ଘର ଗୋଟାଏ ରାଜ୍ୟରେ, ପାନୀୟ ଜଳ ପାଇଁ ଭରଷା ଅନ୍ୟ ଏକ ପଡ଼ୋଶୀ ରାଜ୍ୟ ଉପରେ । ଆମେ କହୁଛୁ ଓଡିଶାର ମୟୂରଭଞ୍ଜ ଜିଲ୍ଲା କୁଳିଅଣା ବ୍ଲକ ନାଗାରାଶୋଳ ଗାଁର କଥା । ଏହି ଗାଁରେ ୩୦ରୁ ଅଧିକ ପରିବାର ବସବାସ କରନ୍ତି । କିନ୍ତୁ ୧୬୦ ଲୋକ ୧୫ ବର୍ଷ ଧରି ଜଳ କଷ୍ଟରେ । ପାନୀୟ ଜଳ ପାଇଁ ନିର୍ଭର କରୁଛନ୍ତି ପଡ଼ୋଶୀ ରାଜ୍ୟ ପଶ୍ଚିମବଙ୍ଗ ଉପରେ । ଗାଁରେ ଥିବା ଗୋଟାଏ ନଳକୂପ ଅକାମୀ ଥିବା ବେଳେ ଅନ୍ୟ ଏକ ନଳକୂପରୁ ବାହାରୁଛି ନାଲି ରଙ୍ଗର ଲୁହା ପାଣି । ତେଣୁ ବାଧ୍ୟ ହୋଇ ପଶ୍ଚିମବଙ୍ଗରେ ଥିବା ନଳକୂପ ଉପରେ ନିର୍ଭର କରୁଛନ୍ତି ଗାଁ ଲୋକେ । ଯେଉଁଠି ପାଣି ଆଣିବା ପାଇଁ ଲାଗେ ଲମ୍ବା ଲାଇନ୍ । ଆଉ ଏହି ପାଣି ଆଣିବାକୁ ଚାଲିବାକୁ ପଡ଼େ ଦେଢ଼ କିଲୋମିଟର ରାସ୍ତା । ତେବେ ଦୀର୍ଘ ୧୫ ବର୍ଷରୁ ଅଧିକ ସମୟ ଧରି ଏମିତି ଜଳକଷ୍ଟ ଭୋଗୁଥିବା ଅଭିଯୋଗ କରିଛନ୍ତି ସୀମାନ୍ତ ଅଞ୍ଚଳବାସୀ ।

ଦୀର୍ଘ ୨୪ ବର୍ଷର ବିଜେଡି ସରକାରରେ ହୋଇପାରିଲା ନାହିଁ ଉପାନ୍ତ ଅଞ୍ଚଳର ମୌଳିକ ସମସ୍ୟାର ସମାଧାନ । ସୀମାନ୍ତରେ ରହୁଥିବାରୁ ବୋଧହୁଏ ଏମାନେ ହୋଇଗଲେ ଅଣଦେଖା । ଗାଁ ସରପଞ୍ଚଠାରୁ ଆରମ୍ଭ କରି ସରକାରୀ ଅଧିକାରୀଙ୍କୁ ଗୁହାରି କରିଥିଲେ ମଧ୍ୟ କୌଣସି ସମାଧାନ ହୋଇନଥିବା ଅଭିଯୋଗ କରିଛନ୍ତି ଗ୍ରାମବାସୀ । ତେଣୁ ଗାଁରେ ଗୋଟିଏ ନୂତନ ନଳକୂଅ କିମ୍ବା ଟାଙ୍କିର ବ୍ୟବସ୍ଥା କରିବାକୁ ଦାବି କରିଛନ୍ତି ।

ପୂର୍ବତନ ସରକାର ଲୋକଙ୍କ ମୌଳିକ ସମସ୍ୟାର ସମାଧାନ କରିବାରେ ବିଫଳ ହୋଇଥିବା ବେଳେ ରାଜ୍ୟର ନୂତନ ଡବଲ ଇଞ୍ଜିନ ସରକାର ଉପରେ ଭରଷା କରିଛନ୍ତି ଉପାନ୍ତ ଅଞ୍ଚଳବାସୀ।