ଶ୍ରୀମନ୍ଦିର ଦୋଳବେଦୀ କୋଣରେ ହାତାହାତି ।ସେବାୟତଙ୍କୁ ଅଣ ସେବାୟତ ମାଡ ମାରିଥିବା ଅଭିଯୋଗ ହୋଇଛି ।ଏନେଇ ସିଂହଦ୍ଵାର ଥାନାରେ ଅଭିଯୋଗ କରିଛନ୍ତି ସେବାୟତ ରାମ ନାରାୟଣ ପୂଜାପଣ୍ଡା । ଯାତ୍ରୀ ନେଇ ଯାଉଥିବା ବେଳେ ଆକାଶ ମହାନ୍ତି ଓ ବିପ୍ଲବ ହୋତା ନାମକ ଗୁମାସ୍ତା ନିଶାଗ୍ରସ୍ତ ଅବସ୍ଥାରେ ଗାଳିଗୁଲଜ ଓ ମାଡ ମାରିଥିବା ଅଭିଯୋଗ କରିଛନ୍ତି ସେବାୟତ ।ଏପରିକି ସୁନା ଚେନ୍ ଛଡାଇନେବା ଓ ଦାଦାବଟି ମାଗିବାକୁ ଉଦ୍ୟମ କରିଥିବା ନେଇ ଅଭିଯୋଗ କରିଛନ୍ତି ।ଦୋଳବେଦୀ କୋଣ ପାର୍ଶ୍ଵ ଶ୍ରୀମାର୍ଗକୁ ସଂଯୋଗ କରୁଥିବା ରାସ୍ତାରେ ଘଟିଛି ଅଘଟଣ ।

ସେପଟେ ଆଜି ପୁରୀରେ ଦିନ ଦ୍ଵିପ୍ରହରରେ ଖଣ୍ଡା ବୁଲିଥିବା ମଧ୍ୟ ସିସିଟିଭି ଫୁଟେଜରେ ଦେଖିବାକୁ ମିଳିଛି । ସମୁଦ୍ରକୂଳ ଥାନା ଅନ୍ତର୍ଗତ ବାଲିନୋଳିଆ ସାହିରେ ଦେଖିବାକୁ ମିଳିଛି ଏଭଳି ଦୃଶ୍ୟ। ଦୁର୍ବୃତ୍ତ ଜଣକର ଖଣ୍ଡା ବୁଲା ଦେଖି ଭୟରେ ଥରହର ହୋଇଥିଲେ ସ୍ଥାନୀୟ ଲୋକେ ଏବଂ ପର୍ଯ୍ୟଟକ। କେବଳ ସେତିକି ନୁହେଁ ସମ୍ପୃକ୍ତ ଦୁର୍ବୃତ୍ତ ଜଣକ ଦୁଇଜଣ ବ୍ୟକ୍ତିଙ୍କୁ ଖଣ୍ଡାରେ ଆକ୍ରମଣ କରିବା ପାଇଁ ଉଦ୍ୟମ କରୁଥିବା ସିସିଟିଭିରେ ଦେଖିବାକୁ ମିଳିଛି। ସମ୍ପୃକ୍ତ ଦୁର୍ବୃତ୍ତକୁ କିଛି ବ୍ୟକ୍ତି ବୁଝାସୁଝା କରୁଥିବା ବେଳେ କୌଶଳ କ୍ରମେ ତା ହାତରୁ ଖଣ୍ଡା ଛଡାଇବା ପାଇଁ ଉଦ୍ୟମ କରୁଥିବା ମଧ୍ୟ ଦେଖିବାକୁ ମିଳିଛି। ଖବରପାଇ ସମୁଦ୍ରକୂଳ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଥିଲେ ମଧ୍ୟ ଦୁର୍ବୃତ୍ତ ଜଣକ ସେଠାରୁ ଚମ୍ପଟ ମାରିଛି। ଦୁର୍ବୃତ୍ତକୁ ଧରିବା ପାଇଁ ବିଭିନ୍ନ ସ୍ଥାନରେ ପୋଲିସ ଚଢାଉ ଜାରି ରଖିଛି। ସେପଟେ ସମୁଦ୍ର କୂଳ ଥାନା ଅଧିକାରୀଙ୍କ ସୂଚନା ଅନୁଯାୟୀ ଦୁର୍ବୃତ୍ତ ଜଣକ ବାଲି ନୋଳିଆ ସାହି କ୍ଲବ ଘରେ ନିଶା ସେବନ କରି ଶୋଇଥିଲା। ତେବେ କ୍ଲବ ଘର ପାଖରେ ଥିବା ଏକ ମନ୍ଦିରରୁ ହଠାତ୍ ହାତରେ ଖଣ୍ଡା ଧରି ସ୍ଥାନୀୟ ଲୋକଙ୍କୁ ଭୟଭୀତ କରାଇବା ସହ ଆକ୍ରମଣ କରିବା ପାଇଁ ଉଦ୍ୟମ କରୁଥିଲା। ଘଟଣାକୁ ନେଇ ପୋଲିସ ତଦନ୍ତ କରୁଥିବା ବେଳେ ଖୁବଶୀଘ୍ର ତାକୁ ଗିରଫ କରାଯିବ ବୋଲି ସମୁଦ୍ର କୂଳ ଥାନା ଅଧିକାରୀ ସୂଚନା ଦେଇଛନ୍ତି।

Argus News | argus news | -Argusnews Home: Odisha Latest News, Breaking News, Trending News, Live TV and more