ଅର୍ଗସ ବ୍ୟୁରୋ: ପନିପରିବା ଚାଷୀଙ୍କ ପାଇଁ ଖୁସି ଖବର । ଆଉ ଅଭାବି ବିକ୍ରି କରିବେନି ଓଡିଆ ଚାଷୀ । ଉତ୍ପାଦିତ ଆଳୁ, ପନିପରିବା ଓ ଫଳକୁ ବର୍ଷ ସାରା ଦୀର୍ଘ ଦିନ ପାଇଁ ରଖି ପାରିବେ ସାଇତି । ସୌର ଶକ୍ତି ଏବଂ ବାୟୋ ମାସ ବ୍ୟବହାର କରି ୫୮ ସବଡିଭିଜନରେ ହେବ ୫୮ଟି ଶୀତଳ ଭଣ୍ଡାର । ଅକ୍ଷୟ ଶକ୍ତି ବା ସୌର ଶକ୍ତି ଅଧିକରୁ ଅଧିକ ବ୍ୟବହାର କରିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭିଜନ । ଯେହେତୁ ବିଦ୍ୟୁତ ସମସ୍ୟା ରହୁଛି । ସବୁବେଳେ ବିଦ୍ୟୁତ ଉପଲବ୍ଧ ହେଉନାହିଁ । ତେଣୁ ଶୀତଳ ଭଣ୍ଡାର ପାଇଁ ସୌର ଶକ୍ତି ବ୍ୟବହାର କରିବାକୁ ଉଦ୍ୟମ ଚାଲିଛି ବୋଲି କହିଛନ୍ତି ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ଶୀତଳ ଭଣ୍ଡାରରେ ଲାଗିବ ଅତ୍ୟାନୁଧିକ ମଡେଲର ଅଟୋମେଟିକ ମେସିନ । AI ଜ୍ଞାନ କୌଶଳ ବ୍ୟବହାର ପାଇଁ ବିଚାର କରୁଛନ୍ତି ସରକାର । କେଉଁ ପନିପରିବା ପାଇଁ ଆବଶ୍ୟକ ତାପମାତ୍ରାକୁ ନିୟନ୍ତ୍ରଣ କରିବ AI । ନୂଆ ଜ୍ଞାନ କୌଶଳରେ ଶୀତଳ ଭଣ୍ଡାର ପ୍ରତିଷ୍ଠା ପାଇଁ ।

ସରକାରୀ ଉଦାସୀନତା, ସଠିକ୍ ଜ୍ଞାନ କୌଶଳ ବ୍ୟବହାର ନକରିବା ଏବଂ ବିଦ୍ୟୁତ ସମସ୍ୟା ଯୋଗୁଁ ପୂର୍ବ ବିଜେଡି ସରକାର ସମୟରୁ ରାଜ୍ୟରେ ଥିବା ୧୩୩ ଶୀତଳ ଭଣ୍ଡାରରୁ ୯୭ ଅଚଳ ହୋଇ ପଡି ରହିଛି । ଏଇ ଯେମିତି ପୁରୀ ଜିଲ୍ଲା ପିପିଲି ସାତଶଂଖ ଠାରେ ଥିବା ଉତ୍ତରାୟଣୀ ସମବାୟ ଶୀତଳଭଣ୍ଡାର । ଯାହା ଉପରେ ପୁରୀ ଜିଲ୍ଲାର ୮ ଗୋଟି ବ୍ଲକର ଚାଷୀ ନିର୍ଭର କରନ୍ତି । କିନ୍ତୁ ଗତ ଫନି ଠାରୁ ଭାଙ୍ଗିରୁଜି ପଡ଼ିରହିଛି । ବିଦ୍ୟୁତ ବିଲ ବକେୟା ଥିବା ଯୋଗୁଁ ଏହି ଶୀତଳ ଭଣ୍ଡାରଟି ପୁନଃ କାର୍ଯ୍ୟକ୍ଷମ ହୋଇ ପାରୁନି । ଆଉ ଚାଷୀ ପନିପରିବା ଚାଷରୁ ମୁଁହ ଫେରାଇ ଦାଦନ ଯିବାକୁ ବାଧ୍ୟ ହେଉଛନ୍ତି । ତେବେ ଓଡିଶାରେ ବିଜେପି ସରକାର ଆସିବା ପରେ ଉନ୍ନତ ଜ୍ଞାନ କୌଶଳ ବ୍ୟବହାରରେ ଶୀତଳ ଭଣ୍ଡାର କରାଯିବାକୁ ସ୍ଵାଗତ କରିଛନ୍ତି ଚାଷୀ ।

ଶୀତଳ ଭଣ୍ଡାର ଗୁଡିକୁ ବିଦ୍ୟୁତ ବିଲରେ ୫୦ ପ୍ରତିଶତ ରିହାତି ଦେବାକୁ ସ୍ଥିର କରିଛନ୍ତି ରାଜ୍ୟ ସରକାର । ତେବେ ସୌର ଶକ୍ତି ଚାଳିତ ଶୀତଳ ଭଣ୍ଡାର ହେଲେ ତାହା ଦୀର୍ଘ ମିଆଦୀ ହୋଇପାରିବ । ଶୀତଳ ଭଣ୍ଡାର ମାଲିକ ମାନଙ୍କର ବିଦ୍ୟୁତ ଖର୍ଚ୍ଚ ବହୁତ କମିଯିବ । ବଡ ଶୀତଳ ଭଣ୍ଡାର ଗୁଡିକ ପାଇଁ ଅଧିକ ପୁଞ୍ଜିନିବେଶ ଆବଶ୍ୟକ । ତେଣୁ ସରକାର ଯଦି ଏ ନେଇ ଯୋଜନା କରିଛନ୍ତି, ତେବେ ଏହା ସ୍ଵାଗତ ଯୋଗ୍ୟ ପଦକ୍ଷେପ ବୋଲି କହିଛନ୍ତି ରାଜ୍ୟ ଶୀତଳ ଭଣ୍ଡାର ସଂଘ ସଭାପତି ଜନାର୍ଦ୍ଦନ ସାହୁ । 

ବିଜେଡି ସରକାର ବେଳେ ରାଜ୍ୟରେ ଶୀତଳ ଭଣ୍ଡାର ସବୁ ବନ୍ଦ ହୋଇ ପଡିଥିବାରୁ ପନିପରିବା ଚାଷରୁ ମୁହଁ ଫେରାଉଥିଲେ ଚାଷୀ । ଆଉ ଯାହା ଅଳ୍ପ ବହୁତ ଅମଳ ହେଉଥିଲା, ତାକୁ ସଂରକ୍ଷଣ ସୁବିଧା ନଥିବାରୁ ଅଭାବୀ ବିକ୍ରି କରିବାକୁ ଚାଷୀ ବାଧ୍ୟ ହେଉଥିଲେ । ଆଳୁ ମିଶନ ବି ଫେଲ ମାରିଥିଲା । ଆଳୁ, ପିଆଜଠୁ ଆରମ୍ଭ କରି ପନିପରିବା ପାଇଁ ଅନ୍ୟ ରାଜ୍ୟ ଉପରେ ନିର୍ଭର କରୁଥିଲେ ଓଡିଶା ବାସୀ । ହେଲେ ଏବେ ବିଜେପି ସରକାରଙ୍କ ପଦକ୍ଷେପ ଆଗକୁ ଓଡିଶାକୁ ଆତ୍ମନିର୍ଭରଶୀଳ କରିବ ବୋଲି ସଂଚାର ହୋଇଛି ନୂଆ ଆଶା ।