ନାବାଳିକା ଝିଅ ପୋଡ଼ି ହୋଇ ଗୁରୁତର ହେଲା । ଦୀର୍ଘ ଦିନ ମେଡିକାଲରେ ମୃତ୍ୟୁ ଯନ୍ତ୍ରଣା ପାଇଲା । ଆଉ ଶେଷରେ ଜୀବନ ସଂଗ୍ରାମରେ ହାରିଗଲେ ବଳଙ୍ଗା ପୀଡିତା । ଏଭଳି ଦୁଃଖଦ ପରିସ୍ଥିତିରେ କୋହ ଭରା କଣ୍ଠରେ ଆକୁଳ ନିବେଦନ କଲେ ପୀଡ଼ିତାଙ୍କ ବାପା ଓ ଭାଇ । କହିଲେ ରାଜନୀତି କରନି । କିନ୍ତୁ ଏପଟେ କୌଣସି ସୁଯୋଗ ଛାଡିବାକୁ ପ୍ରସ୍ତୁତ ନୁହାନ୍ତି ରାଜ୍ୟର ବିରୋଧୀ ଦଳ । ବଳଙ୍ଗା ପୀଡ଼ିତାଙ୍କ ମୃତ୍ୟୁ ପରେ ଆରମ୍ଭ ହୋଇଯାଇଛି କାଦୁଅ ପିଙ୍ଗା ରାଜନୀତି । ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କୁ ଘେରିଛନ୍ତି କଂଗ୍ରେସ ଓ ବିଜେଡି ।

ବିରୋଧୀଙ୍କୁ କଡ଼ା ଜବାବ ଦେଇଛି ବିଜେପି। ମୁଖପାତ୍ର ମନୋଜ ମହାପାତ୍ର, କହିଛନ୍ତି, ଶାଗୁଣା ଯେମିତି ଶବକୁ ଚାହିଁ ବସିଥାଏ, ସେମିତି ଶବ ଉପରେ ରାଜନୀତି କରୁଛନ୍ତି କଂଗ୍ରେସ ଓ ବିଜେଡି ।

ମାନସିକ ଚିନ୍ତା ଯୋଗୁଁ ଜୀବନ ଗଲା । ଝିଅର ଚିକିତ୍ସା ପାଇଁ ସରକାର ସବୁ ପଦକ୍ଷେପ ନେଇଥିଲେ । ଏ କଥା ନିଜେ କହିଛନ୍ତି ବଳଙ୍ଗା ପୀଡିତାଙ୍କ ବାପା ଓ ଭାଇ । ତା ସତ୍ବେ ତେଜୁଛି ରାଜନୈତିକ ବୟାନବାଜି। ଆରୋପ ପ୍ରତ୍ୟାରୋପର ଏହି ଲଢ଼େଇ ଆଗକୁ ବି ଜୋର ଧରିବ ବୋଲି ଆଶା କରାଯାଉଛି ।