ଛୁଆ ପିଲାଙ୍କୁ ଧରି ବିପଦପୂର୍ଣ୍ଣ ଜଳ ଯାତ୍ରା । ବର୍ଷ ବର୍ଷ ଧରି ବାଜିରେ ଲାଗିଛି ଜୀବନ । ଅକାତ କାତ ପାଣିରେ ଚିଲିକା ପାର ହେଉଛନ୍ତି ଲୋକେ। ସୁରକ୍ଷା ପ୍ରତି ଧ୍ୟାନ ନାହିଁ । ସାତପଡାରୁ ଜହ୍ନିକୁଦାକୁ ୫ କିଲୋମିଟର ଯାତ୍ରାରେ ବାଜିରେ ଲାଗିଛି ଲୋକଙ୍କ ଜୀବନ। ଅକାତ କାତ ପାଣିରେ ବିପଦପୂର୍ଣ୍ଣ ଜଳଯାତ୍ରା । ଖୋଲା ବୋଟ୍‌ରେ ଚିଲିକା ପାର ହେଉଛନ୍ତି ଲୋକେ । ପ୍ରତିଦିନର ଏମିତି କିଛି ଦେଖିବାକୁ ମିଳିଥାଏ । ବିପଦ ସଙ୍କୁଳ ଭାବେ ଦେଶୀ ଡଙ୍ଗାରେ ଜଳ ଯାତ୍ରା କରନ୍ତି ଲୋକେ । ଛାତିକୁ ପଥର କରି ୫ କିଲୋମିଟର ଯାତ୍ରା କରନ୍ତି । ଡଙ୍ଗାରେ ଲୋକଙ୍କ ସହ ରହିଥାଏ ମୋଟର ସାଇକେଲ୍ ।

କ୍ଷମତା ଠାରୁ ଅଧିକ ମାତ୍ରାରେ ଓଭରଲୋଡ କରି ଚିଲିକାରେ ହେଉଛି ଜଳ ଯାତ୍ରା । କାହାରି ଦେହରେ ନାହିଁ ଲାଇଭ୍ ଜ୍ୟାକେଟ୍ । ଖୁନ୍ଦା ଖୁନ୍ଦି ହୋଇ ପାର ହେଉଛନ୍ତି ଲୋକେ । କେବଳ ଦେଶୀ ଡଙ୍ଗା ନୁହେଁ ସିଡିଏ ବିଭାଗର ଭସାପୋଲରେ ମଧ୍ୟ ଜୀବନକୁ ବାଜି ଲଗାଇ ପାର ହେଉଛନ୍ତି ଲୋକେ । କ୍ଷମତାର ମାପଦଣ୍ଡ ଅଛି, ହେଲେ ଧରପଗଡ଼ ନାହିଁ, ତେଣୁ ବେଫିକର ଭାବେ ଚିଲିକାରେ ଚାଲୁଛି ଡଙ୍ଗା । ଯାତ୍ରୀ ବାହି ଡଙ୍ଗା ଗୁଡିକର ଫିଟନେସ୍ ଯାଞ୍ଚ ହେଉନି । ଭଗବାନଙ୍କ ଭରଷାରେ ଲୋକଙ୍କ ଜୀବନ।

ନୂଆ ବର୍ଷ ଦିନ ଭସାପୋଲରୁ ଖସି ମାଲକାନଗିରି ଅଞ୍ଚଳର ଜଣେ ବ୍ୟକ୍ତିଙ୍କ ଜୀବନ ଯାଇଥିଲା । ଏହାପରେ ଆକ୍ସନ ମୋଡ୍‌କୁ ଆସିଥିଲା ପ୍ରଶାସନ । କୁହୁଡ଼ି ଲାଗି ଦିନ ୧୧ଟା ପର୍ଯ୍ୟନ୍ତ ଡଙ୍ଗା ଏବଂ ଭସାପୋଲ ଚଳାଚଳ ଉପରେ ଲାଗିଛି ରୋକ୍ । ଭସାପୋଲରେ ଯାତ୍ରା କରୁଥିବା ଯାତ୍ରୀଙ୍କ ପାଇଁ ଲାଇଫ୍ ଜ୍ୟାକେଟ୍ ବ୍ୟବହାର ବାଧ୍ୟତାମୂଳକ ହୋଇଛି । କିନ୍ତୁ ଡଙ୍ଗା ଚଳାଚଳ ଉପରେ କୌଣସି କଟକଣା ଲାଗୁ ହୋଇନାହିଁ । ଯାହାକି ବଡ଼ ବିପଦକୁ ନିମନ୍ତ୍ରଣ କଲା ଭଳି ହେଉଛି ।

ଏବେ ଚିଲିକା ଉପରେ ସେତୁ ନିର୍ମାଣ ପାଇଁ ଦାବି କରିଛନ୍ତି ସ୍ଥାନୀୟ ଲୋକେ । ଏବେ ଅପେକ୍ଷା କେବେ ଦୂର ହେବ ଚିଲିକା ଓ ଏହାର ଆଖ ପାଖ ଅଞ୍ଚଳବାସୀଙ୍କ ଯନ୍ତ୍ରଣା ? କେବେ ଦୂର ହେବ ଲୋକଙ୍କ ଦିର୍ଘ ଦିନର ସମସ୍ୟା ? କେବେ ପୂରଣ ହେବ ସେମାନଙ୍କ ସ୍ୱପ୍ନ ? କିଏ ଦୂର କରିବ ତାଙ୍କ ଦୁଃଖ ? ଏମିତି ନାନା ପ୍ରଶ୍ନ ସହ ଏବେ ଆଶା ଅଶଙ୍କାରେ ସାଧାରଣ ଜନତା ।