ରାଜ୍ୟସଭା ଆସନ ପାଇଁ ଆଜି ନାମାଙ୍କନ ଦାଖଲର ଶେଷ ଦିନ । ରାଜ୍ୟସଭା ଆସନ ପାଇଁ ନାଁ ଘୋଷଣା ସରିଥିବାରୁ ଓ ଆଜି ଶେଷ ଦିନ ହୋଇଥିବାରୁ ନାମାଙ୍କନ ଦାଖଲ କରିବେ ପ୍ରାର୍ଥୀ । ଏନେଇ ଦଳ ଓ ପ୍ରାର୍ଥୀଙ୍କ ପକ୍ଷରୁ ସ୍ପଷ୍ଟ କରାଯାଇଛି । ଓଡ଼ିଶାର ୪ ରାଜ୍ୟସଭା ଆସନ ପାଇଁ ଏଥର ୫ଜଣ ପ୍ରାର୍ଥୀ ନାମାଙ୍କନ ଭରିବେ । ରାଜ୍ୟସଭା ୪ ଆସନ ପାଇଁ ଉଭୟ ଶାସକ ଦଳ ଓ ବିରୋଧୀ ସେମାନଙ୍କ ପ୍ରାର୍ଥୀ ଘୋଷଣା କରିଛନ୍ତି । ଚତୁର୍ଥ ଆସନ ପାଇଁ ବି ଦୁଇ ଜଣଙ୍କ ନାଁ ସ୍ପଷ୍ଟ ହୋଇ ସାରିଛି ।

ବିଜେପିରୁ ମନମୋହନ ସାମଲ, ସୁଜିତ୍ କୁମାର ବିଜେଡିରୁ ସଂତୃପ୍ତ ମିଶ୍ର , କମନ କ୍ୟାଣ୍ଡିଡେଟ୍ ଦତ୍ତେଶ୍ବର ହୋତା ଓ ସ୍ବାଧୀନ ପ୍ରାର୍ଥୀ ଦିଲ୍ଳୀପ ରାୟ ନାମାଙ୍କନ ଦାଖଲ କରିବେ । ରାଜ୍ୟସଭା ଆସନ ପାଇଁ ନାଁ ଘୋଷଣା ସରିଛି କିନ୍ତୁ ଫେବ୍ରୁଆରୀ ୨୬ରୁ ବିଜ୍ଞପ୍ତି ପ୍ରକାଶ ପାଇଥିଲେ ବି ଏପର୍ୟ୍ୟନ୍ତ କେହି ନାମାଙ୍କନ ଦାଖଲ ନାହାନ୍ତି ।

ମାର୍ଚ୍ଚ ୫ତାରିଖ ନାମାଙ୍କନର ଶେଷ ଦିନ ହୋଇଥିବାରୁ କାଲି ସମସ୍ତେ ନାମାଙ୍କନ ଦାଖଲ କରିବେ । ଏନେଇ ଦଳ ଓ ପ୍ରାର୍ଥୀଙ୍କ ପକ୍ଷରୁ ସ୍ପଷ୍ଟ କରାଯାଇଛି । ମାର୍ଚ୍ଚ ୬ରେ ପ୍ରାର୍ଥୀପତ୍ରର ହେବ ଯାଞ୍ଚ । ମାର୍ଚ୍ଚ ୯ରେ ପ୍ରାର୍ଥୀପତ୍ର ପ୍ରତ୍ୟାହାରର ଶେଷ ତାରିଖ ରହିଛି । ୧୬ମାର୍ଚ୍ଚରେ ରାଜ୍ୟସଭା ଆସନ ପାଇଁ ପଡ଼ିବ ଭୋଟ୍ ।
ଦିଲ୍ଲୀପ ନା ଦତ୍ତେଶ୍ବର ତାକୁ ନେଇ ତେଜିଲା ବିଜେପି, ବିଜେଡି ଓ କଂଗ୍ରେସ ନେତାଙ୍କ ବୟାନବାଜି । ସ୍ବାଧୀନ ପ୍ରାର୍ଥୀଙ୍କୁ ସମର୍ଥନ ପାଇଁ ମନମୋହନ ସାମଲ ଅପିଲ୍ କରିଛନ୍ତି । ସେପଟେ ସଂତୃପ୍ତ କହିଲେ ଦୁଇଟି ଆସନରେ ଜିତିବ ବିଜେଡି ।
ଡାକ୍ତର ଦତ୍ତେଶ୍ବର ହୋତାଙ୍କୁ ବିଜେଡି କମନ ପ୍ରାର୍ଥୀ ଭାବେ ଘୋଷଣା ଓ ପରେ ସ୍ଵାଧୀନ ପ୍ରାର୍ଥୀ ଭାବେ ବରିଷ୍ଠ ନେତା ଦିଲ୍ଲୀପ ରାୟ ଛିଡା ହେବା ରାଜ୍ୟସଭା ଲଢେଇକୁ ଆହୁରି ରୋଚକ କରି ଦେଇଛି । ଦିଲ୍ଲୀପ ରାୟ ଜିତିବା ନେଇ ବେଶ୍ ଆତ୍ମବିଶ୍ବାସୀ ଥିବା ବେଳେ ବିଜେପି ମଧ୍ୟ ସଂପୂର୍ଣ୍ଣ ସମର୍ଥନ ଦେବ ବୋଲି ଘୋଷଣା କରିଛି ।

