ପୁଣି ଆଳୁ ଦର ବଢିବା ନେଇ ଆଶଙ୍କାରେ ଓଡିଶାର ଖାଉଟି

Key Points
() ପୁଣି ବାହାରିଲା ମମତାଙ୍କ ଆଳୁ ଦୋଷ
() ଓଡିଶାକୁ ଆଳୁ ଯୋଗାଣ ବନ୍ଦ କଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ
() ପଶ୍ଚିମବଙ୍ଗରୁ ଓଡିଶାକୁ ଆଳୁ ଟ୍ରକ ଛାଡୁ ନାହାନ୍ତି ମମତା ସରକାର
() ପୁଣି ଆଳୁ ଦର ବଢିବା ନେଇ ଆଶଙ୍କାରେ ଓଡିଶାର ଖାଉଟି
() ଆଳୁ ସଂକଟ ପାଇଁ ନବୀନଙ୍କୁ ଯୋଗାଣ ମନ୍ତ୍ରୀଙ୍କ ତେର୍ଚ୍ଛା ବାଣ
ଅର୍ଗସ ବ୍ୟୁରୋ: ପୁଣି ପଶ୍ଚିମବଙ୍ଗ ମନମାନୀ । ପଡୋଶୀ ରାଜ୍ୟକୁ ଆଳୁ ରପ୍ତାନୀ ବନ୍ଦ କଲା ପଶ୍ଚିମବଙ୍ଗ । ସୀମାନ୍ତ ପୋଲିସକୁ ସଜାଗ କରାଇଲେ ମମତା ସରକାର । ଅନୁମତି ନପାଇ ବୁଧବାର ମଧ୍ୟରାତ୍ରିରୁ ପଶ୍ଚିମବଙ୍ଗ - ଓଡିଶା ସୀମାନ୍ତ ବେଲଦା ନିକଟରେ ଅଟକିଛି ଶହ ଶହ ଆଳୁ ଟ୍ରକ । ଓଡ଼ିଶାକୁ ଆଳୁ ନେଇ ଆସିବା ବେଳେ ୬୦ନମ୍ବର ଜାତୀୟ ରାଜପଥ ବେଲଦା ନିକଟରେ ଟ୍ରକ ଗୁଡିକୁ ଅଟକାଇଛି ପଶ୍ଚିମବଙ୍ଗ ପ୍ରଶାସନ ।
ତେବେ ଏ ନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ବୟାନ ସାମ୍ନାକୁ ଆସିଛି । ମମତା କହିଛନ୍ତି, ବର୍ତ୍ତମାନ ପଶ୍ଚିମବଙ୍ଗରେ ଆଳୁ ଦର ଅଧିକ ରହିଛି । ନୂଆ ଆଳୁ ଯାଇ ୨୦୨୫ ଜାନୁଆରୀ ଶେଷ କିମ୍ବା ଫେବୃଆରୀ ଶେଷ ସପ୍ତାହରେ ବାହାରିବ । ତେଣୁ ବର୍ତ୍ତମାନ ଗଚ୍ଛିତ ଥିବା ଆଳୁ ପଶ୍ଚିମବଙ୍ଗର ଚାହିଦା ପ୍ରଥମେ ପୂରଣ କରିବ । ପଶ୍ଚିମବଙ୍ଗରୁ ଆଳୁ ଯାଇ ଅନ୍ୟ ରାଜ୍ୟରେ ଚଢା ଦରରେ ବିକ୍ରି କରିବାକୁ ଦିଆଯିବ ନାହିଁ । ଆଉ ଯେ ପର୍ଯ୍ୟନ୍ତ ନୂଆ ଆଳୁ ନବାହାରିଛି, ସେ ପର୍ଯ୍ୟନ୍ତ ଅନ୍ୟ ରାଜ୍ୟକୁ ଆଳୁ ଦିଆଯିବନି ବୋଲି ସଫା ସଫା ମନା କରିଦେଇଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ତେବେ ମୁଖ୍ୟମନ୍ତ୍ରୀଙ୍କ ଏ ନିଷ୍ପତ୍ତିକୁ ସେଠାକାର ବ୍ୟବସାୟୀ ସଂଘ ନାପସନ୍ଦ କରିଛନ୍ତି.. କହିଛନ୍ତି ପଶ୍ଚିମବଙ୍ଗରେ ଆଳୁର ସଂଙ୍କଟ ନାହିଁ. ପଡୋଶୀ ରାଜ୍ୟକୁ ଆଳୁ ନ ଦେଲେ ବକେୟା ପଇସା ବି ମିଳିବନି
ସେପଟେ ଆଳୁ ଗାଡି ନଆସିବାରୁ ତାର ପ୍ରଭାବ ଓଡିଶା ବଜାରରେ ଦେଖିବାକୁ ମିଳିଲାଣି । ଏ ହେଉଛି କଟକ ଛତ୍ର ବଜାରର ଦୃଶ୍ୟ । ଆଳୁ ନେବା ପାଇଁ ଲାଗିଛି ଲୋକଙ୍କ ଭିଡ଼ । ବୁଧବାର ଆଳୁ କିଲୋ ପିଛା ୨୭ ଟଙ୍କାରେ ବିକ୍ରି ହେଉଥିବା ବେଳେ ଆଜି ଧଡା ପ୍ରତି ୧୦୦ ଟଙ୍କାରେ ବିକ୍ରି ହେଉଛି । ଆଜି ସକାଳୁ ପଶ୍ଚିମବଙ୍ଗରୁ ଛତ୍ର ବଜାରକୁ ୪ଟି ଗାଡି ଆସିଥିବା ବେଳେ ଆସନ୍ତାକାଲି ଗାଡି ଆସିବ କି ନାହିଁ ତାହା ଅନିଶ୍ଚିତତା ଭିତରେ । ଯଦି ଦିନେ ଦୁଇ ଦିନ ଭିତରେ ଆଳୁ ନଆସେ ତେବେ ଦର ବଢିବ ବୋଲି କହିଛନ୍ତି ବ୍ୟବସାୟୀ ସଙ୍ଘ ସମ୍ପାଦକ । ଗ୍ରାହକ ମଧ୍ୟ ଆଗକୁ ଆଳୁ ଦର ବଢିବାକୁ ନେଇ ଚିନ୍ତାରେ ପଡିଲେନି ।
📱 Get Argus News App
✨ଅନ୍ୟପଟେ ଓଡିଶା ସୀମାରେ ଆଳୁ ଟ୍ରକ ବନ୍ଦ ନେଇ ନବୀନଙ୍କୁ ଟାର୍ଗେଟ କରିଛନ୍ତି ଯୋଗାଣ ମନ୍ତ୍ରୀ । ଆଳୁ ଟ୍ରକ ରୋକିବା ଘଟଣାରେ ଭାଇ ଭଉଣୀ ସମ୍ପର୍କକୁ ଦାୟୀ କଲେ ମନ୍ତ୍ରୀ । ମନ୍ତ୍ରୀ କହିଛନ୍ତି, ଭାଇ କହିଥିବେ ବୋଲି ଭଉଣୀ ବନ୍ଦ କରିଥିବେ କିମ୍ବା ଭାଇ ଚିଠି ଲେଖିଥିବେ, ସେଥିପାଇଁ ଆଳୁ ଦେଉନାହାନ୍ତି । ତେବେ ଗ୍ରାହକଙ୍କ କୌଣସି ଅସୁବିଧା ହେବ ନାହିଁ ବୋଲି ପ୍ରତିଶ୍ରୁତି ଦେଇଛନ୍ତି ସରକାର ।
ତେବେ ମମତାଙ୍କ ଏ ନିଷ୍ପତ୍ତି ପଛରେ ପଶ୍ଚିମବଙ୍ଗବାସୀଙ୍କ ସ୍ଵାର୍ଥ ଅଛି ନା ରାଜନୈତିକ ଅଭିସନ୍ଧି ରଖି ଓଡିଶାକୁ ଆଳୁ ବନ୍ଦ କରିଛନ୍ତି ତାହାକୁ ନେଇ ଉଠୁଛି ବଡ ପ୍ରଶ୍ନ ।