ବ୍ରିଟିଶ ସଂସଦରେ ପହଞ୍ଚିଲା ଓଡ଼ିଶା କଟକର ବାଲିଯାତ୍ରା । ପ୍ରଥମଥର ପାଇଁ ଓଡ଼ିଶା ନୌବାଣିଜ୍ୟ ପରମ୍ପରାର ଐିତିହ୍ୟ ବ୍ରିଟିଶ୍‍ ସଂସଦରେ ପ୍ରଦର୍ଶିତ ହେବାକୁ ଯାଉଛି । ବ୍ରିଟେନ୍‍ ଓ ଓଡ଼ିଶାର ନୌବାଣିଜ୍ୟ ସମ୍ପର୍କକୁ ଏଥିରେ ପ୍ରଦର୍ଶିତ କରାଯିବ ବୋଲି ସ୍ଥିର ହୋଇଛି । ଓଡ଼ିଶା ପାଇଁ ଏହା ଅତ୍ୟନ୍ତ ଗର୍ବର ବିଷୟ । ଏହି ଖବର ପ୍ରତ୍ୟେକ ଓଡ଼ିଆଙ୍କ ମନରେ ଆଣିଛି ଗର୍ବ ଓ ଗୌରବ । ଏହି ବାଲିଯାତ୍ରା ଦୁଇଦିନ ଧରି ଚାଲିବ। ରାଜ୍ୟରେ ଏହି ଯାତ୍ରା ଶେଷ ହେବାର ଠିକ୍‍ ଦୁଇଦିନ ପରେ ହାଉସ୍‍ ଅଫ୍‍ ଲର୍ଡରେ ଏହାର ଆୟୋଜନ ଓଡ଼ିଶାର ଗୌରବକୁ ଅଧିକ ଉଜ୍ଜଳ କରିବା ସହ ଆନ୍ତର୍ଜାତିକ ସ୍ତରରେ ଓଡ଼ିଶାର ଏହି ସମୃଦ୍ଧଶାଳୀ ପରମ୍ପରାକୁ ମନେ ପକାଇବାରେ ସହାୟକ ହେବ।

ନଭେମ୍ବର ୧୪ ତାରିଖରେ ଏହା ବ୍ରିଟିଶ୍‍ ପାର୍ଲାମେଣ୍ଟର ଉଚ୍ଚ ସଦନ ତଥା ହାଉସ୍‍ ଅଫ୍‍ ଲର୍ଡସରେ ଉଦ୍‍ଘାଟନ ହେବ। ଓଡ଼ିଶା ସରକାର ଏବଂ ଲଣ୍ଡନରେ ଥିବା ଓଡ଼ିଆ ସମାଜ ପକ୍ଷରୁ ଏହି ପ୍ରଦର୍ଶନୀ ଆୟୋଜନ କରାଯାଉଛି। ନଭେମ୍ବର ୧୫ ତାରିଖ ଦିନ ଆନ୍ତର୍ଜାତିକ ବାଣିଜ୍ୟ ମେଳା ଏବଂ ସାଂସ୍କୃତିକ କାର୍ଯ୍ୟକ୍ରମ ସହ ଏହି ପ୍ରଦର୍ଶନୀର ଉଦ୍‍ଯାପନୀ ହେବ ବୋଲି ସୂଚନା ମିଳିଛି। ‘ସତତ ଭବିଷ୍ୟତ ଲାଗି ଗୌରବମୟ ପ୍ରାଚୀନ ନୌବାଣିଜ୍ୟ’ ବିଷୟବସ୍ତୁକୁ ନେଇ ଏହି ପ୍ରଦର୍ଶନୀ ଆୟୋଜନ କରାଯାଉଛି।

ବାଲିଯାତ୍ରା ଭାରତର ଐତିହ୍ୟ ଯାତ୍ରା ଭାବେ ମାନ୍ୟତା ପାଇଛି । ଓଡ଼ିଶା, ଯାହା ଏକଦା କଳିଙ୍ଗ ଭାବରେ ଜଣାଶୁଣା, ୪୦୦ ଖ୍ରୀଷ୍ଟପୂର୍ବ ପର୍ଯ୍ୟନ୍ତ ଏକ ପ୍ରତିଷ୍ଠିତ ନୌବାଣିଜ୍ୟ ଶକ୍ତି ଥିଲା। ଏହାର ଅଗ୍ରଣୀ ସାଧବମାନେ ଶ୍ରୀଲଙ୍କା, ଇଣ୍ଡୋନେସିଆ, ମିଆଁମାର ଏବଂ ଥାଇଲ୍ୟାଣ୍ଡ ସହିତ ସକ୍ରିୟ ବାଣିଜ୍ୟ ଏବଂ କୂଟନୈତିକ ସମ୍ପର୍କ ସ୍ଥାପନ କରି କିମ୍ବଦନ୍ତୀ ବୋଇତ ଜାହାଜରେ ନୌଚାଳନା କରିଥିଲେ- ଏହା ଆନ୍ତଃ-ସାଂସ୍କୃତିକ କୂଟନୀତିର ଏକ ପ୍ରାରମ୍ଭିକ ଉଦାହରଣ।

"ବ୍ରିଟିଶ ପାର୍ଲାମେଣ୍ଟରେ ଏହି ଐତିହାସିକ ଘଟଣା ଓଡ଼ିଶାର ନୌବାଣିଜ୍ୟ ଐତିହ୍ୟ ଏବଂ ସାଂସ୍କୃତିକ ଗୌରବକୁ ବିଶ୍ୱ ସ୍ତରରେ ସ୍ଥାନ ଦେବା ନିଶ୍ଚିତ କରୁଛି" ବୋଲି ସଂଗଠନ ସଚିବ ଡକ୍ଟର ବିଭୂତି ଭୂଷଣ ପଟ୍ଟନାୟକ କହିଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତର ଐତିହାସିକ ସାମୁଦ୍ରିକ ସମ୍ପର୍କ ବିଷୟରେ ଅନେକ ଥର କହିଛନ୍ତି ବୋଲି ଆୟୋଜକ କମିଟିର ମୁଖପାତ୍ର ଶ୍ୱେତା ମହାନ୍ତି ଉଲ୍ଲେଖ କରିଛନ୍ତି। "ଲଣ୍ଡନରେ ବାଲି ଯାତ୍ରା ୟୁକେ ୨୦୨୫ ଆରମ୍ଭ କରି, ଆମେ କେବଳ ଏକ ଉତ୍ସବ ନୁହେଁ, ବରଂ ପ୍ରାଚୀନ ବାଣିଜ୍ୟ, ସଭ୍ୟତାଗତ ଐତିହ୍ୟ ଏବଂ ସମସାମୟିକ ସମୟରେ ସେମାନଙ୍କର ପ୍ରାସଙ୍ଗିକତା ଉପରେ ଆଲୋଚନା ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ ସୃଷ୍ଟି କରିବାକୁ ଆଶା କରୁଛୁ ବୋଳି ଶ୍ୱେତା ମହାନ୍ତି କହିଛନ୍ତି।