ଓଡ଼ିଶାରେ ବାଟବଣା ମୋଦିଙ୍କ ହର ଘର ଜଲ ଯୋଜନା । ଲୋକଙ୍କୁ ମିଳୁନି ବିଶୁଦ୍ଧ ପାନୀୟ ଜଳ । ଲୋକସଭା ଉତ୍ତରରେ ସାମ୍ନାକୁ ଆସିଛି ଏହି ସାଙ୍ଘାତିକ ତଥ୍ୟ । ରାଜ୍ୟର ଗ୍ରାମାଞ୍ଚଳରେ ବାସ କରୁଥିବା ୮୮ ଲକ୍ଷ ୬୭ ହଜାର ପରିବାର ମଧ୍ୟରୁ ୨୦ ଲକ୍ଷ ୫୨ ହଜାର ପରିବାର ପାଖରେ ଏଯାଏ ପହଁଚି ପାରିନି ଟ୍ୟାପ ଯୋଗେ ବିଶୁଦ୍ଧ ପାନୀୟ ଜଳ । ୩୫ ହଜାର କୋଟି ଟଙ୍କାର ବିଭିନ୍ନ ପାନୀୟ ଜଳ ପ୍ରକଳ୍ପ ଅଧପନ୍ତରିଆ ହୋଇ ପଡି ରହିଥିବାରୁ ଏଭଳି ସ୍ଥିତି ଉପୁଜିଥିବା କହିଛନ୍ତି ସୁଚନା ଅଧିକାର କର୍ମୀ ।

ପାନୀୟ ଜଳ ବ୍ୟବସ୍ଥା ଏବେ ସରକାରଙ୍କ ପାଇଁ ପାଲଟିଛି ବଡ ଚ୍ୟାଲେଞ୍ଜ। ଦୂଷିତ ପାଣି ପିଇବା ଯେଗୁଁ ବିଭିନ୍ନ ସମୟରେ ହଇଜା ଲୋକଙ୍କ ଜୀବନ ନେଉଛି । ରାଜ୍ୟର ୨୦୭ଟି ମେଗା ପ୍ରକଳ୍ପ ମଧ୍ୟରୁ ମାତ୍ର ୧୮ ଟି ପ୍ରକଳ୍ପରେ ସବୁ ଘରକୁ ନଳ ଯୋଗେ ଜଳ ବ୍ୟବସ୍ଥା ହୋଇଛି। ଅଗଷ୍ଟରେ ୨୧ ଟି, ସେପ୍ଟେମ୍ବରରେ ୧୧ ଓ ଡିସେମ୍ବର ସୁଦ୍ଧା ୨୨ଟି ପ୍ରକଳ୍ପ ଶେଷ କରିବାକୁ ଲକ୍ଷ୍ୟ ରଖିଛି ପାନୀୟ ଜଳ ବିଭାଗ । ରାଜ୍ୟରେ ପାନୀୟ ଜଳ ଯୋଗାଣର ଏ ବିକଳ ସ୍ଥିତି ପାଇଁ ପୂର୍ବ ସରକାରକୁ ଦାୟୀ କରିଛନ୍ତି ପଞ୍ଚୟତିରାଜ ମନ୍ତ୍ରୀ ।

ପ୍ରତି ଘରକୁ ଟ୍ୟାପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ୨୦୧୯ ରୁ ହର ଘର ଜଲ ଯୋଜନା ଆରମ୍ଭ କରିଥିଲେ କେନ୍ଦ୍ର ସରକାର। ଏହି ଯୋଜନା ଅନ୍ତର୍ଗତ ଗୁଜରାଟ, ହରିଆଣା, ଗୋଆ ଭଳି ୧୧ ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ କରିଛନ୍ତି ଶତ ପ୍ରତିଶତ ଲକ୍ଷ୍ୟ ହାସଲ କରିଛନ୍ତି । ହେଲେ ଆର୍ଥିକ ଅନୁଦାନ ଆସିଥିଲେ ମଧ୍ୟ ଓଡିଶା ଏହି ତାଲିକାରେ ଏତେ ପଛରେ ରହିବା ଯୋଜନାର କ୍ରିୟାନ୍ବୟନ ନେଇ ପ୍ରଶ୍ନ ଉଠାଇଛି।