ଝରଣା ପାଣି ଭରସାରେ ଲୋକେ, ବିଦ୍ୟୁତ ନଥିବାରୁ ଅନ୍ଧାରରେ କଟେ ଜୀବନ

ଦିନେ ଥିଲା ମାଓବାଦୀଙ୍କ ଗଡ଼, ହେଲେ ସରକାରଙ୍କ ହସ୍ତକ୍ଷେପ ପରେ ମାଓବାଦୀମାନେ ଏବେ ଆଉ ନାହାନ୍ତି ସତ କିନ୍ତୁ ଗାଁ ଅବସ୍ଥାକୁ ଦେଖିଲେ ଲାଗିବ ସତରେ ଏବେ ବି ମାଓବାଦୀ ଅଛନ୍ତି ବୋଲି । କାହିଁକି ନାଁ ଏଠାରେ ଅପହଞ୍ଚ ବିକାଶ । ଆମେ କହୁଛୁ କୋରାପୁଟ ଜିଲ୍ଲା ନାରାୟଣପଟଣା ବ୍ଲକ ମଙ୍ଗଳପୁର ଗାଁର କଥା । ଏଠାରେ 35ରୁ ଅଧିକ ପରିବାର ବସବାସ କରୁଛନ୍ତି । ଗାଁକୁ ନାହିଁ ରାସ୍ତା, ଗାଁ ଯିବାକୁ ହେଲେ ପାହାଡ଼ ଘଞ୍ଚ ଜଙ୍ଗଲ ଦେଇ ଯିବାକୁ ପଡ଼େ । ଏହି ଗାଁରେ ଶିକ୍ଷା ସ୍ୱାସ୍ଥ୍ୟ ନକହିବା ହିଁ ଭଲ । ଗାଁରେ ସ୍କୁଲ ଅଛି କିନ୍ତୁ ସ୍କୁଲ ଘର ନଥିବାରୁ ଶିକ୍ଷକମାନେ ମାସରେ ଥରେ ଆସୁଛନ୍ତି । ଛୋଟ ଛୋଟ ପିଲାମାନଙ୍କର ଜୀବନ ଏବେ ଅନ୍ଧାର ।

ମଙ୍ଗଳ ଗାଁରେ ଆଲୁଅ କହିଲେ ସୋଲାର ଲାଇଟ୍, ସେ ମଧ୍ୟ ଖରାପ ହୋଇଗଲାଣି । ପାଣି କହିଲେ, ଝରଣା ପାଣି । ତାହା ପୁଣି ଖରା ମାସ ହେଲେ ସୁଖିଯାଉଛି । ବର୍ଷା ସମୟରେ ଗଳିଆ ପାଣି ଆସୁଛି, ତାକୁ ବ୍ୟବାହାର କରି ଅନେକ ସମୟରେ ବିଭିନ୍ନ ପ୍ରକାର ରୋଗରେ ମଧ୍ୟ ଶିକାର ହେଉଛନ୍ତି ମଙ୍ଗଳପୁରବାସୀ । ପାହାଡ଼ ଉପରେ ଗାଁ ରହୁଥୁବାରୁ ସନ୍ଧ୍ୟା ହେଲେ ତାଟି କବାଟ ପଡିଯାଏ । ଗ୍ରାମବାସୀ ନିଜ ସମସ୍ୟା ନେଇ ଅନେକ ବାର ପଞ୍ଚାୟତଠାରୁ ବ୍ଲକ ବ୍ଲକଠାରୁ ଜିଲ୍ଲାପାଳ ଓ ଜନ ପ୍ରତିନିଧିଙ୍କୁ ଅଭିଯୋଗ କରିଥିଲେ ସୁଦ୍ଧା ସମସ୍ୟାର ସମାଧାନ ହୋଇପାରିଲା ନାହିଁ । ଏବେ ରାଜ୍ୟ ଓ କେନ୍ଦ୍ରରେ ଡବଲ ଇଞ୍ଜିନ ସରକାର ଅଛି । ଏଥର ଡବଲ ବିକାଶ ହେବ ବୋଲି ଆଶା ରଖିଛନ୍ତି ଗ୍ରାମବାସୀ ।