ରାତି ଅଧରେ ଥାନାରେ ହାଇଡ୍ରାମା । ଥାନା ଅଧିକାରୀଙ୍କ ସ୍ଵାମୀଙ୍କ ନାଁ ରେ ଅଭିଯୋଗ ଆଣିଛନ୍ତି ସହରର କିଛି ଲୋକେ । ଅଭିଯୋଗ ମୁତାବକ କଣ୍ଟାବାଞ୍ଜି ଥାନା ଅଧିକାରୀ ରଶ୍ମିତା ବେହେରାଙ୍କ ସ୍ବାମୀ ସହରର କିଛି ଯୁବକଙ୍କୁ ଦୁର୍ବ୍ୟବହାର କରିବା ସହ ମାରପିଟ କରିଥିଲେ । ଯେଉଁମାନେ ଏହି ଦୁର୍ବ୍ୟବହାରର ଶିକାର ହୋଇଥିଲେ ସେମାନେ ବିଳମ୍ବିତ ରାତିରେ ଥାନାକୁ ଯାଇ ବିକ୍ଷୋଭ ପ୍ରଦର୍ଶନ କରିଛନ୍ତି । ଶତାଧିକ ଲୋକ ରାତିରେ ଥାନାରେ ବିକ୍ଷୋଭ ପ୍ରଦର୍ଶନ କରିଥିବା ଦେଖିବାକୁ ମିଳିଛି । ଥାନା ଅଧିକାରୀଙ୍କ ସ୍ଵାମୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେବାକୁ ସେମାନେ ଦାବି କରିଥିଲେ ।

ଅଭିଯୋଗ କରିଥିବା କିଛି ଯୁବକ କହିଥିଲେ, ସେମାନେ ତାଙ୍କ ପରିବାର ସହ ମାର୍କେଟ ଆସିଥିବା ବେଳେ, ସେହି ଥାନା ଅଧିକାରୀଙ୍କ ସ୍ଵାମୀ, ତାଙ୍କୁ ଖରାପ ଭାଷାରେ ଗାଳିଗୁଲଜ କରିଥିଲେ । ଏହାକୁ ସେମାନେ ବିରୋଧ କରିବାରୁ, ସେ ନିଜକୁ ଏସ୍‌ପି ବୋଲି କହିବା ସହ, ଗୋଟିଏ ଫୋନ କଲରେ ଥାନାରେ ଭର୍ତ୍ତି କରିଦେବାର ଧମକ ମଧ୍ୟ ଦେଇଥିଲେ । ଅନ୍ୟ ଯୁବକମାନେ ଏହାକୁ ବିରୋଧ କରିବାରୁ ହାତ ଉଠାଇଥିଲେ ଥାନା ଅଧିକାରୀଙ୍କ ସ୍ଵାମୀ । ମାରୱାଡି ସମାଜ ଖରାପ ବୋଲି କହି ସେହି ଯୁବକମାନଙ୍କୁ ଗାଳି କରିଥିଲେ । ଯାହାକୁ ନେଇ ଶତାଧିକ ଯୁବକ ଥାନାରେ ବିକ୍ଷୋଭ ପ୍ରଦର୍ଶନ କରିଥିଲେ । ୩ରୁ ୪ ଘଣ୍ଟା ଯାଏଁ ଚାଲିଥିଲେ ଏହି ହୋହାଲ୍ଲା । ପରେ ଥାନା ଅଧିକାରୀଙ୍କ ସ୍ଵାମୀ କ୍ଷମା ପ୍ରାର୍ଥନା କରିବାରୁ ଶାନ୍ତ ହୋଇଥିଲେ ଲୋକେ ।