ପାଟଣାଗଡ଼: ଜ୍ଵର ଓ ଝାଡ଼ାରେ ଚାଲିଗଲା ୨ ଜଣଙ୍କ ଜୀବନ । ୨୪ ଘଣ୍ଟା ଭିତରେ ଗାଁରେ ୨ ଜଣଙ୍କ ମୃତ୍ୟୁକୁ ନେଇ ସମସ୍ତେ ଆଶଙ୍କା ଭିତରେ । ଜ୍ଵର ଓ ଝାଡ଼ାରେ ୨ ଜଣଙ୍କ ମୃତ୍ୟୁ ଘଟିଥିବା ଲୋକେ କହୁଥିବା ବେଳେ ଡାକ୍ତରୀ ଟିମ୍ କହୁଛି ଅନ୍ୟ କାରଣରୁ ମୃତ୍ୟୁ ହୋଇଛି । ଗୋଟିଏ ଦିନରେ ଦୁଇ ଜଣଙ୍କ ମୃତ୍ୟୁ ପରେ ପାଟଣାଗଡ଼ ବ୍ଲକ କେରବେଡ଼ା ଗାଁରେ ଖେଳି ଯାଇଛି ଆତଙ୍କ ।

ମାତ୍ର ୨୪ ଘଣ୍ଟା ଭିତରେ ଗାଁର ୨ ଜଣଙ୍କ ମୃତ୍ୟୁ ପରେ ଗାଁରେ ପହଞ୍ଚିଛି ଡାକ୍ତରୀ ଦଳ । ଘଷିଏନା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରର ଡାକ୍ତରୀ ଦଳ ଗାଁରେ ଘରକୁ ଘର ବୁଲି ଲୋକଙ୍କ ସ୍ଵାସ୍ଥ୍ୟ ପରୀକ୍ଷା କରିଛନ୍ତି । ଲୋକଙ୍କୁ ଔଷଧ ସହ ଓଆରଏସ୍ ଦେବା ସହ ସଚେତନ କରିଛନ୍ତି ଡାକ୍ତରୀ ଦଳ । ସେପଟେ ପ୍ରଶାସନ ପକ୍ଷରୁ ଗାଁରେ ପାନୀୟ ଜଳ ନମୁନା ମଧ୍ୟ ସଂଗ୍ରହ କରାଯାଇଛି ।

ଏବେ ଗାଁରେ ଜ୍ଵର ଓ ଝାଡ଼ାରେ କେହି ଆକ୍ରାନ୍ତ ନଥିବା ଡାକ୍ତର ସୂଚନା ଦେଇଛନ୍ତି । ତେବେ ଗୁରୁବାର ଗାଁର ଦୁଇଜଣଙ୍କର ମୃତ୍ୟୁ କେମିତି ହେଲା ? ଡାକ୍ତରଙ୍କ କହିବା ଅନୁସାରେ, ଝାଡ଼ାବାନ୍ତିରେ କାହାରି ମୃତ୍ୟୁ ହୋଇନାହିଁ । ତେବେ କେଉଁ କାରଣରୁ ମୃତ୍ୟୁ ହେଲା ତାହା ସ୍ପଷ୍ଟ ହୋଇନି ।

ଜଣଙ୍କର ମୃତ୍ୟୁ ବଲାଙ୍ଗିର ହସ୍ପିଟାଲରେ ହୋଇଥିବା ବେଳେ ଅନ୍ୟ ଜଣେ ଅସୁସ୍ଥ ଘରେ ଚିକିତ୍ସିତ ହେଉଥିବା ବେଳେ ଆଖି ବୁଜିଛନ୍ତି । ଝାଡ଼ାରେ ଆକ୍ରାନ୍ତ ଜଣଙ୍କ ମେଡିକାଲରେ ମୃତ୍ୟୁବରଣ କରିଥିବା କହିଛନ୍ତି ଗ୍ରାମବାସୀ । ତେବେ ଗୋଟିଏ ଦିନରେ ଦୁଇ ଜଣଙ୍କ ମୃତ୍ୟୁ ପରେ ଗାଁରେ ଶୋକର ଛାୟା ଖେଳି ଯାଇଛି ।

ଓଡ଼ିଶା ସମ୍ପର୍କିତ ଖବର ପଢ଼ନ୍ତୁ