Argus News - LPG ବିତରଣ ସହଜ ପାଇଁ କେନ୍ଦ୍ର ସରକାରଙ୍କ ବଡ଼ ନିଷ୍ପତ୍ତି,

ନୁଆଦିଲ୍ଲୀ ୨୬/୦୩: ପିଏନଜି ସଂଯୋଗ ନିଅ, ନଚେତ କଟି ଯିବ ଏଲପିଜି କନେକ୍ସନ । ପଶ୍ଚିମ ଏସିଆ ସଂଘର୍ଷ ବେଳେ ଏଲପିଜି ବିତରଣ ସହଜ କରିବା ପାଇଁ ଏଭଳି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର। ପାଇପ୍ ପ୍ରାକୃତିକ ଗ୍ୟାସ୍ ଭିତ୍ତିଭୂମି ଥିବା ଅଞ୍ଚଳର ପରିବାରଗୁଡ଼ିକୁ ନୋଟିସ୍ ପାଇବାର ତିନି ମାସ ମଧ୍ୟରେ ଏଲପିଜି ସିଲିଣ୍ଡର ବଦଳରେ ପିଏନଜି ସଂଯୋଗକୁ ବଦଳାଇବା ପାଇଁ ନିର୍ଦ୍ଦେଶ ଦିଆଯାଇଛି । ଏହା ନକଲେ ଗ୍ୟାସ୍ ରିଫିଲ୍ ଯୋଗାଣ ବନ୍ଦ କରିଦିଆଯିବ। ଯଦି ବିତରକ ଏକ ଅନାପତ୍ତି ପ୍ରମାଣପତ୍ର ଜାରି କରନ୍ତି, ତେବେ ଏଲପିଜି ଯୋଗାଣ କଟାଯିବ ନାହିଁ। ଅତ୍ୟାବଶ୍ୟକ ସାମଗ୍ରୀ ଆଇନ ଅଧୀନରେ ଏହି ନିର୍ଦ୍ଦେଶନାମା ଜାରି ହୋଇଛି ।

ଯେଉଁଠାରେ ପାଇପଲାଇନ ଭିତ୍ତିଭୂମି ପୂର୍ବରୁ ଅଛି, ସେଠାରେ ସ୍ଥାନୀୟ ଗ୍ୟାସ ବିତରକମାନେ ପଞ୍ଜୀକୃତ କିମ୍ବା ସ୍ପିଡ୍ ପୋଷ୍ଟ ମାଧ୍ୟମରେ ପରିବାରଗୁଡ଼ିକୁ ସୂଚନା ଦେବେ। ନୋଟିସ୍ ପାଇବାର ତିନି ମାସ ମଧ୍ୟରେ PNG ସଂଯୋଗ ପାଇଁ ଆବେଦନ କରିବାକୁ ପଡ଼ିବ । ନଚେତ ସେହି ଠିକଣାରେ ଏଲପିଜି ଯୋଗାଣ ବନ୍ଦ ହୋଇଯିବ। ପରିସରର ମାଲିକ କିମ୍ବା ଆଇନଗତ ଦଖଲକାରୀ ଏହି ଆବେଦନ କରିପାରିବେ। ଯଦି ବିତରକ ଏକ ସାର୍ଟିଫିକେଟ୍ ପ୍ରଦାନ କରନ୍ତି ଯେ ସେହି ଠିକଣାରେ ପାଇପ୍ ସଂଯୋଗ ଦେବା ବୈଷୟିକ ଦୃଷ୍ଟିକୋଣରୁ ଅସମ୍ଭବ, ତେବେ ଏଲପିଜି ଯୋଗାଣ କଟାଯିବ ନାହିଁ। ପେଟ୍ରୋଲିୟମ ମନ୍ତ୍ରାଳୟର ଯୁଗ୍ମ ସଚିବ ସୁଜାତା ଶର୍ମା ଏକ ଆନ୍ତଃ-ମନ୍ତ୍ରଣାଳୟ ବ୍ରିଫିଂରେ ଏହି ନିର୍ଦ୍ଦେଶକୁ ସ୍ପଷ୍ଟ କରି ଏହାକୁ ଯୋଗାଣ ସୁରକ୍ଷା ପଦକ୍ଷେପ ବୋଲି କହିଛନ୍ତି।

