ଭୁବନେଶ୍ଵର: ଉତ୍କର୍ଷ ଓଡ଼ିଶା କନକ୍ଲେଭର ପ୍ରଥମ ଦିନରେ ପୁଞ୍ଜିନିବେଶ କ୍ଷେତ୍ରରେ ରାଜ୍ୟକୁ ମିଳିଛି ଅଭୂତପୂର୍ବ ସଫଳତା । ଏବେ ଯାଏଁ ୫୪ଟି କମ୍ପାନୀଙ୍କ ସହ MOU ସ୍ଵାକ୍ଷର ହୋଇସାରିଲାଣି । ଆଦାନୀ ଗ୍ରୁପ୍ ୨.୨୮ ଲକ୍ଷ କୋଟି ଟଙ୍କା ଓ JSPL ଓଡ଼ିଶାରେ ୭୦ ହଜାର କୋଟିର ନିବେଶ କରିବାକୁ ଘୋଷଣା କରିଛନ୍ତି । କେନ୍ଦୁଝରରେ JSW କରିବ ୫ ମିଲିୟନ ଟନ୍ କ୍ଷମତା ବିଶିଷ୍ଟ ଷ୍ଟିଲ୍ ପ୍ଲାଣ୍ଟ । ମୁଖ୍ୟମନ୍ତ୍ରୀ କହିଛନ୍ତି- ଶିଳ୍ପ କ୍ଷେତ୍ରରେ ଓଡ଼ିଶା ଦେଶର ଡ୍ରାଇଭିଂ ଇଞ୍ଜିନ ହେବାକୁ ଯାଉଛି ।

ଉତ୍କର୍ଷ ଓଡ଼ିଶା କନକ୍ଲେଭର ପ୍ରଥମ ଦିନ ଓଡ଼ିଶାରେ ଶିଳ୍ପାୟନ ଓ ରୋଜଗାର ଦୃଷ୍ଟିରୁ ସୃଷ୍ଟି କରିଛି ଅପାର ସମ୍ଭାବନା । ଓଡ଼ିଶାରେ ଶିଳ୍ପାୟନ ଓ ପୁଞ୍ଜିନିବେଶ ପାଇଁ ପ୍ରଧାନମନ୍ତ୍ରୀଙ୍କ ଗ୍ୟାରେଣ୍ଟି ପରେ ପ୍ରଥମ ଦିନରେ ହିଁ ପୁଞ୍ଜି ନିବେଶ ପାଇଁ ପ୍ରସ୍ତାବ ଆସିବାରେ ପୂର୍ବର ସବୁ ରେକର୍ଡ ହୋଇଛି ପାର । ବର୍ତ୍ତମାନ ସୁଦ୍ଧା ୫୪ଟି କମ୍ପାନୀଙ୍କ ସହ ବୁଝାମଣା ପତ୍ର ସ୍ଵାକ୍ଷରିତ ହୋଇ ସାରିଛି । ଏହି ସଂଖ୍ୟା ୮୦ ପାର କରିବାର ରହିଛି ସମ୍ବାବନା ।

ପ୍ରଥମ ଦିନରେ ସବୁଠୁ ବଡ଼ ପୁଞ୍ଜି ନିବେଶର ପ୍ରସ୍ତାବ ଆସିଛି ଆଦାନୀ ଗ୍ରୁପ ପକ୍ଷରୁ । ଓଡ଼ିଶାରେ ୨ ଲକ୍ଷ ୨୮ ହଜାର କୋଟି ଟଙ୍କାର ପୁଞ୍ଜି ନିବେଶ ପାଇଁ ପ୍ରସ୍ତାବ ଦେଇଛି ଅଦାନୀ ଗ୍ରୁପ୍ । କମ୍ପାନୀ ପକ୍ଷରୁ ସିମେଣ୍ଟ, ପାୱାର, ଆଲୁମିନା, ସ୍ମେଲ୍ଟାର ଓ ଏନର୍ଜି କ୍ଷେତ୍ରରେ ଏହି ପୁଞ୍ଜି ନିବେଶ ପାଇଁ ପ୍ରସ୍ତାବ ଆସିଥିବା ସୂଚନା ଦେଇଛନ୍ତି ଶିଳ୍ପ ସଚିବ ହେମନ୍ତ ଶର୍ମା ।

