ପାଖେଇ ଆସୁଛି ଅଗ୍ରପୂଜ୍ୟ ଶ୍ରୀଗଣେଶଙ୍କ ପୂଜା । ଚଳଚଞ୍ଚଳ ବିଭିନ୍ନ ପୂଜା ମଣ୍ଡପ । ମୂର୍ତ୍ତିକୁ ଶେଷ ସ୍ପର୍ଶ ଦେଉଛନ୍ତି କଳାକାର । ଆଉ ମାତ୍ର କିଛି ଦିନ ପରେ ଗଣେଶ ପୂଜା ବୋଲି ଶିଳ୍ପୀଙ୍କ ଆଖିରେ ନିଦ ନାହିଁ । ପ୍ରତିବର୍ଷ ଭଳି ଏବର୍ଷ ମଧ୍ୟ ନିଆରା ଢଙ୍ଗରେ ଅଗ୍ରପୂଜ୍ୟଙ୍କ ଆବାହନ ପାଇଁ ଚାଲିଛି ପ୍ରତିଯୋଗିତା । କେଉଁଠି ବିଶାଳ ମୂର୍ତ୍ତି ପ୍ରସ୍ତୁତ ହୋଇଛି ତ କେଉଁଠି ଥିମ୍‌କୁ ନେଇ ପ୍ରସ୍ତୁତ ହୋଇଛି ପୂଜା ମଣ୍ଡପ । ମାଟିରେ ଜୀଵନ ଭରିବାରେ ବ୍ୟସ୍ତ କାରିଗର । ଗ୍ରାହକ ବରାଦରେ ଚାଲିଛି ମୂର୍ତ୍ତି ତିଆରି । ମୁମ୍ବାଇ ଷ୍ଟାଇଲର ଗଣେଶ ମୂର୍ତ୍ତି ସହ କାର୍ଟୁନ ଷ୍ଟାଇଲ, ଡମ୍ବରୁ ମହାରାଜ, ଛୋଟାଭିମ ସହ ବଲିଉଡ ମୁଭି ଛାବାର ଥିମକୁ ନେଇ ମୂର୍ତ୍ତି ତିଆରି କରାଯାଉଛି । ଏବଂ ଏଥର ଅଧିକ ଫିନିସିଙ୍ଗ ପାଇଁ ସ୍ପେସିଆଲ ଗଙ୍ଗା ନଦୀର ମାଟିକୁ ମଧ୍ୟ ବ୍ୟବହାର କରାଯାଇଛି ।

ତେବେ ଅନ୍ୟ ପକ୍ଷରେ ବିଭିନ୍ନ ପୂଜା କମିଟି ପକ୍ଷରୁ ମଧ୍ୟ ଚାଲିଛି ଜୋରଦାର ପ୍ରସ୍ତୁତି । କିଏ ସୁନ୍ଦର ଭାବରେ AI ଦ୍ୱାରା ପ୍ରସ୍ତାବିତ AI ମହଲ ତିଆରି କରୁଛି ତ କିଏ ପଦ୍ମ ଫୁଲରେ ମା' ଲକ୍ଷ୍ମୀଙ୍କ ପେଣ୍ଡାଲ ତିଆରି କରିଛି । ପୁଣି କିଏ ମୟୂର ଥିମ୍ ତ କିଏ ଆକର୍ଷଣୀୟ ସିଂହରେ ଗଣେଶ ବସିଥିବା ଭଳି କରୁଛନ୍ତି ପେଣ୍ଡାଲ । ଯାହାକୁ ଜୋରଦାର ଭାବରେ କାର୍ଯ୍ୟରେ ପ୍ରତିଫଳିତ କରିବା ପାଇଁ ଲାଗି ପଡିଛନ୍ତି କାରିଗର । କିଏ ବାଉଁଶ ବାନ୍ଧିବାରେ ଲାଗିଛି ତ କିଏ ଡିଜାଇନକୁ ସୁନ୍ଦର କରିବା ରେ ଯୋଗଦାନ ଦେଉଛି ସମସ୍ତ ପୂଜା ପେଣ୍ଡାଲରେ କଡ଼ାକଡ଼ି ସୁରକ୍ଷା ବ୍ୟବସ୍ଥା ସହ ପାର୍କିଂ ଏବଂ ଅନ୍ୟାନ୍ୟ ବ୍ୟବସ୍ଥା କରାଯାଇଛି । ତେବେ ଏଥର ଶ୍ରୀ ଗଣେଶଙ୍କ ପୂଜା ରାଉରକେଲା ସହରରେ ଜୋରଦାର ଭାବରେ ହେବ ବୋଲି କହିଛନ୍ତି ପୂଜା କମିଟି କର୍ମକର୍ତ୍ତା ।

