ନିର୍ବାଚନ ପ୍ରଚାର ବେଳେ ପ୍ରଧାନମନ୍ତ୍ରୀ ଆଉ ନିର୍ବାଚନ ପରେ ବିଜେପି ସରକାର ହେବା ପରେ ମୁଖ୍ୟମନ୍ତ୍ରୀ ବାରମ୍ବାର ଚେତାଇଛନ୍ତି, ଦୁର୍ନୀତିଖୋର ସୁଧୁରି ଯାଆନ୍ତୁ ନହେଲେ ବନ୍ଧା ହୋଇ ଜେଲ୍ ଯିବେ । କିନ୍ତୁ ବିଜେଡି ଶାସନର ସୁରକ୍ଷା ବଳୟରେ ରହିଥିବା ଦୁର୍ନୀତିଗ୍ରସ୍ତ ଅଫିସରଙ୍କ ଅଭ୍ୟାସ ବଦଳିବାର ନାଁ ନେଉନାହିଁ। ପରିଣାମ ହେଲା ଭିଜିଲାନ୍ସ ହାତରେ ବନ୍ଧା ହେଉଛନ୍ତି ରାଜ୍ୟର ବଡ଼ ବଡ଼ ଅଫିସର । ଆଉ ଏଥର ତ ଗିରଫ ହୋଇଛନ୍ତି ବଡ଼ ମାଛ । ଧର୍ମଗଡ଼ ଉପଜିଲ୍ଲାପାଳ IAS ଅଫିସର ଧୀମାନ ଚାକମା। ୧୦ ଲକ୍ଷ ଟଙ୍କା ଲାଞ୍ଚ ନେବା ବେଳେ ଧରାପଡ଼ିଲେ, ଘରେ ଚଢ଼ାଉ ହେଲା ତ ଜବତ ହେଲା ୪୭ ଲକ୍ଷ ଟଙ୍କା।

ପୂର୍ବ ସରକାରରେ ସୁରକ୍ଷିତ ଥିଲେ ବଡ଼ ସରକାରୀ ବାବୁ । ଛୋଟ ମାଛଙ୍କୁ ଧରି ଦୁର୍ନୀତି ବିରୋଧରେ ଜିରୋ ଟଲେରାନସର ପ୍ରଚାର କରୁଥିଲା ବିଜେଡି ସରକାର । ୨୮ IASଙ୍କ ବିରୋଧରେ ମାମଲା ପାଇଁ ଅନୁମତି ଦେଇନଥିଲେ ନବୀନ ସରକାର । ସରକାର ବଦଳିବା ସହିତ ବଦଳିଲା ଆଭିମୁଖ୍ୟ । ଏବେ ଦୁର୍ନିତୀଖୋର ତୁଙ୍ଗ ବାବୁଙ୍କ ମନରେ ସୃଷ୍ଟି ହେବ କି ଭୟ ?

୨୦୨୧ ବ୍ୟାଚର IAS ଅଫିସର । ସରକାରୀ ଚାକିରିରେ ମାତ୍ର ୪ ବର୍ଷ । କିନ୍ତୁ ଲାଞ୍ଚ ନେବାରେ ସିଦ୍ଧ ହସ୍ତ । କଳାହାଣ୍ଡି ଜୟପାଟଣାର ଜଣେ କ୍ରସର ମାଲିକଙ୍କଠାରୁ ୧୦ ଲକ୍ଷ ଟଙ୍କା ଲାଞ୍ଚ ନେବା ବେଳେ ଭିଜିଲାନ୍ସ ହାତରେ ଧରାପଡ଼ିଲେ କଳାହାଣ୍ଡି ଧର୍ମଗଡ଼ ଉପଜିଲ୍ଲାପାଳ ଧୀମାନ ଚକମା । ତା ପରେ ତାଙ୍କ ସରକାରୀ କ୍ବାର୍ଟର୍ସରେ ଚଢ଼ାଉ କଲା ଭିଜିଲାନ୍ସ । ଯେଉଁଠୁ ମିଳିଲା ନଗଦ ୪୭ ଲକ୍ଷ ଟଙ୍କା । ଭବାନୀପାଟଣା ଭିଜିଲାନ୍ସ ଡିଏସପିଙ୍କ ଅଫିସରେ ଜେରା ପରେ ଧୀମାନ ଚକମାଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ୨୦୨୧ ବ୍ୟାଚ୍‌ର ଓଡ଼ିଶା କ୍ୟାଡର୍‌ IAS ଚକମାଙ୍କ ଘର ପୂର୍ବୋତ୍ତର ରାଜ୍ୟ ତ୍ରିପୁରାର ଏକ ଆଭ୍ୟନ୍ତରୀଣ ଅଞ୍ଚଳ କାଞ୍ଚନପୁରରେ ।

