ଶିଶୁ ଭବନ ଛକ ନିକଟ କେଦାରପଲି ବସ୍ତିରେ ଥିବା ହତ୍ୟା ଅଭିଯୁକ୍ତ ରାଜାର ଘର ଉପରେ ବହୁଲଡୋଜର ଚଢିଛି...ଘର ଭାଙ୍ଗି ଛିନଛତର...ସରକାରୀ ଜମିରେ ଘର କରି ବାରମ୍ବାର ଅପରାଧ କରୁଥିଲା ରାଜା ...ପୋଲିସ ରାଜାର ଘରକୁ ମାଟିରେ ମିଶେଇଛି ।

ଜାନୁଆରୀ 8, 2025 । ଭୁବନେଶ୍ୱର ରସୁଲଗଡ଼ ବ୍ରିଜ ନିକଟରେ ସଫେଇ କର୍ମଚାରୀ ସହଦେଵ ନାୟକଙ୍କୁ ଅତି ବିଭତ୍ସ ଭାବେ କରାଯାଇଥିଲା ହତ୍ୟା । ଏହି ଘଟଣାରେ ଏବେ ବି ଫେରାର ଅଛି ହତ୍ୟାକାଣ୍ଡର ଅନ୍ୟତମ ଅଭିଯୁକ୍ତ ରାଜା ନାୟକ। ରାଜାକୁ ପୋଲିସ ଗିରଫ କରି ନଥିବା ବେଳେ ଆଜି ତା ଘର ଉପରେ ବୁଲଡ୍ରୋଜର ବୁଲାଇଛି କମିଶନରେଟ ପୋଲିସ ।

ରାଜା ନାୟକଙ୍କ ଘର ଭାଙ୍ଗିବା ବେଳେ ଉତେଜନା ଦେଖା ଯାଇଥିଲା । ରାଜାଙ୍କ ପରିବାର ଲୋକେ ଘର ଭାଙ୍ଗିବାକୁ ବିରୋଧ କରୁଥିଲେ । ସେପଟେ ସହଦେବ ନାୟକ ହତ୍ୟାକାଣ୍ଡ ଘଟଣାରେ ମୁଖ୍ୟ ଅଭିଯୁକ୍ତ ରମା ନାୟକ ସମେତ 7 ଜଣଙ୍କୁ ଗିରଫ କରିଛି ମଞ୍ଚେଶ୍ୱର ଥାନା ପୋଲିସ। ଅନ୍ୟ ମାନଙ୍କ ଘର କାହିଁକି ଭଙ୍ଗାଯାଉନି ବୋଲି ଅଭିଯୋଗ କରିଛନ୍ତି ମୃତ ସହଦେଵଙ୍କ ଭାଇ ।

ଯେଉଁମାନେ ସରକାରୀ ଜାଗାରେ ଘର କରି ନିଶା କାରବାର ଅବା ଅପରାଧିଙ୍କୁ ପ୍ରଶୟ ଦେଉଛନ୍ତି ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ଚେତାବନୀ ଦେଉଛି ପୋଲିସ । ପୋଲିସର ଏଭଳି ପଦକ୍ଷେପ ଅପରାଧ ମୂଳପୋଛ ଦିଗରେ ସହାୟକ ହେବ ବୋଲି ଆଶା କରାଯାଉଛି ।