ଅର୍ଗସ ବ୍ୟୁରୋ: କେନ୍ଦ୍ରାପଡ଼ା ଜିଲ୍ଲାରେ ଅବସ୍ଥିତ ସାମୁଦ୍ରିକ ଅଭୟାରଣ୍ୟ ଗହୀରମଥା । ଯାହା ଅଲିଭ୍‌ ରିଡ୍‌ଲେ କଇଁଛଙ୍କ ପାଇଁ ବେଶ୍ ପରିଚିତ । ହେଲେ ଏବେ ଏହା ବିପଦରେ । ଏଠି ଆତଙ୍କ ଖେଳାଉଛନ୍ତି ମାଫିଆ ମାନେ । ଅସୁରକ୍ଷିତ ହୋଇପଡ଼ିଛନ୍ତି ବିରଳ ଅଲିଭ୍ ରିଡଲେ କଇଁଛ । ଆଉ ଏମାନଙ୍କୁ ସୁରକ୍ଷା ଦେବାକୁ ଯାଇ ବନ କର୍ମଚାରୀ ନିଜ ଜୀବନକୁ ବାଜି ଲଗାଉଛନ୍ତି । ଗତ ସପ୍ତାହରେ ଗଭୀର ସମୁଦ୍ରରେ ବନ ବିଭାଗ ଉପରକୁ ଗୁଳି ଚଳାଇ ୬0 ରୁ ୭0 ମାଛ ମାଫିଆ ଗିରଫ ହୋଇଥିଲେ । ଆଉ ସେମାନଙ୍କ ମଧ୍ୟରୁ ୮ ଜଣ ମତ୍ସ୍ୟଜୀବୀଙ୍କୁ ବନ ବିଭାଗ କବଳରୁ ଛଡାଇ ନେଇଛନ୍ତି ମାଫିଆମାନେ । ବନ କର୍ମଚାରୀଙ୍କୁ ଆକ୍ରମଣ ଘଟଣା ଏଠି ନୂଆ ନୁହଁ । ପୂର୍ବରୁ ବି ଅନେକ ଥର ମାଫିଆଙ୍କ ଦ୍ବାରା ଆକ୍ରମଣର ଶିକାର ହୋଇଛନ୍ତି ବନ କର୍ମଚାରୀ ।

ଗହୀରମଥାର ସୁରକ୍ଷା ପାଇଁ ତଟରକ୍ଷୀ ବାହିନୀ, ସାମୁଦ୍ରିକ ପୋଲିସ ଓ ବନ ବିଭାଗକୁ ମିଳିତ ଦାୟିତ୍ବ ଦିଆଯାଇଥିଲା । ହେଲେ ତଟ ରକ୍ଷୀ ବାହିନୀ ଓ ସାମୁଦ୍ରିକ ପୋଲିସ ପାଟ୍ରୋଲିଂରେ ସକ୍ରିୟତା ଦେଖାଉ ନଥିବା ଅଭିଯୋଗ ହୋଇଛି । ଫଳରେ ମାଛ ମାଫିଆମାନେ ବନ ବିଭାଗ କର୍ମଚାରୀଙ୍କୁ ବାରମ୍ବାର ଆକ୍ରମଣ କରିବାକୁ ସାହସ ପାଉଛନ୍ତି । ଏହି ଜଳଦସ୍ୟୁ ମାନଙ୍କ ଉପରେ ରୋକ ନ ଲଗାଇଲେ ଅଲିଭ ରିଡିଲେ କଇଁଛଙ୍କ ଏନ୍ତୁଡ଼ିଶାଳ ସେମାନଙ୍କ ପାଇଁ ସ୍ମଶାନ ଭୁଇଁ ପାଲଟିଯିବ ।