ଯୁବପିଢ଼ିଙ୍କୁ ସଚେତନ କରିବେ ସରକାର, ଶିକ୍ଷାନୁଷ୍ଠାନରେ ହେବ ସେଫ୍ କ୍ୟାମ୍ପେନ୍

ଭୁବନେଶ୍ଵର: ଛାତ୍ରଛାତ୍ରୀଙ୍କ ମାନସିକ ସନ୍ତୁଳନ ଠିକ୍ ରହିବ । କୌଣସି ପରିସ୍ଥିତିରେ କେହି ବି ଆତ୍ମହତ୍ୟା ଭଳି ଦୁର୍ଭାଗ୍ୟଜନକ ପଦକ୍ଷେପ ନେବେ ନାହିଁ ସେଥିପ୍ରତି ସରକାର ଦୃଷ୍ଟି ଦେଉଛନ୍ତି । ଯୁବପିଢ଼ିଙ୍କ ମଧ୍ୟରେ ଆତ୍ମହତ୍ୟା ପ୍ରବଣତା ରୋକିବା ପାଇଁ ସବୁ କଲେଜ ଓ ବିଶ୍ୱ ବିଦ୍ୟାଳୟରେ ସେଫ୍ କ୍ୟାମ୍ପେନ୍ କରିବ ଉଚ୍ଚଶିକ୍ଷା ବିଭାଗ । ଏନେଇ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ସୂଚନା ଦେଇଛନ୍ତି ।

ଉଚ୍ଚଶିକ୍ଷା ମନ୍ତ୍ରୀ କହିଛନ୍ତି, ଶକ୍ତିଶ୍ରୀ ଯୋଜନାରେ ସେଫ୍ କ୍ୟାମ୍ପେନ୍ କରାଯିବ । ଛୋଟ ଛୋଟ ଘଟଣାକୁ ନେଇ କେହି ଯେମିତି ଦୁର୍ଭାଗ୍ୟଜନକ ପଦକ୍ଷେପ ନ ନେବେ ସଚେତନତା କରାଯିବ । ସମସ୍ତେ ସମସ୍ତଙ୍କୁ ସାହାଯ୍ୟ କରିବାକୁ ପଡ଼ିବ । ଯଦି କେହି ଜାଣୁଛନ୍ତି ଜଣେ ମାନସିକ ଅବସାଦ ଆଡ଼କୁ ଯାଉଛି, ତାକୁ ଫୋରମକୁ ଯିବାକୁ ପ୍ରବର୍ତ୍ତାଇବା ପଡ଼ିବ । ଏହାଦ୍ଵାରା ଅଭିଯୁକ୍ତ ଧରା ପଡ଼ିବ, ତାକୁ ଦଣ୍ଡ ଦିଆଯାଇ ପାରିବ ।

ଶକ୍ତିଶ୍ରୀ ଯୋଜନାରେ ଅନେକ କଥା ରହିଛି । ସେଥିମଧ୍ୟରୁ ସେଫ୍ କ୍ୟାମ୍ପେନ୍ ଗୋଟିଏ ବୋଲି କହିଛନ୍ତି ଉଚ୍ଚଶିକ୍ଷା ମନ୍ତ୍ରୀ । ସେଫ୍ କ୍ୟାମ୍ପେନ୍ ମାଧ୍ୟମରେ ଛାତ୍ରଛାତ୍ରୀଙ୍କର ମାନସିକ ସ୍ଥିତିକୁ ଅନୁଧ୍ୟାନ କରାଯାଇ ପାରିବ । ଛାତ୍ରଛାତ୍ରୀଙ୍କ ମଧ୍ୟରେ ଆତ୍ମହତ୍ୟା ପ୍ରବଣତା ରୋକିବାକୁ ସରକାର ବ୍ୟାପକ ପଦକ୍ଷେପ ନେଉଥିବା କହିଛନ୍ତି ଉଚ୍ଚଶିକ୍ଷା ମନ୍ତ୍ରୀ । ଆତ୍ମହତ୍ୟା ପ୍ରବଣତାକୁ ରୋକିବା ପାଇଁ ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ପିତାମାତା ଓ ଶିକ୍ଷକ ମାନଙ୍କୁ ନେଇ ଅନୁକୂଳ ପରିବେଶ ସୃଷ୍ଟି କରାଯିବ ।

ବାଲେଶ୍ଵର ଘଟଣା ପରେ ଯୁବପିଢ଼ିଙ୍କ ମଧ୍ୟରେ ଆତ୍ମହତ୍ୟା ପ୍ରବଣତାକୁ ନେଇ ଚିନ୍ତା ବଢ଼ିଛି । ସବୁ କଲେଜ ଗୁଡ଼ିକରେ ଇଣ୍ଟରନାଲ କମିଟି ଗଠନ କରାଯାଇଥିବା କହିଛନ୍ତି ମନ୍ତ୍ରୀ । ସରକାର ଓ ଉଚ୍ଚଶିକ୍ଷା ବିଭାଗର ଏଭଳି ବିଭିନ୍ନ ପଦକ୍ଷେପ ଛାତ୍ରଛାତ୍ରୀଙ୍କ ମାନସିକ ଅବସାଦ ଦୂର କରିବ ବୋଲି ଆଶା କରାଯାଉଛି ।