ସେପଟେ ବିଜେଡିର କମନ ପ୍ରାର୍ଥୀ ଫର୍ମୁଲା କେତେ ସଫଳ ହେବ ତାକୁ ନେଇ ସୃଷ୍ଟି ହୋଇଛି ବଡ଼ ପ୍ରଶ୍ନବାଚୀ । ଦତ୍ତେଶ୍ବରଙ୍କୁ କଂଗ୍ରେସ ସମର୍ଥନ ଦେବ ବୋଲି କହିଛି ହେଲେ ଅସନ୍ତୁଷ୍ଟଙ୍କୁ କେମିତି ଆକଟ କରି ଉଭୟ ବିଜେଡି ଓ କଂଗ୍ରେସ ରଖିବେ ତାହା ଏବେ ଚର୍ଚ୍ଚାର ବିଷୟ । ତେବେ ଏଭଳି ସ୍ଥିତିରେ ବିଜେଡିର ରାଜ୍ୟସଭା ପ୍ରାର୍ଥୀ ଦମ୍ଭୋକ୍ତି କରି କହିଛନ୍ତି, ହୋଲି ଖେଳିଲେ ରଙ୍ଗ ବଦଳି ଯାଏ, କିନ୍ତୁ ଗାଧେଇ ପଡିଲେ ଅସଲ ଚେହେରା ସାମ୍ନାକୁ ଆସେ । ଓଡ଼ିଶାବାସୀ ଅସଲ ଚେହେରାକୁ ଚିହ୍ନଛନ୍ତି । ଆମେ ଆଶାବାଦୀ ଆମର ଦୁଇ ପ୍ରାର୍ଥୀ ଜିତିବେ । ଅନ୍ୟପଟେ କଂଗ୍ରେସ ସମର୍ଥନ ଦେବନି ବୋଲି କହିଛନ୍ତି ଭକ୍ତ ଚରଣ ଦାସ ।
ଆଉ ତିନି ଦଳଙ୍କ ଛକାପଞ୍ଝା ଭିତରେ ନିଲମ୍ବିତ ବିଧାୟକ ଅରବିନ୍ଦ ମହାପାତ୍ର ସିଧା ନ କହିଥଲେ ବି ବିଜେଡିକୁ ସମର୍ଥନ ଦେବେନି ବୋଲି ପରୋକ୍ଷରେ ସଂକେତ ଦେଇଛନ୍ତି ।

ସଂଖ୍ୟା ଦୃଷ୍ଟିରୁ ୨ଟି ସିଟରେ ବିଜେପି ପ୍ରାର୍ଥୀ ମନମୋହନ ସାମଲ ଓ ସୁଜିତ୍ କୁମାର । ଆଉ ଗୋଟିଏ ସିଟରେ ବିଜେଡି ପ୍ରାର୍ଥୀ ସଂତୃପ୍ତ ମିଶ୍ର ବିଜୟୀ ହେବା ସୁନିଶ୍ଚିତ । ତେବେ ଏଠି ପ୍ରଶ୍ନ ବିଜେଡିର କମନ ପ୍ରାର୍ଥୀ ଡାକ୍ତର ଦତ୍ତ୍ୱେଶ୍ବର ହୋତାଙ୍କୁ ବଳକା ସମସ୍ତ ବିଜେଡି ବିଧାୟକ ଓ କଂଗ୍ରେସର ସବୁ ବିଧାୟକ ଭୋଟ ଦେବେ ତ ? କିଛି ନେତାଙ୍କ ଭିତରେ ଥିବା ଅସନ୍ତୋଷ କ୍ରସ୍‌ ଭୋଟିଂରେ ପ୍ରତିଫଳିତ ହେବାର ଆଶଙ୍କା ରହିଛି । ଏପରି ସ୍ଥଳେ ସ୍ଵାଧୀନ ପ୍ରାର୍ଥୀ ଦିଲ୍ଲୀପ ରାୟ ବାଜି ମାରି ନେବେ ବୋଲି ଚର୍ଚ୍ଚା ଜୋର ଧରିଛି ।