ରାଜଧାନୀ ଭୁବନେଶ୍ୱରରେ ମଧ୍ୟ ଚଳଚଞ୍ଚଳ ପୂଜା ମଣ୍ଡପ । ବଡଗଡର ୬୧ ଫୁଟ୍ ର ଗଣେଶ ମୂର୍ତ୍ତିକୁ ନେଇ ଚର୍ଚ୍ଚା ଜୋର । ମୂର୍ତ୍ତି ସହ ଦୁଇ ରୂପା ପାଦୁକା ଓ ରୂପା ମୁଷକ ହେବ । ଗଣେଶଙ୍କ ହାତରେ ଶୋଭା ପାଇବ ୬୧ କେଜିର ଲଡୁ । ଏଥିପାଇଁ ପୁରା ପ୍ରସ୍ତୁତ ବଡଗଡ ଗଣେଶ ପୂଜା କମିଟି । ୨୦୧୮ରେ ୨୧ ଫୁଟ୍ ଗଣେଶ ମୂର୍ତ୍ତିରୁ ଆରମ୍ଭ ହୋଇଥିଲା ଗଣେଶ ପୂଜା । ଏବର୍ଷ ଏହା ୬୧ ଫୁଟ୍ ରେ ପହଞ୍ଚିଛି । ଯାହାକି ଭକ୍ତଙ୍କୁ ଆକର୍ଷଣ କରିବା ନେଇ ଆଶା ରଖିଛି କମିଟି । ଭକ୍ତଙ୍କ ଶାନ୍ତିଶୃଙ୍ଖଳା ଦର୍ଶନ ପାଇଁ ସ୍ବତନ୍ତ୍ର ବ୍ୟବସ୍ଥା ହୋଇଛି । ଗାଡ଼ି ପାଇଁ ସମ୍ପୂର୍ଣ୍ଣ ଟ୍ରାଫିକ ବ୍ୟବସ୍ଥା ସହ ବିଭିନ୍ନ ସ୍ଥାନରେ ପାର୍କିଂର ବ୍ୟବସ୍ଥା ହୋଇଛି । ଯାହାଫଳରେ ଭିଡ଼ ନିୟନ୍ତ୍ରଣ କରାଯାଇପାରିବ । ଏହି ପୂଜା କାର୍ଯ୍ୟକ୍ରମ ୬ ଦିନ ଧରି ଚାଲିବ । ପ୍ରତିଦିନ ସନ୍ଧ୍ୟାରେ ବହୁ ରଙ୍ଗାରଙ୍ଗ କାର୍ଯ୍ୟକ୍ରମ ଆୟୋଜିତ ହେବ । ଏଥିରେ ଓଡ଼ିଶାର ବହୁ ପ୍ରସିଦ୍ଧ ଖ୍ୟାତନାମା କଳାକାରମାନେ ପ୍ରଦର୍ଶନ କରିବେ ବୋଲି ଅନୁଷ୍ଠାନ ପକ୍ଷରୁ ସୂଚନା ଦିଆଯାଇଛି ।

Argus News | argus news | Odisha Latest News, Breaking News, Trending News, Live TV