ଭୁବନେଶ୍ଵର: ଚକୋଲେଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତିକୃତି । ପ୍ରଥମ ଥର ପାଇଁ ଏକ ନିଆରା କଳାକୃତି ଦେଖାଇଛନ୍ତି ଦ ସ୍କୁଲ ଅଫ୍ ବେକିଙ୍ଗ ଆଣ୍ଡ ଫାଇନ୍ ପେଷ୍ଟ୍ରି ଆର୍ଟ ସେଣ୍ଟରର ଛାତ୍ରଛାତ୍ରୀ ମାନେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମ ଦିନ ପୂର୍ବରୁ ତାଙ୍କୁ ମିଠା ଭରା ଶୁଭେଚ୍ଛା ଜଣେଇବା ପାଇଁ ଛାତ୍ରଛାତ୍ରୀ ମାନେ ଚକୋଲେଟରେ ପ୍ରସ୍ତୁତ କରିଛନ୍ତି ପ୍ରଧାନମନ୍ତ୍ରୀଙ୍କ ଅବିକଳ ପ୍ରତିକୃତି ।

ଏହାକୁ ପ୍ରସ୍ତୁତ କରିବାକୁ ୭ ଦିନ ସମୟ ଲାଗିଥିବା ବେଳେ ୧୫ ଜଣ ଛାତ୍ରଛାତ୍ରୀ ନିୟୋଜିତ ହୋଇଥିଲେ । ଏହି ପ୍ରତିକୃତିରେ ପାଖା ପାଖି ୭୦ କେଜି ଚକୋଲେଟର ବ୍ୟବହାର କରାଯାଇଛି । ଯେଉଁଥିରେ ୧୫ କେଜି ଧଳା ଚକୋଲେଟ ଓ ୫୫ କେଜି ଡାର୍କ ଚକୋଲେଟ ବ୍ୟବହାର କରାଯାଇଛି । ଏହା ପ୍ରଧାନମନ୍ତ୍ରୀ ମୋଦିଙ୍କ ପ୍ରଥମ ଚକୋଲେଟ ପ୍ରତିକୃତି ବୋଲି ଦାବି କରିଛନ୍ତି ଛାତ୍ରଛାତ୍ରୀ ।

ଏପରି ଅଭିନବ ଓ କୁଶଳୀ ଉଦ୍ୟମ ପାଇଁ ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେ କହିଛନ୍ତି, ଭୁବନେଶ୍ୱରର 'କ୍ଲବ ଚକୋଲେଟ'ର ଛାତ୍ରଛାତ୍ରୀମାନେ ଚକୋଲେଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତିମୂର୍ତ୍ତି ତିଆରି କରି ତାଙ୍କର ଦୂରଦୃଷ୍ଟିପୂର୍ଣ୍ଣ ନେତୃତ୍ଵକୁ ସମ୍ମାନ ଜଣାଇଛନ୍ତି । ଏହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନ ପୂର୍ବରୁ ତାଙ୍କୁ ଅନନ୍ୟ ଉପହାର ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ

Argus News | argus news | Odisha Latest News, Breaking News, Trending News, Live TV