ଡ୍ରାଇଭର ଆନ୍ଦୋଳନକୁ ନେଇ ରାଜନୀତି, କଂଗ୍ରେସ କହିଲା ଷଡ୍ଯନ୍ତ୍ର
Key Points
ଡ୍ରାଇଭରଙ୍କ ଆନ୍ଦୋଳନ ଫଳରେ ଦେଖା ଦେଲାଣି ପେଟ୍ରୋଲ - ଡିଜେଲ ସଙ୍କଟ ।
ତେଲ ଶେଷ ହେବା ଆଶଙ୍କାରେ ପେଟ୍ରୋଲ ପମ୍ପରେ ଲାଗୁଛି ଲୋକଙ୍କ ଲମ୍ବା ଲାଇନ୍ ।
ରାଜ୍ୟରେ ଜାରି ରହିଛି ଡ୍ରାଇଭରଙ୍କ ଆନ୍ଦୋଳନ । ଯେଉଁଥିପାଇଁ ନାହିଁ ନଥିବା ହନ୍ତସନ୍ତ ହେଉଛନ୍ତି ଓଡ଼ିଶାବାସୀ । ସେପଟେ ସରକାରଙ୍କ ସହ ଆଲୋଚନାରୁ ବାହାରି ପାରିଲାନି କୌଣସି ନିଷ୍କର୍ସ । ଦାବି ପୂରଣ ନେଇ ଜିଦରେ ଅଟଳ ଡ୍ରାଇଭର ମହାସଂଘ । ଆନ୍ଦୋଳନ ଯୋଗୁ ଆସିପାରୁନି ପେଟ୍ରୋଲ, ଡିଜେଲ ଟ୍ୟାଙ୍କର । ତେଲ ଶେଷ ହେବା ଆଶଙ୍କାରେ ପେଟ୍ରୋଲ ପମ୍ପରେ ଲାଗୁଛି ଲୋକଙ୍କ ଲମ୍ବା ଲାଇନ୍ । ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କହିଛନ୍ତି, ରାଜ୍ୟରେ ପେଟ୍ରୋଲ - ଡିଜେଲ ସମସ୍ୟା ନାହିଁ ।.
କଟକ ଜିଲ୍ଲା ନରସିଂହପୁର ଅଞ୍ଚଳରେ ଆନ୍ଦୋଳନରତ ଡ୍ରାଇଭରଙ୍କ ଅଭିନବ ପ୍ରତିବାଦ । ସରକାରୀ ବସ, ଅଟୋ ଚାଳକ, ପନିପରିବା ଗାଡ଼ି, ସବୁ ଗାଡ଼ିକୁ ଅଟକାଇ ଡ୍ରାଇଭରଙ୍କୁ ମୁଣ୍ଡିଆ ମାରି ଛାଡୁଛନ୍ତି ଆନ୍ଦୋଳନକାରୀ ଡ୍ରାଇଭର ।
ସେପଟେ ଡ୍ରାଇଭରଙ୍କ ଆନ୍ଦୋଳନ ଫଳରେ ଦେଖା ଦେଲାଣି ପେଟ୍ରୋଲ - ଡିଜେଲ ସଙ୍କଟ । ଭୁବନେଶ୍ଵର ଏବଂ କଟକ ସହରର ପେଟ୍ରୋଲ ପମ୍ପ ଗୁଡ଼ିକରେ ପ୍ରବଳ ଭିଡ଼ । କାଳେ ତେଲ ଶେଷ ହୋଇଯିବ ସେହି ଆଶଙ୍କାରେ ପେଟ୍ରୋଲ ପମ୍ପରେ ଅସମ୍ଭାଳ ଭିଡ଼ । ଲୋକେ ବ୍ୟତିବ୍ୟସ୍ତ ହୋଇ ଗୋଟେ ଲିଟର ଦରକାର ଥିଲେ ତିନି, ଚାରି ଲିଟର ତେଲ ପକାଉଥିବା ଦେଖିବାକୁ ମିଳୁଛି ।
ବଲାଙ୍ଗୀର ଜିଲ୍ଲା ପୁଇଁନ୍ତଳା ଅଞ୍ଚଳରେ ମଧ୍ୟ ଦେଖିବାକୁ ମିଳିଛି ସମାନ ଚିତ୍ର । ପୁଇଁନ୍ତଳା ଅଞ୍ଚଳ ପେଟ୍ରୋଲ ପମ୍ପ ଗୁଡ଼ିକରେ ଶେଷ ହୋଇଗଲାଣି ତେଲ । ଯେଉଁଥିପାଇଁ ନାହିଁ ନଥିବା ହଇରାଣ ହେଉଛନ୍ତି ଲୋକେ ।
