ରାଉରକେଲା ବନ୍ଧମୁଣ୍ଡା ବରକାନିରେ ପୋଲିସ-ଗ୍ରାମବାସୀଙ୍କ ଭିତରେ ଜୋରଦାର ଖଣ୍ଡ ଯୁଧ୍ୟ । ପ୍ରାୟ ୧୦ ରୁ ଅଧିକ ପୋଲିସ କର୍ମଚାରୀ ଆହତ ହୋଇଥିବା ଜଣାପଡିଛି । କିଛି ଗ୍ରାମବାସୀ ମଧ୍ୟ ଆହତ ହୋଇଛନ୍ତି । ଆରଏସପିର ଟ୍ରେନ ଲାଇନ ନିର୍ମାଣକୁ ନେଇ ପ୍ରାୟ ୪୦ ଦିନ ହେବ ଚାଲିଥିଲା ଗ୍ରାମବାସୀଙ୍କ ଧାରଣା ଏବଂ ବିରୋଧ । ଗତକାଲି ପୋଲିସ ଉପସ୍ଥିତିରେ କାମ ଆରମ୍ଭ ପରେ ଜୋରଦାର ବିରୋଧ କରିଥିଲେ ଗ୍ରାମବାସୀ । ଗତକାଲି ମଧ୍ୟ ପୋଲିସ ଏବଂ ଗ୍ରାମବାସୀ ମୁହାଁମୁହିଁ ହେଇଥିଲେ ।

ଜେସିବି ଆଗକୁ ଜଣେ ଯୁବକ ଚାଲି ଆସିବାରୁ ଚାପି ହୋଇ ମୃତ୍ୟୁ ହୋଇଥିବା ଜଣାପଡିଛି । ଜଣଙ୍କ ମୃତ୍ୟୁ ପରେ ପ୍ରବଳ ଉତ୍ତେଜନା ଦେଖିବାକୁ ମିଳିଥିଲା । ଏହାପରେ ଲୋକେ ପୋଲିସକୁ ଆକ୍ରମଣ କରିଥିଲେ । ମାରଣାସ୍ତ୍ର ଓ ଢ଼େଲାପଥର ମାଡ଼ରେ 10 ରୁ ଉର୍ଦ୍ଧ୍ୱ ପୋଲିସ ଆହତ ହୋଇଥିବା ଜଣାପଡିଛି । ଆହତ ପୋଲିସ ରାଉରକେଲା ସରକାରୀ ହସ୍ପିଟାଲରେ ଭର୍ତ୍ତି ହୋଇଛନ୍ତି ।