ଯାତ୍ରୀଙ୍କ ବିଶ୍ଵାସ ଜିତୁଛି ଓଡ଼ିଶା ଯାତ୍ରୀ, ଚାଳକଙ୍କୁ ଦେବାକୁ ପଡ଼ୁନି କମିଶନ

ଭୁବନେଶ୍ଵର: ଘରୁ କୁଆଡ଼େ ଯିବାର ଅଛି, ଅନଲାଇନ୍‌ରୁ ଭଡ଼ାରେ ଗାଡ଼ି ଦରକାର । ସେଥିରେ ପୁଣି କୌଣସି ଲୁଚାଛପା ଦେୟ ନଥିବ । ଯାତ୍ରୀଙ୍କ ସହ ଚାଳକ ବି ହଇରାଣ ହେଉ ନଥିବେ । ଏମିତି ଏକ ସୁନ୍ଦର ପରିକଳ୍ପନାକୁ ଓଡ଼ିଶାରେ ବାସ୍ତବତାର ରୂପ ଦେଇଛି ଓଡ଼ିଶା ଯାତ୍ରୀ । ଦୈତ୍ୟ ନଗରୀ କଟକ-ଭୁବନେଶ୍ଵରରେ ଓଡ଼ିଶା ଯାତ୍ରୀ ଆପ୍ କାର୍ଯ୍ୟକ୍ଷମ ହୋଇଥିବା ବେଳେ ଲୋକଙ୍କ ଯାତାୟାତ ସୁଗମ ହୋଇଛି ।

ଓଡ଼ିଶା ଯାତ୍ରୀ ଆପ୍ଲିକେସନରେ ଯାତ୍ରୀଙ୍କ ସହ ଚାଳକଙ୍କ ସୁରକ୍ଷାକୁ ଧ୍ୟାନ ଦିଆଯାଇଛି । ଯେଉଁଥିପାଇଁ ଏବେ ଓଡ଼ିଶା ଯାତ୍ରୀ ଲୋକପ୍ରିୟ ହେବା ସହ ଜିତୁଛି ହଜାର ହଜାର ଯାତ୍ରୀଙ୍କ ଭରସା । ସଡ଼କ ସୁରକ୍ଷା ମାସ ଅବସରରେ ଓଡ଼ିଶା ଯାତ୍ରୀକୁ ବିଧିବଦ୍ଧ ଭାବେ ଆରମ୍ଭ କରିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଯାହା ଏବେ ସହରୀ ଲୋକଙ୍କ ଯାତାୟାତରେ ହୋଇଛି ବଡ଼ ଅଂଶ ।

ଓଡ଼ିଶା ଯାତ୍ରୀ ଆପ୍‌ରେ ରିଅଲ ଟ୍ରାଇମ୍ ଟ୍ରିପ୍ ଟ୍ରାକିଂରୁ ନେଇ ଲାଇଭ୍ ଟ୍ରିପ୍ ସେୟାରିଂ ଭଳି ଆଡଭାନ୍ସ ଫିଚର ରହିଛି । ଏହି ଆପରେ ଏମରଜେନ୍ସି ହେଲପଲାଇନ୍ ୧୧୨ ସହ ଅନ୍ୟ ଜରୁରୀକାଳୀନ ସ୍ଥିତିରେ ଖବର ଦେବା ପାଇଁ ବ୍ୟବସ୍ଥା ରହିଛି । ଏହି ଆପ୍‌ରେ ଗାଡ଼ି ଚଳାଇବା ଲାଗି ପଞ୍ଜିକୃତ ପ୍ରତିଟି ଚାଳକଙ୍କ ଭେରିଫେକସନ କରାଯିବା ସହ ସେମାନଙ୍କୁ ସୁରକ୍ଷା ଟ୍ରେନିଂ ଦିଆ ଯାଉଛି । ଯାହାକି ଏବେ ଯାତ୍ରୀଙ୍କ ବିଶ୍ଵାସ ଭାଜନ ହୋଇ ପାରିଛି ।

ଦେଶରେ କାର୍ଯ୍ୟ କରୁଥିବା ପାରମ୍ପରିକ ଆପ୍ ଗୁଡ଼ିକ ଚାଳକଙ୍କ ଠାରୁ କମିଶନ୍ ନେଉଥିବା ବେଳେ ଓଡ଼ିଶା ଯାତ୍ରୀ ଆପ୍‌ରେ ଚାଳକଙ୍କୁ ଟଙ୍କା ଟିଏ ବି ଦେବାକୁ ପଡ଼ୁନି । ଟ୍ରିପ୍‌ରେ ଗ୍ରାହାକଙ୍କ ଠାରୁ ପାଉଥିବା ଅର୍ଥ ସମ୍ପୂର୍ଣ୍ଣ ଭାବେ ଚାଳକଙ୍କୁ ମିଳୁଛି । ଏହା କେବଳ ଚାଳକଙ୍କ ରୋଜଗାର ବଢ଼ାଉଛି ତା ନୁହେଁ ସେମାନଙ୍କୁ ପ୍ରେରଣା ବି ଯୋଗାଉଛି ।

ଗୃହ ଓ ନଗର ଉନ୍ନୟନ ମନ୍ତ୍ରୀ ଡ. କୃଷ୍ଣଚନ୍ଦ୍ର ମହାପାତ୍ର କହିଛନ୍ତି, ଓଡ଼ିଶା ଯାତ୍ରୀ କେବଳ ଏକ ମୋବିଲିଟି ଆପ୍ ନୁହେଁ । ଏହା ବିକଶିତ ଓଡ଼ିଶାକୁ ଲକ୍ଷ୍ୟ ରଖି କରାଯାଇଛି । ଯେଉଁଥିରେ ସହରୀ ଯାତାୟାତ ଆହୁରି ସୁରକ୍ଷିତ ହେବ । ଏହା ସହରୀ ଯାତାୟାତ କ୍ଷେତ୍ରରେ ଗେମ୍ ଚେଞ୍ଜର ସାବ୍ୟସ୍ତ ହେବ ।

ସେହିଭଳି ଯାତ୍ରୀଙ୍କ ସୁରକ୍ଷା ଲାଗି ଆପ୍‌ରେ ଧ୍ୟାନ ଦିଆଯାଇଛି । ଟ୍ରିପ୍ ସେୟାରିଂ ସହ ଅନ୍ୟ ବିକଳ୍ପ ରହିଛି । ଆଗକୁ ଏଆଇ ସଂଲଗ୍ନ ଅନ୍ୟ ଫିଚର ଦେବାକୁ ଓଡ଼ିଶା ଯାତ୍ରୀ ଲକ୍ଷ୍ୟ ରଖିଛି ।