କଳାହାଣ୍ଡି ଦୁର୍ଗମ ଥୁଆମୂଳ ରାମପୁର ବ୍ଲକର ପୋଡା ପଦର ପଞ୍ଚାୟତ। ଏହି ଅଞ୍ଚଳ ଆଗରୁ ତାଳନଗି ପଞ୍ଚାୟତ ଅଧୀନରେ ଥିଲା । ଗତ ୨୦୧୭ ମସିହାରେ ୧୮ ଟି ଗାଁ କୁ ନେଇ ପୋଡାପଦରକୁ ନୂତନ ପଞ୍ଚାୟତ ଘୋଷଣା କରାଗଲା । ଏହି ପଞ୍ଚାୟତ ପାଇଁ ଗତ ୨୦୧୭ ମସିହାରେ ୩୫ ଲକ୍ଷ ଟଙ୍କା ଅଟକଳ ବ୍ୟୟରେ ଏକ ପଞ୍ଚାୟତ ଗୃହ ନିର୍ମାଣ କାମ ଆରମ୍ଭ ହେଲା । ହେଲେ ଆଜକୁ ୭ ବର୍ଷ ରୁ ଉର୍ଦ୍ଧ୍ବ ଦିନ ହେଲା ପରେ ମଧ୍ୟ ପଞ୍ଚାୟତ ବିଲ୍ଡିଂ ନିର୍ମାଣ ହୋଇପାରିନାହିଁ । ଫଳରେ ଗଛମୁଳରେ ଚାଲିଛି ପଞ୍ଚାୟତ କାମ।

କେବଳ ଏହି ପଞ୍ଚାୟତ ଗୃହ ନୁହେଁ , ପଞ୍ଚାୟତ ଗୃହକୁ ଲାଗିକି ନିର୍ମାଣ ହେଉଥିବା ଗ୍ରାହକ ସେବା କେନ୍ଦ୍ର, ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର, ରାଜୀବ ଗାନ୍ଧୀ ଭବନ,ପଞ୍ଚାୟତ ଗୋଦାମ ଘର, ଏଏନଏମ ସେଣ୍ଟର, ମିଶନ ଶକ୍ତି ଭବନ ଏବଂ ସ୍କୁଲ କୋଠା ମଧ୍ୟ ଅଧପନ୍ତରିଆ ଭାବେ ପଡି ରହିଛି । ଅଞ୍ଚଳରେ ଅନେକ ସମସ୍ୟା ଥିବା ବେଳେ ଆଜି ପର୍ଯ୍ୟନ୍ତ ଆଦିବାସୀଙ୍କ ସମାଧାନ ଦିଗରେ ନା ନିର୍ବାଚିତ ପ୍ରତିନିଧି ନା ରାଜନେତା ନା ପ୍ରଶାସନ କେହି ମଧ୍ୟ ଆଗଭର ହେଉ ନାହାନ୍ତି । ଯାହା ଫଳରେ ଏବେବି ଆଦିବାସୀ ମାନେ ଦିଶାହିନ ଭଳି ବୁଲୁଛନ୍ତି । ଆହା କରିବାକୁ କେହି ନାହିଁ କି ସାହା ହେବା ପାଇଁ ମଧ୍ୟ କେହି ନାହିଁ ।

ଦୁର୍ଗମରେ ଦୁର୍ଦ୍ଦଶା,ଠିକାଦାର ପୋଷା ନୀତିରେ ଚାଲିଛି ପୋଡାପଦର ପଞ୍ଚାୟତର ବିକାଶ । ଦୁର୍ଗମ ଅଞ୍ଚଳ ହୋଇଥିବା ଯୋଗୁଁ କୌଣସି ଅଧିକାରୀ ମଧ୍ୟ ଏ ଅଞ୍ଚଳକୁ ଯାଉ ନାହାଁନ୍ତି । ଫଳରେ ଏହାର ଫାଇଦା ନେଉଛନ୍ତି ଠିକାଦାର ଓ ଯନ୍ତ୍ରୀ । ଯଦି ଏହି ଅଧପନ୍ତରିଆ ସମସ୍ତ ଗୃହ ନିର୍ମାଣ ହେଲେ ନିଜ ଅଞ୍ଚଳରେ ଲୋକେ ସରକାରୀ ସେବା ପାଇ ପାରିବେ ।

Argus News | argus news | Odisha Latest News, Breaking News, Trending News, Live TV