ଭୁବନେଶ୍ଵର: ଦୀର୍ଘ ଦିନର ଅଚଳାବସ୍ଥା ପରେ ସ୍ଵାଭାବିକ ହୋଇଛି ବିଧାନସଭା । ଆଜି ପ୍ରଶ୍ନକାଳରେ ଗୃହରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ସମ୍ପର୍କିତ ଆଲୋଚନା ହୋଇଛି । ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି, ମିଶ୍ରଣ ପରେ ବନ୍ଦ ହୋଇ ଯାଇଥିବା ବିଦ୍ୟାଳୟ ପୁଣି ଖୋଲିପାରେ ।

ମନ୍ତ୍ରୀ କହିଛନ୍ତି, ଛାତ୍ରଛାତ୍ରୀ ସଂଖ୍ୟା କମ୍ ଥିବା ୫ ହଜାର ୬୩୨ଟି ସ୍କୁଲକୁ ପୂର୍ବ ବିଜେଡି ସରକାର ମିଶ୍ରଣ କରିଥିଲେ । ୧୦୦ ମିଟର ବ୍ୟବଧାନରେରେ ଥିବା ୨୧୫୨ଟି ସାଟେଲାଇଟ ସ୍କୁଲକୁ ବି ମିଶ୍ରଣ କରାଯାଇଛି । ସେ କହିଛନ୍ତି, ସଂରକ୍ଷିତ ଅଞ୍ଚଳରେ ୨୦ ଓ ଅଣସଂରକ୍ଷିତ ଅଞ୍ଚଳରେ ୪୦ ପିଲା ଥିଲେ ସ୍କୁଲ ଖୋଲିବାକୁ ବିଚାର କରାଯିବ ।

ବନ୍ଦ ଥିବା ସ୍କୁଲ୍‌କୁ ପୁନଃ ଖୋଲିବାକୁ ପ୍ରସ୍ତାବ ଆସିଲେ, ଜିଲ୍ଲାସ୍ତରୀୟ ଯାଞ୍ଚ ପ୍ରଥମେ ହୁଏ । ଏହା ପରେ ରାଜ୍ୟସ୍ତରୀୟ କମିଟିକୁ ପଠାଯାଏ । ରାଜ୍ୟସ୍ତରୀୟ କମିଟିର ସୁପାରିସ୍ ଅନୁସାରେ, ବନ୍ଦ ସ୍କୁଲ୍‌କୁ ଖୋଲାଯିବାର ବ୍ୟବସ୍ଥା ରହିଛି । ତେବେ ପୂର୍ବ ସରକାର ଠିକ୍ ଭାବେ ବିଚାର ନ କରି ତରବରିଆ ଭାବେ ନିଷ୍ପତ୍ତି ନେଇଥିବା କହିଛନ୍ତି ମନ୍ତ୍ରୀ ।

ରାଜ୍ୟରେ ବିଜେପି ସରକାର ଆସିବା ପରେ ନିଯୁକ୍ତି ପାଇଛନ୍ତି ୧୮ ହଜାରରୁ ଅଧିକ ଶିକ୍ଷକ । ଆଗକୁ ଖୁବ୍‌ଶୀଘ୍ର ଆହୁରି ୧୦ ହଜାର ଶିକ୍ଷକ ନିଯୁକ୍ତ ହେବେ । ସେପଟେ ପିଅନ ଓ କିରାଣିର ବି ଆବଶ୍ୟକତା ଦେଖି ନିଯୁକ୍ତି ଦିଆଯିବ ବୋଲି ଗୃହରେ ଉତ୍ତର ରଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । କହିଛନ୍ତି, ଆମ ସରକାର ଶିକ୍ଷା କ୍ଷେତ୍ରକୁ ଗୁରୁତ୍ଵ ଦେଉଛି, ଆମ ବିଭାଗରେ ସବୁଠୁ ଅଧିକ ନିଯୁକ୍ତି ଦିଆ ଯାଉଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more