧାୟକ ଅରୁଣ ସାହୁ । ସତ ମିଛର ଉପାଖ୍ୟାନରେ ନବୀନଙ୍କ ଆଡକୁ ଇଙ୍ଗିତ କରି ଲେଖିଛନ୍ତି ଶୀର୍ଷ ନେତୃତ୍ବ ଯଦି ସତ ଶୁଣି ରୁଷ୍ଟ ନ ହୁଅନ୍ତେ ବା ଅନ୍ୟଥା ଗ୍ରହଣ ନ କରନ୍ତେ ଆଉ ସତକୁ ସାଦରେ ଗ୍ରହଣ କରିନିଅନ୍ତେ, ମିଛକୁ ଆଗ୍ରାହ୍ୟ କରିଦିଅନ୍ତେ ତେବେ ମିଛ ନିଜର ପତିଆରା ହରେଇ ବସନ୍ତା । ଅର୍ଥାତ ଦଳର ସ୍ଥିତି ନେଇ କୁହାଯାଇଥିବା ସତକୁ ନବୀନ ଅନ୍ୟଥା ନେଉଥିବା ବା ରୁଷ୍ଟ ହେଉଥିବା କଥାକୁ ଲେଖିଛନ୍ତି ଅରୁଣ ।

ଅରୁଣ ଆହୁରି ଲେଖିଛନ୍ତି ସତ କହିବା ପାଇଁ ଯେତିକି ସାହାସ ଦରକାର, ସତ ଶୁଣିବା ବାଲାର ତାଠାରୁ ଅଧିକ ସାହାସ ଦରକାର । ତାର କଲିଜା ଶକ୍ତ ଥିବା ଦରକାର । ଏପରିକି ପରୋକ୍ଷରେ ପାଣ୍ଡିଆନ୍ ଓ ବିଜେଡି ବିପର୍ଯ୍ୟୟ କଥା ଉଠାଇ ଅରୁଣ ଲେଖିଛନ୍ତି, ବୃଥା ଅଂହକାର ପାଇଁ ହିଁ ଜଣେ ଜୀବନର ଗତିପଥରେ କଚାଡ଼ି ହୋଇପଡ଼େ । କିନ୍ତୁ ସବୁ ପରେ ବି ଦଳରେ ପାଣ୍ଡିଆନ୍ ଆଣ୍ଡ୍ କୋଙ୍କ ଆଧିପତ୍ୟ ଓ ପ୍ରଭାବକୁ ନେଇ ପରୋକ୍ଷରେ ଅରୁଣ ଲେଖିଛନ୍ତି, ପତିଆରା ବଢ଼େଇବା ଓ ପ୍ରତିଷ୍ଠା ଅକ୍ଷୁର୍ଣ୍ଣ ରଖିବାକୁ, ମିଛ ଗୋଟେ ବଡ଼ ସାହାର ପାଲଟିଛି । ତେଣୁ କହିବା ବାଲା ଏବଂ ଶୁଣିବାବାଲା ଉଭୟଙ୍କର ପ୍ରକୃତିରେ ପରିବର୍ତ୍ତନ ଆସିବା ଦରକାର ।

ସମୀକ୍ଷକଙ୍କ ମନରେ ପ୍ରଶ୍ନ ଅରୁଣଙ୍କ ସାଇତା ସତ ବହି ପଛର ରହସ୍ୟ କଣ ? କେଉଁ ସତ କଥା ଅରୁଣ କହିବାକୁ ଚାହୁଁଥିଲେ ଶୀର୍ଶ ନେତୃତ୍ବ ବା ନବୀନ ପଟ୍ଟନାୟକଙ୍କୁ ? ଆଉ କାହିଁକି ନବୀନ ଅରୁଣଙ୍କ କଥାକୁ ନେଇ ରୁଷ୍ଟ ହୋଇଥିଲେ ବା ଅନ୍ୟଥା ନେଇଥିଲେ ? ଆଉ କିଏ ସେହି ବ୍ୟକ୍ତି ଅରୁଣଙ୍କ ସତକୁ କଦର୍ଥ କରି ନବୀନଙ୍କ ପାଖରେ ପହଞ୍ଚାଉଥିଲା ?

ସାଧାରଣ ନିର୍ବାଚନ ପୂର୍ବରୁ ବିଜେଡିରେ ଦଳୀୟ ପ୍ରସଙ୍ଗରେ ସତ କହିବା ଯୋଗୁ ଭର୍ତ୍ତୃହରି ମହତାବ, ସୌମ୍ୟରଞ୍ଜନ ପଟ୍ଟନାୟକ, ପ୍ରଦୀପ ପାଣିଗ୍ରାହୀଙ୍କ ଭଳି ନେତାଙ୍କୁ ମହଙ୍ଗା ପଡ଼ିଥିଲା । ଆଉ ନିର୍ବାଚନ ବିପର୍ଯ୍ୟୟ ପରେ ନିରବତା ଭାଙ୍ଗି ସତ କହିବାକୁ ଚେଷ୍ଟା କରିଥିବା ପ୍ରଫୁଲ୍ଲ ମଲିକ, ଭୂପିନ୍ଦର ସିଂ, ଶଶୀ ଭୂଷଣ ବେହେରା ଓ ନୃସିଂହ ସାହୁଙ୍କ ଭଳି କିଛି ନେତାଙ୍କୁ ବି ମହଙ୍ଗା ପଡ଼ିଛି । ତେଣୁ ନବୀନ ସତ ଶୁଣିବାକୁ ସତ୍ ସାହାସ ରଖୁନଥିବା ବା ନେତାଙ୍କ ସତ କଥା ଶୁଣୁ ନଥିବାରୁ, ମିଛର ଫାଇଦା ନେଇ ପାଣ୍ଡିଆନ୍ ଦଳରେ ପ୍ରଭାବ ବିସ୍ତାର କରୁଥିବା ଅରୁଣ ତାଙ୍କ ବହିରେ ଲେଖିଥିବା ଚର୍ଚ୍ଚା ହେଉଛି ।