ସେହିପରି ସଇଁତଳା ଅଞ୍ଚଳର ସ୍ଥିତି ମଧ୍ୟ ବେହାଲ । ସଇଁତଲା ଥାନା ଲାଚୁତ ଛକ ନିକଟରେ ବଲାଙ୍ଗୀରରୁ କଳାହାଣ୍ଡିକୁ ଯାଉଥିବା ୪ଟି ତେଲ ଟ୍ୟାଙ୍କରକୁ ଅଟକ ରଖିଛନ୍ତି ସ୍ଥାନୀୟ ଡ୍ରାଇଭର ସଂଘ । ଘଟଣା ସ୍ଥଳରେ ସଇଁତଳା ପୋଲିସ, ଦେଓଗାଁ ପୋଲିସ ଓ ବଲାଙ୍ଗୀର ସଦର SDPO ପହଞ୍ଚି ବୁଝାସୁଝା କରିବାକୁ ଚେଷ୍ଟା କରିଥିଲେ । କିନ୍ତୁ ଡ୍ରାଇଭର ମହାସଂଘ ତେଲ ଗାଡ଼ି ଛାଡ଼ିବାକୁ ନାରାଜ ।
ତେବେ ଏନେଇ ଆଜି ପେଟ୍ରୋଲ କମ୍ପାନୀ ପ୍ରତିନିଧି ଏବଂ ପେଟ୍ରୋଲିୟମ ଡିଲର ସଂଘ ସହ ଆଲୋଚନା କରିଛନ୍ତି ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ମନ୍ତ୍ରୀ କହିଛନ୍ତି, ପେଟ୍ରୋଲ - ଡିଜେଲ ସମସ୍ୟା ନାହିଁ । ସରକାର ଡ୍ରାଇଭର ମହାସଂଘ ଆନ୍ଦୋଳନ ଜନିତ ସମସ୍ୟା ସମାଧାନ ପାଇଁ ତତ୍ପର ଅଛନ୍ତି । ସାଧାରଣ ଖାଉଟି ପ୍ୟାନିକ ହୁଅନ୍ତୁ ନାହିଁ ବୋଲି ଅପିଲ କରିଛନ୍ତି ଖାଉଟି କଲ୍ୟାଣ ମନ୍ତ୍ରୀ । ସେପଟେ ଉତ୍କଳ ପେଟ୍ରୋଲିୟମ ଡିଲର ସଂଘ କହିଛି, ଯେତିକି ପେଟ୍ରୋଲ ମହଜୁଦ ଅଛି ଅଭାବ ସ୍ଥିତି ହେବ ନାହିଁ । ଦୁଇ ଦିନ ପାଇଁ ଆବଶ୍ୟକ ପରିମାଣରେ ତେଲ ମହଜୁଦ ଅଛି ।
୪ ଦିନ ହେଲା ଜାରି ରହିଛି ଡ୍ରାଇଭର ମହାସଂଘର ଆନ୍ଦୋଳନ। ରାଜ୍ୟ ସରକାର ଡ୍ରାଇଭର ମାନଙ୍କ ଦାବି ଉପରେ କଣ ବିଚାର କରିବେ ଏବଂ ଡ୍ରାଇଭର ମହାସଂଘ ଆନ୍ଦୋଳନରୁ କେବେ ଓହରିବ ତାହା ଉପରେ ସମସ୍ତଙ୍କ ନଜର ।
ଅନ୍ୟପଟେ ରାହୁଲ ଗାନ୍ଧିଙ୍କ ସମ୍ବିଧାନ ବଞ୍ଚାଅ ଆନ୍ଦୋଳନକୁ ବିରୋଧ କରିବା ପାଇଁ ରାଜ୍ୟବାସୀଙ୍କୁ ହଇରାଣ କରୁଛନ୍ତି ମୋହନ ସରକାର । ଡ୍ରାଇଭର ଆନ୍ଦୋଳନକୁ ନେଇ ବିଜେପି ସରକାର ଷଡ଼ଯନ୍ତ୍ର କରୁଛି ବୋଲି କହିଛନ୍ତି ପିସିସି ସଭାପତି ଭକ୍ତଚରଣ ଦାସ । ସେ କହିଛନ୍ତି, ସମ୍ବିଧାନ ବଞ୍ଚାଅ ଆନ୍ଦୋଳନ କେହି ରୋକି ପାରିବେ ନାହିଁ । ସେପଟେ ଏହାର କାଉଣ୍ଟରରେ ବିଜେପି ବିଧାୟକ ବିଭୁତି ଭୂଷଣ ପ୍ରଧାନ କହିଛନ୍ତି, ରାଜ୍ୟରେ ଆମର ସରକାର ଅଛି । ସରକାରଙ୍କୁ ଅଡୁଆରେ ପକାଇ ଆନ୍ଦୋଳନ କରିବୁ କି ? କଂଗ୍ରେସର ମତିଭ୍ରମ ହୋଇଛି । ସେଥିପାଇଁ ସେମାନେ ଏପରି ଅଭିଯୋଗ କରିଛନ୍ତି ।