ସେହିପରି ଜେଏସପିଏଲ ମୁଖ୍ୟ ନବୀନ ଜିନ୍ଦଲ ଓଡ଼ିଶାରେ ୭୦ ହଜାର କୋଟି ଟଙ୍କାର ପୁଞ୍ଜି ନିବେଶ ପାଇଁ କରିଛନ୍ତି ଘୋଷଣା । ବର୍ତ୍ତମାନ ଅନୁଗୁଳରେ ଜେଏସପିଏଲର ୬ ମିଲିୟନ ଟନ୍ ଉତ୍ପାଦନକ୍ଷମତା ବିଶିଷ୍ଟ ପ୍ଲାଣ୍ଟ କାର୍ଯ୍ୟକ୍ଷମ ଥିବା ବେଳେ ଆଗାମୀ ୧ ବର୍ଷ ମଧ୍ୟରେ ଏହାର କ୍ଷମତା ୧୨ ମିଲିଅନ ଟନକୁ ବୃଦ୍ଧି କରିବାକୁ ଘୋଷଣା କରିଛନ୍ତି କମ୍ପାନୀ ମୁଖ୍ୟ ତଥା ସାଂସଦ ନବୀନ ଜିନ୍ଦଲ ।

ସେହପରି ମୁଖ୍ୟମନ୍ତ୍ରୀଙ୍କ ଆଗ୍ରହ କ୍ରମେ କେନ୍ଦୁଝରରେ ଏକ ବଡ ଷ୍ଟିଲ ପ୍ଲାଣ୍ଟ ପ୍ରତିଷ୍ଠା ପାଇଁ ସରକାରଙ୍କ ସହ ଆଲୋଚନା ହୋଇଥିବା କହିଛନ୍ତି ନବୀନ ଜିନ୍ଦଲ । ଏହାଛଡ଼ା ମୁଖ୍ୟମନ୍ତ୍ରୀଙ୍କ ଉପସ୍ଥିତରେ କେଉଁଝର ଜିଲ୍ଲାରେ JSW ପକ୍ଷରୁ ଷ୍ଟିଲ ପ୍ଲାଣ୍ଟ ପାଇଁ MOU ସ୍ଵାକ୍ଷରିତ ହୋଇଛି । ୫ ମିଲିୟନ ଟନ୍ କ୍ଷମତା ବିଶିଷ୍ଟ ଏହି ଷ୍ଟିଲ ପାଇଁ ୩୫ ହାଜର କୋଟି ଟଙ୍କା ନିବେଶ କରିବ ଜେଏସଡବ୍ଲୁ ।

ଉତ୍କର୍ଷ ଓଡ଼ିଶା କନକ୍ଲେଭ ଉଦଘାଟନୀ ସତ୍ରରେ ନିଜ ସ୍ଵାଗତ ଭାଷଣ ରଖି ମୁଖ୍ୟମନ୍ତ୍ରୀ ମୋହନ ଚରଣ ମାଝି କହିଥିଲେ, ଆଜି ଆମ ପାଇଁ ଗର୍ବ ଓ ଗୌରବର ଦିନ । ପ୍ରଧାନମନ୍ତ୍ରୀ ସବୁ ଗସ୍ତରେ ଓଡ଼ିଶାକୁ କିଛି ନା କିଛି ଉପହାର ଆଣି ଆସିଥାନ୍ତି ଏବଂ ଆଜି ଯେଉଁ ଉପହାର ଆଣିକି ଆସିଛନ୍ତି ତାହା ଓଡ଼ିଶାର ଦିଶା ବଦଳାଇ ଦେବ । ପୂର୍ବୋଦୟ ଢାଞ୍ଚାର ଆଜି ଶୁଭାରମ୍ଭ ହେବାକୁ ଯାଉଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ।

ମୁଖ୍ୟମନ୍ତ୍ରୀ କହିଛନ୍ତି, ଶିଳ୍ପ କ୍ଷେତ୍ରରେ ଓଡ଼ିଶା ବନିବାକୁ ଯାଉଛି ଦେଶର ଡ୍ରାଇଭିଂ ଇଞ୍ଜିନ୍ । ସିଙ୍ଗାପୁର ରାଷ୍ଟ୍ରପତି ଓଡ଼ିଶା ଆସିବା ଏବଂ ୮ ଟି ଏମଓୟୁ ସ୍ଵାକ୍ଷର କରିବା ଆମ ପାଇଁ ବହୁତ ବଡ଼ କଥା । ସମସ୍ତ ଶିଳ୍ପପତିଙ୍କ ପାଇଁ ଓଡ଼ିଶାର ଦ୍ଵାର ସବୁବେଳେ ଖୋଲା ରହିଛି । ସମସ୍ତେ ଓଡ଼ିଶାରେ ଶିଳ୍ପ ପ୍ରତିଷ୍ଠା ପାଇଁ ଆଗେଇ ଆସିବାକୁ ଶିଳ୍ପ ଜଗତକୁ ଆହ୍ଵାନ ଦେଇଛନ୍ତି ମୁଖ୍ୟମନ୍ତ୍ରୀ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV