ଫେବ୍ରୁଆରୀ ଆରମ୍ଭରୁ ପାରଦ ୩୬ ପାର୍, ବଲାଙ୍ଗିର ସବୁଠୁ ଉତ୍ତପ୍ତ
Key Points
ଫେବ୍ରୁଆରୀ ପ୍ରଥମରୁ ରେକର୍ଡ ଭାଙ୍ଗିଲାଣି ତାତି
ଆଜି ରାଜ୍ୟର ସର୍ବାଧିକ ତାପମାତ୍ରା ୩୬ ଡିଗ୍ରୀ ଟପିଛି
୩୬.୭ ଡିଗ୍ରୀ ସହ ବଲାଙ୍ଗିର ରାଜ୍ୟର ଉତ୍ତପ୍ତ ସହର
ଭୁବନେଶ୍ଵର: ମାଘରେ ଗାଏବ 'ବାଘ' ଶୀତ । ଶୀତ କଥା ତ ଛାଡ଼ନ୍ତୁ ମାଘ ସରିନି କିନ୍ତୁ କଲବଲ କଲାଣି ଖରା । ଜାନୁଆରୀ ଶେଷ ସପ୍ତାହରୁ ରାଜ୍ୟରେ ବଢ଼ୁଥିବା ପାରଦ ଫେବ୍ରୁଆରୀ ପ୍ରଥମରୁ ରେକର୍ଡ ଭାଙ୍ଗିଲାଣି । ଆଜି ରାଜ୍ୟର ସର୍ବାଧିକ ତାପମାତ୍ରା ୩୬ ଡିଗ୍ରୀ ଟପିଛି । ରାଜ୍ୟରେ ଚଳିତ ବର୍ଷ ପ୍ରଥମ ଥର ପାଇଁ ପାରଦ ୩୬ ଡିଗ୍ରୀ ଅତିକ୍ରମ କରିଛି ।
ଚଳିତ ବର୍ଷର ସର୍ବୋଚ୍ଚ ତାପମାତ୍ରା ୩୬.୭ ଡିଗ୍ରୀ ସେଲସିୟସ୍ ସହ ବଲାଙ୍ଗିର ରାଜ୍ୟର ଉତ୍ତପ୍ତ ସହର ଭାବେ ଉଭା ହୋଇଛି । ରାଜ୍ୟର ୧୧ ସହରରେ ପାରଦ ୩୪ ଡିଗ୍ରୀ ଉପରେ ରହିଛି । ଟିଟିଲାଗଡ଼ରେ ପାରଦ ୩୬ ଡିଗ୍ରୀ ରେକର୍ଡ ହୋଇଥିବା ବେଳେ ପାରଳାଖେମୁଣ୍ଡିରେ ୩୫.୮ ଡିଗ୍ରୀ, ଝାରସୁଗୁଡ଼ାରେ ୩୫.୬ ଡିଗ୍ରୀ, ସମ୍ବଲପୁରରେ ୩୫.୧ ଡିଗ୍ରୀ, ଭବାନୀପାଟଣାରେ ୩୫ ଡିଗ୍ରୀ ରେକର୍ଡ ହୋଇଛି ।
📱 Get Argus News App
✨ସେହିଭଳି ଭୁବନେଶ୍ଵରରେ ପାରଦ ୩୪.୯ ଡିଗ୍ରୀ ରେକର୍ଡ ହୋଇଥିବା ବେଳେ ସୋନପୁରରେ ୩୪.୮ ଡିଗ୍ରୀ, ଭଦ୍ରକରେ ୩୪.୫ ଡିଗ୍ରୀ ଏବଂ ଅନୁଗୁଳ ଓ ସୁନ୍ଦରଗଡ଼ରେ ପାରଦ ୩୪.୧ ଡିଗ୍ରୀ ରେକର୍ଡ କରାଯାଇଛି । କଟକରେ ସର୍ବୋଚ୍ଚ ଦିନ ତାପମାତ୍ରା ୩୩ ଡିଗ୍ରୀ ରହିଛି ।
ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ଆକଳନ ଅନୁସାରେ, ଆଗାମୀ ୫ ଦିନ ଯାଏ ରାଜ୍ୟରେ ଶୁଖିଲା ପାଗ ଲାଗି ରହିବ । ଆଗାମୀ ୨ ଦିନ ପାଇଁ ଘନ କୁହୁଡ଼ି ନେଇ କେତକ ଜିଲ୍ଲାକୁ ପାଣିପାଗ ବିଭାଗ ୟେଲୋ ଆଲର୍ଟ ଦେଇଛି । ତେବେ ମାଘ ନ ସରୁଣୁ ଫେବ୍ରୁଆରୀ ପହିଲାରୁ ତାତି ବଢ଼ିଛି । ଫେବ୍ରୁଆରୀରେ ପାରଦ ୩୬ ଟପିଥିବାରୁ ମାର୍ଚ୍ଚ, ଏପ୍ରିଲ୍ ଓ ମେରେ ସ୍ଥିତି କଣ ହେବ ତାକୁ ନେଇ ଚିନ୍ତା ପ୍ରକଟ କରିଛନ୍ତି ପରିବେଶବିତ୍ ।