କନ୍ଧମାଳ ତୁମୁଡ଼ିବନ୍ଧ ବ୍ଲକ ବେଲଘର ପଞ୍ଚାୟତ ଡାହାବାଲି ଗାଁର ବସବାସ କରନ୍ତି କୁଟିଆ କନ୍ଧମାନେ । ଗାଁକୁ ଯିବାକୁ ହେଲେ କୌଣସି ରାସ୍ତା ହିଁ ନାହିଁ । ଘଞ୍ଚ ଜଙ୍ଗଲ ଭିତରେ ଚାଲି ଚାଲି ଯିବାକୁ ହୁଏ । ଗାଁର କୋଡିଏଟି ପରିବାର ବସବାସ କରନ୍ତି । ପୁରୁଷ ପୁରୁଷ ଧରି ଏହି ଘଞ୍ଚ ଜଙ୍ଗଲ ଭିତରେ ବସବାସ କରୁଛନ୍ତି । ହେଲେ ଗାଁକୁ ରାସ୍ତାଟିଏ ନଥିବାରୁ, ସରକାର ଦେଉଥିବା ସମସ୍ତ ଯୋଜନାରୁ ବଞ୍ଚିତ ଏମାନେ । ପଞ୍ଚାୟତ ଅଫିସରୁ ରାସନ ଚାଉଳ ଆଣିବାକୁ ହେଲେ, ମୁଣ୍ଡିଆ ଚଢ଼ି ୮ କିଲୋମିଟର ଗଲେ ଆଣନ୍ତି ମୁଣ୍ଡରେ ବୋହି ବୋହି । ରାସ୍ତା ନଥିବାରୁ ଗାଁକୁ ଆସି ପାରୁନି ଆମ୍ବୁଲାନ୍ସ । ଗର୍ଭବତୀ କିମ୍ବା ରୋଗୀଙ୍କୁ ମେଡିକାଲ ନେବାକୁ ହେଲେ ଖଟିଆରେ ବୋହି ନେବାକୁ ପଡ଼େ । 2022-23 ଆର୍ଥିକ ବର୍ଷରେ ଜଙ୍ଗଲ ଭିତରେ ଗାଁକୁ ରାସ୍ତାଟିଏ ନିର୍ମାଣ ପାଇଁ ୩ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା । କିନ୍ତୁ ଫଳକଟି ଛଡ଼ା, ରାସ୍ତାର ଚିହ୍ନ ହିଁ ନାହିଁ ।

ଖାଲି ଏତିକିରେ ସରିନି ଏମାନଙ୍କ ଦୁଃଖ । ଗାଁରେ ନଳକୂପଟିଏ ନାହିଁ । ଝରଣାର ପାଣିକୁ ଗାଁ ଲୋକ ନିଜ ହାତରୁ ଖର୍ଚ୍ଚ କରି, ଗାଁ ମୁଣ୍ଡ ଯାଏଁ ପାଇପ ଯୋଗେ ଆଣିଛନ୍ତି । ଗାଧୁଆ, ଖିଆ ପିଆ ପାଇଁ ସେଇ ଝରଣା ପାଣି ବ୍ୟବହାର କରିଥାନ୍ତି । ତେବେ ପ୍ରାଥମିକ ଶିକ୍ଷାରୁ ପ୍ରାୟ ପିଲା ବଞ୍ଚିତ । ଗାଁରେ ଅଙ୍ଗନୱାଡ଼ି କେନ୍ଦ୍ରଟିଏ ମଧ୍ୟ ନାହିଁ । ପାଠ ପଢ଼ିବାକୁ ହେଲେ ବେଲଘର ଆଶ୍ରମ ବିଦ୍ୟାଳୟରେ ପିଲାମାନେ ରହି ପାଠ ପଢନ୍ତି । ପ୍ରଧାନମନ୍ତ୍ରୀ ଆବାସରୁ ବଞ୍ଚିତ ଏଠାକାର ହିତାଧିକାରୀ । ସାଂସଦ, ବିଧାୟକଙ୍କ କଥା ଛାଡନ୍ତୁ ସରପଞ୍ଚଙ୍କ ମଧ୍ୟ କେବେ ଏହି ଗାଁରେ ପାଦ ପଡ଼ିନଥିବା ଅଭିଯୋଗ କରିଛନ୍ତି ଗ୍ରାମବାସୀ । ପଞ୍ଚାୟତଠାରୁ ବ୍ଲକ ଅଫିସ ଦୌଡି ଦୌଡି ନୟାନ୍ତ ହେଲେଣି ଏମାନେ, କିନ୍ତୁ କେହି କର୍ଣ୍ଣପାତ କରୁନଥିବା ମଧ୍ୟ ଅଭିଯୋଗ କରିଛନ୍ତି ।