ପ୍ରଶାସନର ଉଚ୍ଚ ସ୍ଥାନରେ ରହୁଥିବା IAS ବାବୁ ଏମିତି ଦୁର୍ନୀତିଖୋର ହେବା ଯେତିକି ଚିନ୍ତାଜନକ, ତାଠାରୁ ଅଧିକ ବିପଜ୍ଜନକ ଥିଲା ଦୁର୍ନୀତିର ସଂଗୀନ ଅଭିଯୋଗ ଥିବା IAS ମାନଙ୍କୁ ପୂର୍ବ ବିଜେଡି ସରକାରର ପରଦା । ପୂର୍ବ ସରକାରରେ କେମିତି ବେଶ୍ ସୁରକ୍ଷିତ ଥିଲେ IAS ବାବୁ ତାର ପ୍ରମାଣ ଏବେ ସାମ୍ନାକୁ ଆସିଛି । ସୂଚନା ଅଧିକାର ଆଇନରେ ମିଳିଥିବା ତଥ୍ୟ ଅନୁସାରେ 28 ଜଣ IASଙ୍କ ବିରୋଧରେ ମାମଲା ପାଇଁ ଅନୁମତି ଦେଇନଥିଲେ ନବୀନ ସରକାର ।

ଅନ୍ୟପଟେ ଭିଜିଲାନ୍ସକୁ ଲଗାଇ କେବଳ ତଳିଆ ଅଫିସରଙ୍କୁ ଧରି ଦୁର୍ନୀତି ବିରୋଧରେ ଜିରୋ ଟଲରାନ୍ସର ମିଛ ପ୍ରଚାର କରୁଥିଲେ । ଏବେ ରାଜ୍ୟରେ ବିଜେପି ଶାସନକୁ ଆସିବା ପରେ ବଦଳିଛି ସରକାରଙ୍କ ଆଭିମୁଖ୍ୟ । ବଡ଼ ସରକାରୀର ପଦବୀର ଆଢୁଆଳରେ ରହି ଦୁର୍ନିତୀଖୋର ପାଲଟିଥିବା ବାବୁଙ୍କ ମନରେ ଏବେ ପଶିଛି ଛନକା ।

୨୦୨୪ ନିର୍ବାଚନ ବେଳେ ଦୁର୍ନୀତିଖୋରଙ୍କୁ କଡ଼ା ଚେତାବନୀ ଦେଇଥିଲେ ପ୍ରଧାନମନ୍ତ୍ରୀ । କହିଥିଲେ ବିଜେପି ସରକାର ଆସିଲେ ଭଙ୍ଗାଯିବ ମାଫିଆଙ୍କ ଅଣ୍ଟା । ଆଉ ବିଜେପି ସରକାର ଆସିବାର ବର୍ଷକ ଭିତରେ ଲାଞ୍ଚଖୋର ମାଫିଆଙ୍କ ବିରୋଧରେ କଡ଼ା ଆକ୍ସନର ପ୍ରମାଣ ମିଳିଛି । ଜୁନ୍ ୨୦୨୪ରୁ ମାର୍ଚ୍ଚ ୨୦୨୫ ବିଜେପି ସରକାରର ପ୍ରଥମ ୯ ମାସ ଭିତରେ ୩୧୨ ଜଣ ଅଫିସରଙ୍କ ବିରୋଧରେ ୧୭୩ଟି ଭିଜିଲାନ୍ସ ମାମଲା ରୁଜୁ ହୋଇଛି।

୧୫୬ ଜଣଙ୍କୁ ଗିରଫ କରାଯାଇଥିବା ବେଳେ ୨୯୭ ମାମଲାରେ ତଦନ୍ତ ଶେଷ ହୋଇ ଚାର୍ଜସିଟ୍ ଦାଖଲ ହୋଇଛି। ୮୨ ମାମଲାରେ ୧୨୩ ଜଣ ଦୋଷୀ ସାବ୍ୟସ୍ତ ହୋଇଛନ୍ତି। ଭିଜିଲାନସ କୋର୍ଟରେ ଦଣ୍ଡାଦେଶ ପରେ ୧୧ ଜଣ ଅଫିସର ଚାକିରିରୁ ତଡ଼ା ଖାଇଛନ୍ତି । ଏଥିସହ ଆୟ ବହିର୍ଭୁତ ସମ୍ପତ୍ତି ଠୁଳ ମାମଲାରେ ୯୭ ଜଣଙ୍କ ବିରେଧରେ ୫୩ଟି ମାମଲା ରୁଜୁ ହୋଇଛି। ୧୩୧ କୋଟି ୯୦ ଲକ୍ଷ ଟଙ୍କାର ଆୟ ବର୍ହିଭୂତ ସମ୍ପତ୍ତି ଠାବ ହୋଇଛି ।

Argus News | argus news | Odisha Latest News, Breaking News, Trending News, Live TV