ଅର୍ଗସ ବ୍ୟୁରୋ: ବିଜେଡି ସରକାରରେ ସୀମା ଟପିଲାଣି ଦୁର୍ନୀତି । ଖଣିଠୁ ପାଣି ଯାହା ତ ଖାଉଥିଲେ ଏବେ ବାଲିରେ ବି ସାଙ୍ଘାତିକ ଦୁର୍ନୀତି କରିଥିବା ଜଣାପଡିଲାଣି । ବାଲିଉଠାଣ ଉପରେ ହାଇକୋର୍ଟଙ୍କ ରହିତାଦେଶ ପରେ ବି ବାଲିଉଠାଣ ଲାଗି ଗତ ୨୧ରେ ବିଜ୍ଞପ୍ତି ପ୍ରକାଶ କରିଥିଲେ ସରକାର । ହେଲେ ପୁଣି ଥରେ ରହିତାଦେଶ ଲଗାଇଛନ୍ତି କୋର୍ଟ । ଯାହାକୁ ନେଇ ଏବେ ଚର୍ଚ୍ଚା ।

ବାଲିଉଠାଣ ଉପରେ ହାଇକୋର୍ଟ ରହିତାଦେଶ ଲଗାଇବା ପରେ ବି ରାଜ୍ୟ ସରକାର ପୂରା ବେଫିକର । ସେଇଥି ଲାଗି ତ ରୋକ ପରେ ବି ବାଲି ଉଠାଣ ନେଇ ବିଜ୍ଞପ୍ତି ପ୍ରକାଶ କରିଛନ୍ତି । ହେଲେ କୋର୍ଟ, ଗତ ୨୧ ତାରିଖରେ ଯେଉଁ ବିଜ୍ଞପ୍ତି ଜାରି କରିଥିଲା ଖଣି ବିଭାଗ, ତା’ଉପରେ ବି କ୍ଷୁବ୍ଧ ହେବା ସହ ସ୍ଥଗିତାଦେଶ ଜାରି କରିଛନ୍ତି । ଯାହାକୁ ନେଇ ଏବେ ଚର୍ଚ୍ଚା ।

ପୂର୍ବରୁ ୨୯ ନଭେମ୍ବର, ୨୦୨୩ରେ ବାଲି ଉଠାଣ ପ୍ରସଙ୍ଗରେ ସ୍ଥଗିତା ଦେଶ ଜାରି କରିଥିଲେ ହାଇକୋର୍ଟ । ମେସିନ ସହାୟତାରେ ବାଲି ଉଠାଣ ବନ୍ଦ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ତା’ସହ କଟକର ପୂର୍ବତନ ଜିଲ୍ଲାପାଳ ଭବାନୀ ଶଙ୍କର ଚୟନୀଙ୍କ ବିରୋଧରେ ଅଦାଲତ ଅବମାନନା ମାମଲା ପାଇଁ ନୋଟିସ ବି କରିଥିଲେ । ଏହାପରେ ଡିସେମ୍ବର ୨୧ରେ ମାମଲାର ଶୁଣାଣିବେଳେ ୧୪ଟି ବାଲି ଖାଦାନକୁ ବନ୍ଦ କରିବା ସହ ଅନ୍ୟମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯାଉଥିବା ନେଇ କୋର୍ଟଙ୍କୁ ଅବଗତ କରିଥିଲେ ରାଜ୍ୟ ସରକାର । କିନ୍ତୁ ସେଦିନ ହିଁ ସରକାର ଏକ ବିଜ୍ଞପ୍ତି ଜାରି କରିଥିଲେ । ନିର୍ଦ୍ଦିଷ୍ଟ ବାଲିଘାଟର ଅବସ୍ଥିତି, ସେଠାରେ ବାଲିର ପରିମାଣ, ନଦୀଶଯ୍ୟା ଏବଂ ନିକଟସ୍ଥ ଚାଷପଯୋଗୀ ଜମିକୁ ବିଚାରକୁ ନେଇ ମେସିନ ସାହାଯ୍ୟରେ ବାଲି ଉଠାଯାଇପାରିବ ବୋଲି ବିଜ୍ଞପ୍ତିର ଧାରା-୪, ଉପଧାରା (G)ରେ ଦର୍ଶାଇଥିଲେ ।

ଗୁରୁତ୍ଵପୂର୍ଣ୍ଣ କଥା ହେଲା, ବାଲି ଉଠାଣକୁ ନେଇ ଆବେଦନକାରୀ ବିଜ୍ଞପ୍ତି ବିରୋଧରେ କୋର୍ଟଙ୍କୁ ଯିବା ସହ ୪ ବର୍ଷରେ ୨୪୩ କୋଟି ଟଙ୍କାର ଦୁର୍ନୀତି ହୋଇଥିବା ଦର୍ଶାଇଥିଲେ । ତେବେ ଏତେ ଦୁର୍ନୀତି ହୋଇଥିବାରୁ କୋର୍ଟ ବାଲିଉଠାଣ ଉପରେ ରହିତାଦେଶ ଲଗାଇଥିଲେ । କିନ୍ତୁ ବାଲିରେ ମୋଟା ଅଙ୍କର ଟଙ୍କା ମିଳୁଥିବାରୁ କୋର୍ଟଙ୍କ ରହିତାଦେଶ ପରେ ବି ବାଲି ଉଠାଣ ପାଇଁ ସରକାର ବିଜ୍ଞପ୍ତ ପ୍ରକାଶ କରିଥିବା ଜୋର ଧରିଛି ଚର୍ଚ୍ଚା ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV