ଯାଜପୁର: ପାଣିକୋଇଲି ଛକରେ ଲୁଟ୍ ପାଇଁ ଗୁଳିମାଡ଼ ଘଟଣାରେ ତନାଘନା । ଫେରାର୍ 3 ଦୁର୍ବୃତ୍ତଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ରେଡ୍ କରୁଛି ପୋଲିସ୍ । ଗିରଫ ଦୁଇ ଲୁଟେରାଙ୍କ କଟକ ଏସସିବି ମେଡିକାଲରେ ଚିକିତ୍ସା ଚାଲିଛି । ଗତକାଲି ଯାଜପୁର ପାଣିକୋଇଲି ଛକରେ ଆତଙ୍କ ଖେଳାଇଥିଲେ ଅନ୍ତରାଜ୍ୟ ଲୁଟେରା ।

16 ନଂ ଜାତୀୟ ରାଜପଥ କଡ଼ରେ ପାଣିକୋଇଲି ଛକରେ ଥିବା ପଣ୍ଡା ଅଳଙ୍କାର ଦୋକାନରେ ଲୁଟ୍ ପାଇଁ ଗ୍ରାହକ ବେଶରେ ପଶିଥିଲେ ପ୍ରାୟ 5 ଜଣ ଦୁର୍ବୃତ୍ତ । ସମସ୍ତଙ୍କ ପାଖରେ ଥିଲା ବନ୍ଧୁକ । ରିଭଲଭର ଦେଖାଇ ସୁରକ୍ଷା କର୍ମୀ ଓ ଦୋକାନ କର୍ମଚାରୀଙ୍କୁ ଧମକ ଦେଇ ସୁନା ଗହଣା ଲୁଟ୍ କଲେ ।

ଦୋକାନରୁ ବାହାରି 2ଟି ବାଇକରେ 5 ଜଣ ଦୁର୍ବୃତ୍ତ ଖସି ପଳାଇ ଯିବାକୁ ଉଦ୍ୟମ କରୁଥିବାବେଳେ ପାଣିକୋଇଲି ଛକରେ ପଛରେ ଥିବା ବାଇକକୁ ଧକ୍କା ଦେଇଥିଲା ଗୋଟିଏ କାର୍ । ସେହି ବାଇକରେ ବସିଥିବା 2 ଜଣ ଦୁର୍ବୃତ୍ତ ସେଠାରେ ପଡ଼ିଯାଇଥିବାବେଳେ ସେମାନଙ୍କୁ ଧରିବାକୁ ଉଦ୍ୟମ କରିଥିଲେ ସ୍ଥାନୀୟ ଲୋକେ । ଏହି ସମୟରେ ଅନ୍ୟ ବାଇକରେ ଥିବା ଦୁର୍ବୃତ୍ତମାନେ ଲୋକଙ୍କ ଉପରକୁ କରିଥିଲେ ଫାୟାରିଂ । ଦୁର୍ବୃତ୍ତଙ୍କ ଗୁଳିମାଡ଼ରେ ଦୁଇ ଜଣଙ୍କ ମୃତ୍ୟୁ ହୋଇଥିଲା ।

ତେବେ ବାଇକରୁ ପଡ଼ିଥିବା 2 ଜଣ ଦୁର୍ବୃତ୍ତଙ୍କୁ ଧରି ନିସ୍ତୁକ ମାଡ଼ ମାରିଥିଲେ ସ୍ଥାନୀୟ ଲୋକେ । ଅନ୍ୟ 3 ଜଣ ଫେରାର୍ ହୋଇଯାଇଥିଲେ । ପୋଲିସ୍ ସେମାନଙ୍କୁ ଧରିବା ପାଇଁ ଉଦ୍ୟମ ଚଳାଇଛି ।