ଖଣ୍ଡପଡା: ଘଞ୍ଚ ଜଙ୍ଗଲ । ତା ଭିତରେ ଟିକେ ଆଗକୁ ଗଲେ ଏକ ପାହାଡ । ବଡ ବଡ ପଥର, ଅଙ୍କା ବଙ୍କା ରାସ୍ତା ଦେଇ ଗତି କରିବା ପରେ ପଡେ ପାହାଡ ଭିତରେ ଗୁମ୍ଫା ଟିଏ । କିଟ୍ କିଟ୍ ଅନ୍ଧାରକୁ ଚଢେଇଙ୍କ ଶବ୍ଦ କୌଣସି ହରର୍ ଫିଲ୍ମର ଦୃଶ୍ୟ ଠୁ କମ୍ ନୁହେଁ । ହେଲେ ଏହାରି ଭିତରେ ଅଛନ୍ତି ମା' ଷୋଳରାଣୀ । କାହିଁ କେବେଠୁ ଅପୂଜା ହୋଇ ରହିଆସୁଛନ୍ତି । ହେଲେ ଏବେ ମା' ଙ୍କ ମୂର୍ତ୍ତିକୁ ଉଦ୍ଧାର କରାଯାଇଛି ।

ଖଣ୍ଡପଡା ବ୍ଲକ ରାଣିପଡା ଗ୍ରାମରେ ରହିଛି ଷୋଳ ରାଣୀ ଗୁମ୍ଫା । ପୂର୍ବକାଳରେ ରାଜା ରାଜୁଡା ସମୟରେ ଜଙ୍ଗଲ ପାହାଡ ଘେରା ଏହି ଗୁମ୍ଫା ଭିତରେ ମା' ଷୋଳରାଣି ପୂଜା ପାଉଥିବାନେଇ ଗ୍ରାମବାସୀଙ୍କ ଠାରୁ ଶୁଣିବାକୁ ମିଳିଛି । ତେବେ କାଳକ୍ରମେ ପୂଜା ବନ୍ଦ ହୋଇଯାଇଥିବା ବେଳେ ମା' ଙ୍କ ବିଗ୍ରହ ଓ ଅଳଙ୍କାର ଚୋର ମାନେ ଚୋରି କରିନେଇଥିଲେ । ବୃନ୍ଦାବନରୁ ଆସିଥିବା ଜଣେ ସାଧୁ ରାଣିପଡା ଗ୍ରାମରେ ପ୍ରବଚନ ଦେଉଥିଲେ । ତେବେ ସାଧୁଙ୍କୁ ମା' ସ୍ଵପ୍ନାଦେଶ ଦେବାପରେ ଗ୍ରାମବାସୀମାନେ ଷୋଳରାଣି ଗୁମ୍ଫା ନିକଟରେ ଖୋଜା ଖୋଜି କରି ମା'ଙ୍କ ବିଗ୍ରହଟି ମାଟି ତଳେ ପୋତି ହୋଇଥିବା ଦେଖିବାକୁ ପାଇଥିଲେ । ମୂର୍ତ୍ତିକୁ ପାଇ ସ୍ଥାନୀୟ ଅଞ୍ଚଳରେ ଖୁସିର ଲହରୀ ଖେଳିଯାଇଛି ।

ମା' ଷୋଳରାଣି ଠାକୁରାଣୀଙ୍କ ବିଗ୍ରହ ମିଳିବା ଶୁଣିବା ପରେ ଶ୍ରଦ୍ଧାଳୁଙ୍କ ଭିଡ ଯମୁଥିବା ଦେଖିବାକୁ ମିଳିଛି । ଗ୍ରାମବାସୀ ମାନେ ଏକାଠି ହୋଇ ମାଙ୍କ ପୀଠର ଉନ୍ନତି ପାଇଁ ଅଣ୍ଟା ଭିଡିଛନ୍ତି । ମନ୍ଦିର ନିର୍ମାଣ ପାଇଁ ସରକାରଙ୍କ ସାହାଯ୍ୟ ଲୋଡିଛନ୍ତି ।

ଏହି ପୀଠକୁ ସରକାର ଉନ୍ନତିକରଣ କରିବା ପାଇଁ ପଦକ୍ଷେପ ଗ୍ରହଣ କଲେ ଏହି ପୀଠ ଏକ ପର୍ଯ୍ୟଟନ ସ୍ଥଳୀ ଭାବରେ ପରିଚିତ ହୋଇପାରିବ ସେଥିରେ ଦ୍ୱିଧା ନାହିଁ ।

Argus News | argus news | Odisha Latest News, Breaking News, Trending News, Live TV