ଭଦ୍ରକ: ହସଖୁସିରେ ଘରକୁ ଫେରୁଥିଲେ ବାପଝିଅ । ହେଲେ କିଏ ଜାଣିଥିଲା ଘର ଠାରୁ ମାତ୍ର କେଇ ମିଟର ଦୂରରେ ଜୀବନ ଚାଲିଯିବ । ଇଟା ଭର୍ତ୍ତି ଟ୍ରାକ୍ଟରଟି ଯମ ସାଜି ବାପା ଆଗରେ ସାନ ଝିଅର ଜୀବନ ନେଇ ଯିବ । ଏମିତି ଅଘଟଣ ଘଟିଛି ଭଦ୍ରକ ଗ୍ରାମାଞ୍ଚଳ ଥାନା ଅଞ୍ଚଳରେ ।

ଗ୍ରାମାଞ୍ଚଳ ଥାନା ଗୁଜିଦରଡ଼ା ଫାଣ୍ଡି କମାରିଆ ବସପୁର ଛକରେ ଟ୍ରାକ୍ଟର ଚାପାରେ ନାବାଳିକା ଝିଅର ମୃତ୍ୟୁ ହୋଇଛି । ସୂଚନା ଅନୁସାରେ, ସ୍ଥାନୀୟ ଦୁର୍ଗାପୁର ଅଞ୍ଚଳର ସେକ୍ ସବାଜ ତାଙ୍କ ୪ ବର୍ଷର ଝିଅକୁ ନେଇ ଘରକୁ ଫେରୁଥିଲେ । ସେହି ସମୟରେ ଏକ ଇଟା ବୋଝେଇ ଟ୍ରାକ୍ଟର ବାପଝିଅଙ୍କୁ ଧକ୍କା ଦେଇଥିଲା ।

ଆଉ ଦେଖୁ ଦେଖୁ ବାପା ଆଖି ଆଗରେ ହିଁ ଝିଅକୁ ଚାପି ଦେଇଥିଲା ଟ୍ରାକ୍ଟର । ଘଟଣା ସ୍ଥଳରେ କୁନି ଝିଅର ମୃତ୍ୟୁ ପରେ ଅଞ୍ଚଳରେ ଉତ୍ତେଜନା ଦେଖା ଦେଇଥିଲା । ସ୍ଥାନୀୟ ଲୋକ ଉତ୍ତ୍ୟକ୍ତ ହୋଇ ଉକ୍ତ ଟ୍ରାକ୍ଟରଟିରେ ନିଆଁ ଲଗାଇ ଦେଇଛନ୍ତି । ଗୁରୁତର ଅବସ୍ଥାରେ ନାବାଳିକାଙ୍କ ବାପାଙ୍କୁ ଭଦ୍ରକ ମେଡିକାଲ୍‌ରେ ଭର୍ତ୍ତି କରାଯାଇଛି । ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରୁଛି ।