ଭୁବନେଶ୍ଵର: ଗୁଇଲେନ୍ ବାରେ ସିଣ୍ଡ୍ରୋମକୁ ନେଇ ମହାରାଷ୍ଟ୍ରରେ ଆତଙ୍କ ଖେଳିଥିବା ବେଳେ ସତର୍କ ରହିଛି ଓଡ଼ିଶା । ପ୍ରତିକ୍ରିୟା ରଖି ଜନସ୍ଵାସ୍ଥ୍ୟ ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର କହିଛନ୍ତି, ମାରାତ୍ମକ ଭୂତାଣୁ ଦ୍ୱାରା ଗୁଇଲେନ୍ ବାରି ସିଣ୍ଡ୍ରୋମ ବିଭିନ୍ନ ରାଜ୍ୟରେ ବ୍ୟାପୁଛି । ଏହା ଏକ ଜଳ ବାହିତ ରୋଗ । 

ଏଥିରେ ଆକ୍ରାନ୍ତ ହେଲେ ରୋଗୀ ଦୁର୍ବଳ ହେବା ସହ ପାରାଲିସିସ ବା ପକ୍ଷାଘାତ ହେବାର ଲକ୍ଷଣ ଦେଖା ଦେଉଛି । ମହାରାଷ୍ଟ୍ର, ଗୁଜୁରାଟ ପରେ ଏବେ ପଶ୍ଚିମବଙ୍ଗରେ ବି ଏହି ମାମଲା ନଜର ଆସିଲାଣି । ଓଡ଼ିଶାରେ ଜଣେ ବି ରୋଗୀ ଚି଼ହ୍ନଟ ହୋଇ ନାହାନ୍ତି । ତେବେ ଏହି ରୋଗ ପ୍ରତି ସ୍ଵାସ୍ଥ୍ୟ ବିଭାଗ ସତର୍କ ରହିଛି ।

ଗୁଇଲେନ୍ ବାରେ ସିଣ୍ଡ୍ରୋମ ନେଇ ଏବେ ସୁଦ୍ଧା କେନ୍ଦ୍ର କୌଣସି ଗାଇଡଲାଇନ୍ ଜାରି କରିନି । କେନ୍ଦ୍ର ସରକାରଙ୍କ ନିର୍ଦ୍ଦେଶ ଆସିଲେ, ସେହି ଅନୁସାରେ ପଦକ୍ଷେପ ନିଆଯିବ ବୋଲି କହିଛନ୍ତି ଜନସ୍ଵାସ୍ଥ୍ୟ ନିର୍ଦ୍ଦେଶକ ।

ମହାରାଷ୍ଟ୍ରରେ ଗୁଇଲେନ୍ ବାରେ ସିଣ୍ଡ୍ରୋମରେ ଏବେ ସୁଦ୍ଧା ୧୬୩ ଜଣ ଆକ୍ରାନ୍ତ ହୋଇଥିବା ବେଳେ ୫ ଜଣଙ୍କ ମୃତ୍ୟୁ ହୋଇଛି । ତେବେ ବ୍ରିଟେନ୍‌ରେ ପ୍ରତିବର୍ଷ ଗୁଇଲେନ୍ ବାରେ ସିଣ୍ଡ୍ରୋମରେ ପ୍ରାୟ ୧୫୦୦ ଲୋକ ଆକ୍ରାନ୍ତ ହୋଇଥିବା ଜଣାପଡ଼ିଛି ।