ଆଜି ଭୁବନେଶ୍ୱର ବଜାରରେ ୨୪ କ୍ୟାରେଟ ସୁନା ଦର ୧୦ ଗ୍ରାମ ପିଛା ୧୧୪୦ ଟଙ୍କା ବୃଦ୍ଧି ହୋଇଛି । ଏଥି ସହିତ ସୁନା ଦର ୯୭ ହଜାର ୩୧୦ ଟଙ୍କାରେ ପହଞ୍ଚିଛି । ସେହିପରି ୨୨ କ୍ୟାରେଟ ସୁନା ଦାମ ୧୦ ଗ୍ରାମ ପିଛା ୧୦୫୦ ଟଙ୍କା ବଢ଼ି ୮୯ ହଜାର ୨୦୦ ଟଙ୍କା ହୋଇଛି । ସୁନା ଦର ପ୍ରତିଦିନ ନୂଆ ରେକର୍ଡ କରୁଛି । ଏପରି ସୁନା ଦର ବୃଦ୍ଧିକୁ ନେଇ ସୁନା କିଣିବାକୁ ଲୋକେ ଡରିଲେଣି । ବାହାଘର ଋତୁରେ ଏମିତି ଭାବରେ ସୁନା ଦର ବଢୁଛି ଯେ ଲୋକେ ଦୁଇଟା ହାର ଦେବା ଜାଗାରେ ଗୋଟିଏ ଦେଉଛନ୍ତି ।

ଏପରିକି ବନ୍ଦାଣରେ ମଧ୍ୟ ସୁନା ଦେବାକୁ ଲୋକେ ଡରିଲେଣି । ସୁନା ବଦଳରେ ଟଙ୍କା ନହେଲେ ଅନ୍ୟକିଛି ସାମାନ ଦେଇ କାମ ଚଳେଇ ଦେଉଛନ୍ତି ଲୋକେ । ବିବାହ ଋତୁରେ ସୁନା ଦର ବୃଦ୍ଧି ଗ୍ରାହକଙ୍କୁ ସବୁଠୁ ବଡ ଟେନସନ୍ ଦେଉଛି ।

ବିଭିନ୍ନ ଦେଶର କେନ୍ଦ୍ରୀୟ ବ୍ୟାଙ୍କ ଗୁଡିକ ଅଧିକରୁ ଅଧିକ ସୁନା କିଣୁଛନ୍ତି । ଫଳରେ ସୁନା ଦର ଏପରି ଉପରମୁହାଁ ରହୁଛି । ସେହିପିର ଟ୍ରମ୍ପଙ୍କ ଟାରିଫ୍ ୱାର୍ ମଧ୍ୟ ସୁନା ଦର ବୃଦ୍ଧିର ଆଉ ଏକ କାରଣ । ଯଦି ଏମିତି ସ୍ଥିତି ଲାଗି ରୁହେ ତେବେ ଆର ସପ୍ତାହରେ ସୁନା ଦର ଲକ୍ଷେ ଟପିବ ।

ସୁନା ଦର ବୃଦ୍ଧି ବିଶେଷ କରି ଗରିବ ଓ ମଧ୍ୟବିତ୍ତଙ୍କୁ ବେଶୀ ବାଧୁଛି । ଫଳରେ ବିକଳ୍ପ ଭାବେ ଲୋକେ ୱାନ୍ ଗ୍ରାମ୍ ଗୋଲ୍ଡରେ କାମ ଚଳେଇ ଦେଉଛନ୍ତି ।