ଏହି ବାଧ୍ୟତାମୂଳକ ପରିବର୍ତ୍ତନ କେବଳ ସେହି ଅଞ୍ଚଳରେ ଲାଗୁ ହେବ ଯେଉଁଠାରେ ଗ୍ୟାସ ପାଇପଲାଇନ ଭିତ୍ତିଭୂମି ରହିଛି। ସରକାରଙ୍କ ଆକଳନ ଅନୁଯାୟୀ ପ୍ରାୟ ୬୦ ଲକ୍ଷ ଗ୍ରାହକ ଏହି ପରିବର୍ତ୍ତନ କରିପାରିବେ। ଭାରତରେ ବର୍ତ୍ତମାନ ୩୩.୨ କୋଟିରୁ ଅଧିକ LPG ଗ୍ରାହକଙ୍କ ତୁଳନାରେ ମାତ୍ର ୧.୬୨ କୋଟି ଘରୋଇ PNG ସଂଯୋଗ ରହିଛି।

ସେପଟେ ଓଡ଼ିଶାରେ ପିଏନଜି ସଂଯୋଗକୁ ତ୍ୱରାନ୍ୱିତ କରିବା ପାଇଁ ସହରୀ ଗ୍ୟାସ୍ ଭିତ୍ତିଭୂମି ଅନୁମୋଦନ ପ୍ରକ୍ରିୟା ସରଳୀକୃତ କରାଯାଇଛି।ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି।
ଭୂତଳ ପାଇପଲାଇନ ବିଛାଇବା ଏବଂ ଅନ୍ୟାନ୍ୟ ସିଜିଡି ଭିତ୍ତିଭୂମି ନିର୍ମାଣ ପାଇଁ ସହରାଞ୍ଚଳ ସ୍ଥାନୀୟ ସଂସ୍ଥା ବା ୟୁଏଲବି ଗୁଡ଼ିକ କୌଣସି ଅନୁମତି ଶୁଳ୍କ ବା ପରମିଶନ ଫି ଆଦାୟ କରିବେ ନାହିଁ। ଏଥିସହିତ ଚାଲୁ ରହିଥିବା କିମ୍ବା ପୂର୍ବରୁ ମଞ୍ଜୁର ହୋଇଥିବା କାର୍ଯ୍ୟ ପାଇଁ କୌଣସି ନୂତନ ଅନୁମତିର ଆବଶ୍ୟକତା ପଡ଼ିବ ନାହିଁ, ଯାହାଦ୍ୱାରା ପ୍ରଶାସନିକ ବିଳମ୍ବ ଦୂର ହେବ ଏବଂ ପ୍ରକଳ୍ପ କାର୍ଯ୍ୟ ନିରନ୍ତର ଭାବେ ଜାରି ରହିବ। ପ୍ରକଳ୍ପର ଅଗ୍ରଗତିକୁ ଆହୁରି ତ୍ୱରାନ୍ୱିତ କରିବା ପାଇଁ ରାଜ୍ୟ ସରକାର ସମୟବଦ୍ଧ ଅନୁମୋଦନ ଉପରେ ଗୁରୁତ୍ୱ ଦେଇଛନ୍ତି ଏବଂ ସମସ୍ତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଆବେଦନଗୁଡ଼ିକର ତୁରନ୍ତ ଫଏସଲା କରିବାକୁ ନିର୍ଦ୍ଦେଶ ଦିଆଯାଇଛି। ଏପରିକି ସିଜିଡି ପ୍ରକଳ୍ପ କାର୍ଯ୍ୟକୁ ବାଧାମୁକ୍ତ କରିବା ପାଇଁ ନିର୍ଦ୍ଦିଷ୍ଟ ସମୟରେ ରାଜପଥ ବା ରାସ୍ତା ଖୋଳିବା ଉପରେ ଥିବା କଟକଣାକୁ ମଧ୍ୟ କୋହଳ କରାଯାଇଛି।

ଏଥିସହ ପଢ଼ନ୍ତୁ: ହୋଟେଲ ଓ ରେଷ୍ଟୁରାଣ୍ଟ ଏଲ୍‌ପିଜି ଚାର୍ଜ ନେଲେ ୧୯୧୫ରେ କଲ୍ କରନ୍ତୁ